الذ ٥ اكلات في الجو اللي بدأ يسقع دة

في الجو اللذيذ دة اللي بدأ يدخلنا في مود الشتا و الدفا، في اكلات  لا غني عنهم عشان يدونا الإحساس الكامل بالمود دة و بيدفوا و يدونا كمان طاقة 

اول حاجة : البطاطا

من الذ الذ الاكلات اللي ممكن تتاكل في الوقت دة، و الله بقي لو مشوية او احلي و احلي لو معمولة صينية بالسمنة و اللبن و المكسرات

تاني حاجة : قرع العسل 

طبعا موسم الهالويين و قرع العسل الخطير ، و بيعتبر من الذ الاكلات خصوصا قرع العسل اللي بالبشاميل ، حاجة كدة مفيش منها اتنين

تالت حاجة : شربة العدس 

برد و شتا.. يعني شربة عدس …معروفة… من الذ الاكلات و اكترهم بيدفي و الله بقي لو معمولة علي ماسورة و بالجزر و البطاطس بتبقي حكاية و جنبها شوية عيش محمص

رابع حاجة : حمص الشام

التمشية بالليل علي النيل ، او القعدة قدام التليفزيون في الليل الساقع مع كوباية حمص الشام مشطشطة و مليانة ليمون بالدنيا و اللي فيها 

خامس حاجة : البليلة باللبن 

فطار البليلة باللبن دة متعرفوش الأجيال الحالية ، مع انه من الذ أنواع الفطار و العشا خصوصا لو عليه معلقة عسل اسود او ابيض بتبقي تجنن 

لسعة الهوا الساقعة دي عايزة دفا ، و الاكل الحلو مافيش اكتر منه يدفي ، استمتعوا بالاكلات الشتوية اللذيذة و كل دخلة شتا و انتوا طيبين !