في السفر سبع فوايد و عليه أقساط

مين فينا مابيحبش السفر ؟ مين فينا كل ما يتخنق او الدنيا تضيق عليه مابيفككرش يسافر ؟ طب مين فينا لما طاقته بتخلص اول فكرة بيفكر فيها هي السفر عشان يشحن طاقته من جديد ؟

الحقيقة ان السفر من اهم و الذ الحاجات اللي بتعتبر عن بعض الناس هدف حقيقي في ذاته، يعني تلاقيهم بيتعبوا و بيشتغلوا طول السنة في انتظار سفرية آخر السنة او سفرية الاجازة . 

ولان المقولة المشهورة ان للسفر سبع فوايد ، فاحنا من موقعنا هذا بنؤكد ان السفر ليه فوايد اكتر من السبعة دول بكتير ، يعني علي سبيل المثال :

١-فرصة قوية للاسترخاء، ناس كتير بتسافر بشكل أساسي عشان تأنتخ و تهدي من رتم الحياة شوية ، و يا سلام بقي لو كان في السفرية دي بحر، تبقي حاجة ممتازة و في الجوون!

٢-بنشوف ثقافات مختلفة ، يعني سواء السفر جوة مصر او برة مصر فانتي بتتعرفي علي ثقافات جديدة عليكي ، يعني لو سافرتي سيوة مثلا أو النوبة أو الصعيد أو حتي الأرياف ، كل حاجة منهم ليها ثقافة جديدة و مختلفة عليكي ، و دي حاجة بتزود ثقافتك و قدرتك علي التعامل مع اشخاص مختلفين.

٣-بننضف عينينا ، مع وجودنا طول الوقت في الشغل و في الطريق و في وسط المدينة، بيبقي نادرا لما بنشوف مناظر طبيعية ، او طبيعة ساحرة زي ما بيقولوا ، و بالتالي فالسفر فرصة عشان نشوف الطبيعة و جمالها و ننضف عينينا من الزحمة 

٤-بنتعلم لغات جديدة ، سواء جوة مصر فبنتعلم لهجات جديدة ، او برة مصر فبنتعلم لغات جديدة 

٥-الإحساس بالحرية، بمجرد ما بنطلع علي طريق السفر بيجيلك إحساس كدة بالحرية و الانطلاق مايتعوض

٦-بنعمل مغامرات جديدة ، السفر ديما بيكون فرصة نعمل حاجات مش تقليدية و حاجات مش متعودين نعملها في حياتنا العادية

٧-بنشوف مزارات تاريخية و ثقافية ، و دة للناس اللي بتحب الفن او التاريخ ، فبتلاقيهم بيستمتعوا جدا بفكرة السفر لاماكن فيها تاريخ او ثقافة مختلفة 

٨-بتتعلمي تعتمدي علي نفسك، السفر بيكون فرصة قوية جدا انك تعتمدي علي نفسك و تشوفي هتتعاملي ازاي و هتتصرفي ازاي في مواقف مختلفة.

٩-بتتعلمي تختاري تسافري مع مين ، ودة لان  من اهم الحاجات في السفر هو مين هيسافر معاكي، و مع الوقت بيكون عندك خبرة تسافري مع مين و ماتسافريش مع مين .

طبعا كل المميزات العظيمة دي و اكتر عن السفر ممكن نقعد نكتب فيها من هنا لبكرة الصبح، بس الحقيقة انه مع الأوضاع الاقتصادية سواء في مصر او في العالم كله ، فكرة المتنفس الوحيد لناس كتيرة و هو السفر بقي عبء او مشروع محتاجين نحوش له ، الأسعار عليت جدا و بشكل غريب سواء داخليا او خارجيا ، لدرجة اننا بقينا بنشوف معظم شركات السفر بتعلن عن السفرية و جنبها تمنها بالتقسيط !

فبدل ما كان السفر فرصة نشحن طاقتنا و نفصل و نتبسط ، بس لازم يتعمل له خطة مسبقة او افضل ادفع في أقساط السفرية لسنة جاية قدام ، فبدل ما يبقي السفر علاج نفسي لينا كلنا ، بقي عبء مادي فظيع بيجيب لنا اكتئاب !

اتمني ان كل المسئولين عن السفر و السياحة سواء داخليا او خارجيا يفهموا ان السفر دة مش رفاهية ، و انما هو حاجة أساسية للبشر انهم من وقت للتاني يستمتعوا بالطبيعة اللي ربنا خالقها لهم، و يقدروا يستمتعوا من غير ضغوط مادية، اتمني ان أسعار السفر ترجع تبقي في المعقول ، لانه متنفس حقيقي لينا كلنا ، و لان للسفر فوايد الدنيا كلها مش سبعة بس، فاحنا عايزين نسافر من غير  أقساط و هس هس !