خمس علامات تقولك إنك أتربيتي محاطة بالخرس العاطفي

كتير مننا صعب أوي عليهم إنهم يعبروا عن مشاعرهم ، يقولوا اللي حاسينه بجد من غير ما يحسوا إنهم مكسوفين ، أو من غير ما يحسوا إنهم في موقف ضعف و هما بيقولوا اللي حاسينه، و دول غالبا بيبقوا أتربوا في بيت أو عيلة مليانة خرس عاطفي ، اللي أهم خمس علامات ليه هما :

أولا: صعوبة التعبير عن أحساسك بالحب

بيبقي صعب عليكي أوي تقولي لحد إنك بتحبيه ، و لما الكلمة بتتقالك بتبقي مش عارفة الرد المناسب، حتي لو كان دة مع أقرب الناس ليكي ، يعني في أمهات لما ولادهم بيقولوا لهم إنهم بيحبوهم ، تلاقيها بترد علي  حاجة تانية أو بتغلوش علي الكلمة و تغير الموضوع، بدل ما تقول لهم أنا كمان بحبكم و تاخدهم في حضنها.

ثانيا: أحساسك بالاستغراب لما بتتحضني

اللي أتربيت في بيت في خرس عاطفي عادة بتحس بإن الحضن دة حاجة غريبة ، حاجة مش متعودة عليها، و بيبقي صعب شويتين إنك تلاقيها بتسلم علي اللي حواليها بحرارة و تحضنهم حتي لو واحشينها ، لما بتتحضن تحس كدة إنها بتتسمر مكانها، بتقلب تمثال مش عارفة تتصرف إزاي ، عارفين زي إيه ؟ زي بالظبط أمينة خليل في مسلسل ” خللي بالك من زيزي” لما قعدت تشتكي لمحمد ممدوح إن أمها كانت قاسية معاها هي و ابوها و عمرهم ما حضنوها ، حتي و هي في أشد الحاجة للحضن دة، وقتها لما نزل من العربية و حضنها أتسمرت مكانها ، ماكنتش فاهمة أحساس الحضن و مستغرباه ،مبسوطة بيه بس مستغرباه، هو دة بالظبط اللي بيحصل مع اللي عانت في بيتها و تربيتها من الخرس العاطفي.

تالت حاجة: سيندروم وأنا كمان 

اللي بيبقوا أتربوا في خرس عاطفي ، عادة بيبقي ردهم علي أي حاجة ليها علاقة بالمشاعر أو الأحاسيس ، وأنا كمان ، 

يعني تقولها وحشتيني ، تقولك و أنا كمان ، صعب أوي من نفسها هي اللي تقول لحد وحشتني،

 تقولها بحبك آوي تقولك بعد تردد و أنا كمان، دة  إن ما قالتلكيش ميرسي والله ربنا يخليكي.

رابع حاجة: مش بترمي طوب ، لأ دي زبالة بصوت أشرف عبد الباقي!

عادة اللي أتربوا في خرس عاطفي بيبقي ردهم علي أي مجاملات ناشف جدا، و أوقات قاسي بشكل يخض ، وخصوصا لو مع ناس علاقتهم بيهم طفيفة، يعني لو ناس تعرفهم أو أصحابها قريبين و لا حاجة بيبقي الرد ميرسي، أو شكرا، أو وأنا كمان ، لكن مع اللي علاقتها بيهم خفيفة أول ما بيقولوا لها كلام حلو أو مجاملة، بتتكسف جدا و بتحس إنها مش مرتاحة ، فتقوم راميالها طوبة بدل ما تعرف ترد علي المجاملة من غير توتر، زي بالظبط “حنان ترك” في فيلم “حب البنات” .

خامس حاجة: صعوبة الأحساس بالأمان

لما ما بتكونيش متربية علي أحاسيس حلوة وواضحة و عالية من عيلتك من وأنتي صغيرة، بتبقي ديما عندك إحساس بأنعدام الأمان ، و بتبقي ديما محتاجة ضمانات كتير و اثباتات كتير من اللي حواليكي إنهم بيحبوكي ، ديما عايزة تتاكدي، لإنك ببساطة معشتيش الأحساس بالأمان و الشبع من الحب من أقرب الناس ليكي ، فديما بتبقي قلقانة ، مش واثقة، محتاجة اثباتات كتير باستمرار و طول الوقت .

الحقيقة إن الخرس العاطفي كان ومازال منتشر في بيوت كتير ، بس لو عشتي في بيت بارد من المشاعر و فيه خرس عاطفي و أنتي أدركتي دة، حاولي بجد إنك تشتغلي علي نفسك فيه، حاولي إنتي تتصالحي مع المشكلة دي و تعالجي نفسك منها، عارفة إنه صعب و يمكن ياخد وقت، 

بس لو أنتي مدركة المشكلة يبقي سهل تحليها و تشتغلي عليها،

قولي للي بتحبيهم إنك بتحبيهم من غير ما تتكسفي أو تخافي،

أطلبي حضن من اللي بيحبوكي لما تحتاجيه، و استمتعي بوجود ناس بتحبك و تقدر تحسسك بالحب دة،

قولي لأولادك طول الوقت إنك بتحبيهم، و عرفيهم إن كلمة أنا بحبك مش ضعف و لا حاجة نتكسف منها،

علمي ولادك إن حضنك علطول موجود ليهم، و عوضي فيهم اللي معشتيهوش،

كتير مننا عدي بمشاكل من وأحنا صغيرين و من أهمها الخرس العاطفي ، بس بمجرد ما بنواجه و نعترف بالمشاكل دي، بيبقي أسهل  أننا نحلها أو نعديها،

ماتخليش اللي عشتيه يبوظ اللي لسه هتعيشيه!

أختاري تحبي نفسك وماتبقيش خارسة معاها !