ازاي توصلي للتسليم مع ربنا مع الضغوط اللي محسسانا بالإرهاق طول الوقت ؟

في وسط ضغوط الحياة الكتيرة ، و احساسنا طول الوقت اننا بنجري ، و كل ما نقرب نوصل.. نلاقي نفسنا بنجري تاني..

 في وسط حياة صعبة زي اللي عايشينها،  بقي فكرة الرضا و التسليم مهمين جدا جدا لحياتنا.

الفترة دي من حياتنا مليانة تغييرات سريعة و مفاجئة علي كل الأصعدة و دة باين جدا في :

١-طول الوقت بنقول كلمة يالا بسرعة عشان نلحق “نلحق ايه و ليه محدش عارف”

٢-احساسنا العام بالارهاق و التعب معظم الوقت

٣-قلة النوم و التفكير الزيادة

٤-فقدان و انعدام الشغف و مع ذلك الجري مستمر عشان الشكل الاجتماعي او الاقتصادي 

٥-احساسنا الدايم اننا في سبق و بنقوم من نقرة نقع في دحديرة

٦-إحساس الانبساط باي حاجة حتي لو كانت بتبسطنا قبل كدة بقي اقل 

٧-احساسنا العام بالقلق و التوتر و انعدام الأمان و طول الوقت حاسيين ان ورانا حاجة او مستنين حاجة

كل دة بيوصلنا لأهمية الرضا و التسليم فالفترة دي من حياتنا !

طب يعني ايه رضا و تسليم لربنا ؟

-يعني نقبل اللي مكناش متوقعينه

-يعني نعرف نتعامل و نتاقلم علي الأوضاع الجديدة

-يعني  يبقي جوانا يقين ان كل حاجة بتحصل في حياتنا لسبب

-يبقي عندنا ايمان بان اللي ربنا بيعملهولنا هو الأفضل لينا حتي لو كنا مش قادرين نفهمه في وقتها

-يعني في وسط ما انتي ممكن تبقي مصدومة من وضع او موقف او حد قريب منك ، تبقي في نفس الوقت قادرة تحمدي ربنا انه كشف لك حاجة مكنتيش عارفاها ، او وقفك في موقف عشان يوريكي حقيقة معينة ، او يبين لك شخص علي حقيقته

-يعني تهدّي رتم حياتك و ماتبقاش حياتك عبارة عن سبق طويل ، كل ما تخلصي جزء تروحي لابعد منه، الطموح اكيد مهم و مطلوب ، بس في فرق بين الطموح و بين الانهاك من غير رضا

-يعني تعرفي تشكري نفسك علي اللي وصلتي له، و تقدري مجهودك، و تدي لنفسك وقت ومساحة تستمتعي بالحياة و باللي حققتيه، تعرفي امتي تفصلي عشان تستمتعي، امتي توقفي جري و تريحي و تاخدي نفسك عشان تشحني للي جاي 

الرضا و التسليم حاجة مش سهلة ابدا ،مش سهل انك تتوجعي او تتصدمي او تتحطي في مواقف او مراحل صعبة في حياتك و تعرفي تقبليها، او تتعاملي معاها، او تطوعيها ، مش سهل انك تقدري  تبصي للحلو اللي في المواقف الصعبة وان كان كل اللي باين منها آلم ووجع ، مش سهل في عالم مفتوح و كل تنافسية تخففي او تهدي من رتمك عشان ماتبقيش منهكة طول الوقت،

 وعشان كدة الرضا و التسليم كمان محتاجين لشوية حاجات عشان نقدر نحققهم،

محتاجين ل :

١-تمارين تأمل “ودة ممكن من خلال اليوجا، الصلاة، التامل في الطبيعة،..”

٢-هدوء و سلام نفسي “لازم يبقي في وقت نفصل نفسنا عن السوشيال ميديا، لانها بتأثر جدا علي مودنا و افكارنا و خوفنا و قلقنا”

٣-تمارين علي التقبل “محاولاتك مع نفسك انك تتقبلي مشاكل ماضيكي، أو تتقبلي وضع جديد و تفكري هتتكيفي فيه ازاي، محاولات فهم و تقبل. الخسارة.و الوجع و انه جزء من حياتنا،..”

٤-قربنا من نفسنا و محاولة فهمها و قربنا لروحنا وروح ربنا ” روحنا من روح ربنا و كل ما بنحاول نقرب اكتر لروحنا كل ما بيقربنا لفكرة الرضا و التسليم”

٥-تمارين للسيطرة علي الشهوات و السيطرة علي الذات “ممكن يبقي بالصوم، أو بالسيطرة علي نفسنا قدام شهوات الحياة المختلفة، ودة بيساعد علي سمو الروح و بيخليكي اهدي لانك ديما في موقف قوة انك تقدري تستغني و تتكيفي مع المناسب ليكي”

٦-تمارين للتحكم في الغضب

٧-تمارين لمواجهة نوبات القلق و نوبات الخوف

٨-قربنا من اشخاص بيمثلوا لينا الأمان و مشاركتهم افكارنا و مخاوفنا اذا كان عندهم القدرة علي انهم يطمنونا “مهم اوي يبقي في دايرتنا اشخاص بيمثلوا منطقة الأمان، ولو مش موجودين لازم نحاول نخلق منطقة الأمان دي بينا و يبن نفسنا “

٩-رجوعنا للفطرة السليمة و الهدوء في أماكن طبيعية من وقت للتاني ” ديما الرجوع للطبيعة و البعد عن الحياة المزيفة بيخلينا اهدي و اقرب لروحنا و دة بيسلعدنا علي فكرة التقبل و التسليم

في الاخر احب اقولكم ان علي اد ما دي حاجات كلنا بنواجهها مؤخرا، الا ان مهم جدا نفضل بنحاول نوصل للتكيف و التقبل مع التسليم ودة مش معناه انعدام السعي ، و لكن معناه استمرار السعي بالشكل اللي يخلينا نحط طاقتنا في مكانها السليم، من غير ما نضيعها علي جري و قلق و خوف، و ننسي اهم حاجة و هي استمتاعنا بالحياة و بكل مرحلة و حاجة فيها،

كل مرحلة و كل لحظة في حياتنا فيها حاجات حلوة محتاجين نركز عليها و نستمتع بحياتنا و نهدي من قلقنا و جرينا ، لان كل حاجة بتحصل بتحصل لسبب!