هي ايه مبادرة خليها في البيت؟

مؤخرا اطلقت “سيدات مصر” مبادرة لتمكين المرأة في سوق العمل باسم “خليها في البيت” ، المبادرة هدفها الأساسي انها تساعد علي ان المرأة تشتغل من أي مكان، و كمان يبقي عندها ساعات عمل مرنة.

الحقيقي ان ستات كتير بتعاني من مشكلة الشغل و ساعات الشغل ، خصوصا ان الأغلبية العظمي مش بيشتغلوا في أماكن قريبة من بيوتهم، و بالتالي الست بتضطر تضيع ما يقرب من ساعتين يوميا عشان تروح و ترجع من شغلها -ودة علي اقل تقدير- دة غير ساعات الشغل الأساسية، و المضايقات اللي بتتعرض لها سواء في المواصلات او الطريق أو حتي في مكان الشغل نفسه،

اللي بستغرب له انه  بعد ازمة كورونا، وقعدة العالم كله في البيت ، وان في شغل كتير اثبتت التجربة ان عمله من البيت فعال جدا و مش بياثر علي الإنتاجية ، و دة حاصل في مجالات كتيرة، الا انه برده لسه في بعض أصحاب الشغل  أو المسئولين نظرتهم ضيقة ومحدودة، و متخيلين انك عشان تنتجي و تحققي المطلوب منك لازم تبقي موجودة في المكتب ٨ ساعات ؟!

افتكر انه مع الاحداث العالمية و التغييرات  الكتيرة اللي عمالة تحصل و الازمة اللي العالم كله عاشها وقت كورونا ، مفاهيم كتيرة لازم تتغير ، و منها عدد ساعات الشغل أو مكان الشغل نفسه، ودة في رأيي بالنسبة للستات و الرجالة علي حد سواء في مجالات معينة،

وطبعا لان الستات هما اللي بيتاثروا اكتر بالقصة دي خصوصا مع وجود أطفال ، أو مجهودها طول الوقت المضاعف في انها توازن بين البيت و الشغل، و بين طموحها و احتياج عيلتها و أولادها ليها ، فالمبادرة دي مهمة جدا جدا في الوقت دة و خصوصا للستات .

يعني في الوقت اللي العالم كله بيقلل أيام الشغل عشان يكون في وقت اكتر للبني ادمين و حياتهم -ودة طبعا في الدول المتقدمة- يبقي اقل حق نطالب بيه هو مرونة ساعات العمل و إمكانية الشغل من البيت ، مادام دة مش بيأثر علي الإنتاجية و لا بيعطل سير العمل !

المرونة و التفهم بيساعدوا كل اللي بيشتغلوا سواء ستات أو رجالة علي انهم كمان مايأثروش في شغلهم، و بيرفع انتمائهم للمكان اللي بيشتغلوا فيه، و بيساعدوهم يبتكروا و يتطوروا و ينتجوا احسن،

 انما التعسف سواء بعدد ساعات عمل معظمه بيضيع في أي كلام، أو تزمت بالوجود في  مكتب و السلام، و  ممكن جدا  الإنتاجية جواه تبقي اقل من براه ، بيخلي الواحد يشتغل بحماس اقل .

مبادرة “خليها في البيت ” مبادرة تستحق انها تتسمع و تتفهم من أصحاب العمل و يبدأوا ينفذوها فعلا ، لانها هتفرق مع ستات كتير محتاجين مرونة اكتر عشان يقدروا ينتجوا و يبدعوا اكتر، من غير ما تتعرض لمضايقات و لا تضييع وقت و لا إحساس بالذنب و تقصير ناحية أولادها و بيتها!

 الابتكار محتاج دعم…. و الإنتاج محتاج مرونة!

ساعدها تبتكر و تنتج من مكانها ، دعمها و خليها تشتغل من البيت 

خليها في البيت !