خمس حاجات بتفكرنا بالتسعينات

طبعا الجيل العظيم مواليد التمانينات و اللي طفولتهم كانت في التسعينات في حاجات كتيرة جدا بمجرد ما بنسمعها او بنشوفها بتاخدنا في حنين لطفولتنا و تقريبا محدش من أبناء الجيل دة مش هتلاقيه مرتبط بيهم و بتفكره بوقت او مكان او ذكريات صعب اوي تتنسي ،

تعالوا نفتكر كدة مع بعض :

اول: حاجة شرايط الفيديو 

مين في مننا في الفترة دي ماكنش اكتر حاجة جامدة بيعملها هي انه يبقي عنده فيديو و يطلع كارنيه الاشتراك في نادي الفيديو، و اول ما تاخده تحس نفسك شخص مهم جدا و كانك طلعت بطاقة و لا حاجة 😀  حالة ن البهجة و السعادة فتجيلنا لما دلوقتي نشوف شريط فيديو ، ولا فيديو ، بتسرح بخيالك لأول فيلم شفته علي شريط فيديو و ازاي التكنواوجيا المذهلة في دخول و خروج الشريط

تاني حاجة : إعلانات التسعينات

طبعا محدش يقدر ينسي الإعلانات في الفترة دي و من اشهرها : كوفرتينا علي العريس يبقي هيتجوز و يهيس، و عبد الرحيم عمرو احتكم الامر ، و ام طاقية حمرا، و بستك بستك بستك نو شيكولاتة جيرسي واكلة الجو، ايزالو جالو، سلام عشانه سافو ، و غيرهم كتير 

تالت حاجة: الأغاني و شرايط الكوكتيل

مين يقدر ينسي كل البنات بتحبك كل البنات حلوين، طب أغاني سيمون و حميد الشاعري و علي حميده و غيرهم ، طبعا اللي كان بيشتري شريط ماستر كان بيبقي موضوع و الجامد اوي اللي كان عنده في البيت ستريو و بيعمل شرايط كوكتيل ، دة غير طبعا شرايط الكوكتيل زي تاكسي السهرة و غيرها 

رابع حاجة : البرامج 

البرامج للفترة دي كلنا تقريبا عارفينها زي تاكسي السهرة ، بقلظ و ماما نجوي، عروستي، سينما الأطفال، عالم الحيوان، سر الأرض ،كلام من دهب ، و غيرهم

خامس حاجة : الألعاب 

طبعا الأشهر و الأهم كانت الاتاري ، كمان كان في بنك الحظ و اللعب بالبلي ، و لعبة صيد السمك 

جيلنا كان محظوظ جدا بحاجات كتير حلوة كل ما بنشوفها او نفتكرها بياخدنا حنين لأحلي أيام حياتنا!