هناكل ايه انهاردة الجزء التاني

زي ما اتفقنا معاكم كل أسبوع هننزلكم وصفات اكل حلوة تديكم شوية أفكار للسؤال اللولبي “هناكل ايه انهاردة؟”

خلينا ندخل علطول علي الوصفات :

اول وصفة ، كفتة الحاتي بكل تكاتها و اسرارها

  Recipe by Noni’s kitchen 

١-نصف كيلو لحمة مفرومة

٢-بصلة كبيرة مبشورة و متصفية من مايتها(هنستخدمها بعدين مهمة اوي)

٣-معلقتين كبار بقسماط 

٤- ربع كوب بقدونس  

١/معلقة ص بيكنج بودر  مبتأثرش علي الطعم و لكن بتخليها هشة و مش مكتومة  ٥-نص

٦-حنضيف ملح ،فلفل اسمر، رشة ثوم بودر 

٧-نعجن كل المكونات سوا كويس ونسيبها ترتاح ١٠ دقائق 

٨-مياة البصل حضيف لها نصف معلقة صلصة و معلقة ص زيت (بستخدمها و انا بصبع الكفتة و بدهن بيها الكفتة اثناء السوا عشان متنشفش الصلصة بتديها لون حلو) 

٩-حبدأ اصبع الكفتة و اغمس ايدي في ماية البصل 

١٠-حسيب الكفتة في الفريزر علي الاقل نصف ساعة في الفريزر قبل الشوي تمسك نفسها 

١١-ممكن اسويها علي الجريل او في الفرن علي ١٨٠ لمدة تلت ساعة تقريبا (اسيبها تاخد لون و اقلبها بعدين)او شوي علي الفحم(بقلبها علي كل الاتجاهات عشان متفكش مننا)

١٢-لما تاخد لون و اقلبها الجهة التانية ادهنها ب مياة البصل عشان احافظ انها تكون طرية و چوسي و متنشفش مننا

اوعدكوا هتاكلوا احلي كفتة ممكن تجربوها و تشرفكوا قدام ضيوفكوا 

و ممكن تشوفوا الوصفة من هنا

https://www.instagram.com/reel/CcadKy2grtC/?igshid=NjY2NjE5MzQ=

 

الوصفة التانية ، كبسه بالفراخ 

 Recipe by Easy recipes egy

المقادير :

١-فراخ متقطعه 

٢-توابل الفراخ ( ملح – فلفل اسود – ورق لوري – قرفه عيدان – ليمون مجفف – كركم – كسبره ناشفه – حبهان – كمون – قرنفل) 

٣-صلصه طماطم 

٤-طماطم مبشوره 

٥-بصل مبشور

٦-سمنه 

٧-زيت 

٨-أرز بسمتي 

٩-توابل الأرز ( ملح – قرنفل – قرفه عيدان – مستكه – حبهان – ورق لوري – كركم) 

١٠-زبيب  أختياري

الطريقة:

– في حله علي النار هنضيف السمنه و نشوح فيها البصل لحد ما ياخد لون دهبي بسيط، هنضيف قطع الفراخ و نشوحها و بعد كده هنضيف صلصه الطماطم و الطماطم المبشوره و توابل الفراخ و نضيف مياه و نغطي الحله علي نار هاديه و نسيب الفراخ تستوي و أول ما الفراخ تستوي هنطلعها و ندهنها بخليط زيت و عليه كركم و ندخلها الفرن تحت الشوايه لحد ما تاخد لون دهبي و كده الفراخ بقت جاهزه.

– نعمل بقي الأرز في حله علي النار هنضيف مياه و عليها توابل الأرز و لما المياه تغلي هنضيف الأرز و نزود شويه من شوربه الفراخ بس نصفيها الأول و أول المياه ما تبدأ تتشرب هنوطي النار و نغطي لمده ٢٥ دقيقه و كده الأرز كمان بقي جاهز معانا.

– هنقدم الأرز و نضيف عليه الفراخ و تقدروا تضيفوا اي نوع مكسرات بتحبوه انا ضفت لوز و زبيب و صنوبر و كمان كسبره خضراء و بالهنا و الشفا

و ممكن تشوفوا الوصفة من هنا

https://www.instagram.com/reel/CcSwVOQgBCT/?igshid=NjY2NjE5MzQ=

 

الحلو بقي ، رز باللبن بالدولسي ليتشي 

Recipe by kitchania by esraa

“المقادير”

نص ك رز مصري 

ا لتر لبن 

٢م.ك كريم شانتيه بودر 

٢م.ك قشطة 

٣م.ك نشا مدوبين في ١/٢ كوب لبن 

نص كوب سكر 

طبقة سبونج كيك او اي كيك فانيلا جاهز

علبة حليب مكثف محلي 

اي مكسرات مجروشة

“الطريقة”

– اول حاجة هنبدأ بالحليب المكثف المحلي عشان نعمل الصوص هنشيل الورقة اللي برة عليه و نحطه في حلة فيها مياه فاترة و المياه تكون مغطية العلبة كلها و نحطها علي نار هادية و نسيبه ٤ ساعات (ممكن نعمله في حلة الضغط بياخد ٤٠ دقيقة) و كل ما المياه تقل نزودها تاني لازم تكون مغطياها و هيبقي عندنا احلي صوص توفي او دولسي دي ليتشي 

– “بعد كدة نعمل الرز بلبن “

هنغسل الرز و ننقعه ١٥ دقيقة في ١/٢ كوب مياه

– ننزل بيه في الحلة و نقلبه كويس لحد ما يبدأ يشرب المياه 

– ننزل عليه بلتر اللبن و نفضل نقلب كويس لحد ما يبدأ في الغليان نهدي النار خالص 

– بعد كدة ننزل بالقشطة و الكريم شانتيه و السكر و نقلب كويس 

– ندوب النشا في ١/٢ كوب لبن و ننزل بيهم عليه 

– نغطي عليه بقي لحد ما الرز يستوي

– بعد كدة نصبه في طبق التقديم و نسيبه يبرد خالص في التلاجة لمدة ساعة

– هنحط طبقة من الكيك عليه بعد ما يبرد 

– بعد كدة نحط طبقة من القشطة (قشطة قيمر او قشطة بلدي او لباني) نوزعها كويس علي الكيك 

 اخر حاجة بقي صوص الدولسي دي ليتشي نوزعه عليهم و نرش رشة مكسرات اللي انتوا تحبوها و بس كدة بالف هنا و ممكن تشوفوا الوصفة من هنا

https://www.instagram.com/reel/CcNjyKQg0O8/?igshid=NjY2NjE5MzQ=–

استنوا الأسبوع اللي جاي وصفات جديدة لهناكل ايه انهاردة؟

و بالهنا و الشفا