احساسى بالفشل هيموتنى مش عارفة ده فشل ولا احباط

Question

احساسى بالفشل هيموتنى مش عارفة ده فشل ولا احباط. انا مش عارفة ارجع ابدأ تانى و خصوصاً مع الجواز بلاقى نفسى ايام فاضية بس معنديش رغبة ولا طاقة وايام ما بيكون فى طاقة مبيكونش فى وقت. اخر شغلانة أشتغلتها شبه اترفضت بس مش بسبب ادائى بسبب أن صاحب الشركة مش عاجبه مديرى وطريقته فا مشى ناس من التيم …. أنا حاليا دخلى الوحيد جوزى وانا متعودة أصرف على نفسى عندى موهبة حبى للطبخ فكرت استغلها تجبلى فلوس علشان ادفع تمن اى كورس عايزاه او اجيب اللى حباه بس حتى دى مش عارفة ابدأ فيها ازاى ومنين واعمل إيه. بقالى مدة بحاول اعلم نفسى التنظيم والتخطيط واحفز نفسى علشان ارجع للمذاكرة تانى بس بفشل واحاول و افشل مبقاش عندى ثقة انى بعد اما اوصل هبقى سعيدة وفنفس الوقت مش قادرة أجيب فلوس و استغل موهبتى اللى بتخلينى احس بالفخر … محتاجة ارجع فخورة بنفسى كل مدة بيجيلى ايام بشوف الدنيا أسود عقلى بيكون ساكت وبحس برغبة شديدة فى الموت بصلى واستعيذ بالله بس بيفضل عقلى ده ساكت واسود او مش شايف . يوم الجمعة اللى فاتت قعدت اليوم كله ساكتة رغم محاولات جوزى انى اتكلم واكتشفت انه طول اليوم قدامى بس مش شايفة وشه

FEMALE, AGE 21-25, MARRIED

انا فاهمة وجهة نظرك اكيد، فيه تلت أنواع من الناس، اللي بيدركوا الأشياء و يتفاعلوا معاها اول شيء، اللي بيدركوا الأشخاص أول حاجة و بتكون حياتهم غالباً بتدور حولهم، و اللي بيدركوا و يتفاعلوا مع النظام، و بالتالي دايماً بيدوروا على مكانهم في النظم الموجودة

حسب الشرح اللي كتبتيه، فانتي بتميلي لتحقيق وجودك من خلال تحقيق شيء ملموس و يفضل يكون من خلال نظام واضح المعالم، ليه باقول كده، لان لو كنتى ليكي اكتر في الأشخاص، كان مجرد وجود زوجك امامك حينسيكي حاجات كتير، حتى لو متخانقين

دخولك في الزواج كان دخول في نظام حيكون لك مكان فيه و بتنتجي فيه شيء و من الواضح ان نوع الإنتاج ده مش محسسك بأي انجاز، انتي محتاجة تكوني منتجة

و شعورك دلوقتي انك مزنوقة، و يمكن كمان مسجونة و مافيش مخرج و لا موارد تساعدك محسسك بالهزيمه من قبل ما تحاربي، و بالتالي بالفشل من قبل ما تحاولي

الدنيا عادلة، لانها من رب عادل، بتدينا اللي محتاجينه، يمكن مش اللي عايزينه. اللي عايزينه لازم احنا اللي نروح نجيبه بنفسنا، لكن هي بتدينا اللي حنحتاجه علشان نقدر نجيب اللي عايزينه. دوري حواليكي على كل المعتطيات اللي ربنا حطها لك في صندوقك، كل حاجة، مش بس الحاجات اللي انتي حكمتي عليها انها مهمة. لا بصي على كل حاجة موجودة في حياتك. حتلاقي ان فيه حاجات انتي كنتي عايزة تجيبيها بطريقة محتاجة فلوس، يمكن موجودة بشكل تاني مش محتاج فلوس، بس مش قي الصورة اللي انتي كنتي متصوراها، علشان توصلي لشئ او مكان، لازم دايماً تحدديه تحدديه بالظبط

يعني ماينفعش تقولي للجي بي اس وديني العتبة، او وديني أي مول! لازم تقوليله فين في العتبة و يروح أي مول بالظبط! و الا حيهنج و يمكن يوريكي أماكن بعيدة اوي ماينفعش تروحيها و برده ساعتها حتحسي بالعجز والفشل

الخطوة الأولى بتكون فرز محتويات حياتك زي ما بتفرزي دولابك في بداية و نهاية كل سيزونالخطوة التانية انتي عايزة ايه بالظبط

الخطوة التالتة هي الحكم على محتويات حياتك، ايه اللي لازم يفضل علشان يوصلكللي انتي عايزاه و ايه اللي لازم يمشي و ايه اللي لازم يتم استبداله و استبداله بايه بالظبط

الخطوة الرابعة تنمية نفسك، و بالنسبة للكورسات فيه كورسات كتير اونلاين من غير فلوس كتير و فيه من غير فلوس خالص لو مش مشكلة معاكي الشهادة في نهاية الكورس.

واول ما تحددي وجهتك في الحياة ، و ايه اللي عندك و ازاي تستعمليه و تحددي ايه اللي محتاجاه و ازاي توصليله، حتكون حاجات كتير اوي اتغيرت في الدنيا اللي حواليكي و حتلاقي القطر بتاعك وصل للمحطة المناسبة اللي ممكن تنزلي فيها و تحققي اللي نفسك فيه باذن الله

نصيحة مهمة جداً

انتي اخدتي قرار الجواز، يعني فيه شخص تاني في حياتك، و قد يأتي أولاد، يعني اشخاص تانية، و ده برده بيكون قرار انتي خدتيه، كل قرار من دول يعتبر وظيفة جديدة محتاجة شغل و علم و تنمية و تنظيم. بلاش احساسك بعدم الإنجاز في ركن من اركان حياتك يخليكي تهملي باقي اركان حياتك لان ممكن جداً تصحي في يوم ماتلاقيش اللي كنتي مهملاه. و حيكون ساعتها من حقه و من حقهم ربنا يوفقك و حاكون سعيدة لمتابعة مجهودك و نموك و طريقك

Do you want to ask an expert?

Create your own user feedback survey