ليه” الليلة و اللي فيها “مسلسل مهم و صادم و حقيقي في نفس الوقت ؟

من شهر تقريبا نزلت اولي حلقات مسلسل “الليلة واللي فيها” ، المسلسل من اعمال شاهد الاصلية و اللي بيتكون من ٦ حلقات 

المسلسل من اول ما نزل و عمل ضجة كبيرة جدا من اول حلقة، و دة يمكن لأنه مسلسل بيتكلم في قضية تقريبا اول مرة تتناقش في الدراما المصرية بالطريقة دي و بالتشويق و الاحترافية دي ومن غير ابتذال ، 

قضية التروما النفسية اللي ممكن تأثر علي الاهتمامات الجنسية لأي شخص فينا ، المسلسل من اول دقيقة لأخر دقيقة بيقعدك علي اعصابك! حالة قوية من الترقب للأحداث، و تبقي ما بين انك متعاطف مع الشخصية الأساسية و ما بين انك مصدوم من اللي بيحصل !

المسلسل بشكل بسيط بيتكلم عن بنت اتربت مع ام كان اهتمامها الأول بجوزها مش بنتها، و اللي آثر علي نفسية بنتها بكم كبير من الغضب و الوجع و الألم اللي بقت بتترجمه في علاقة جنسية مضطربة مع السواق بتاعها، و اللي كانت بتستمع فيها بالعنف منه و اللي هي طلبته منه من البداية، كأنها بتعاقب نفسها أو بتحب تتعامل بعنف زي ما كان نفسها تعبر عن مشاعرها لتجاهل أمها ليها، المسلسل باخدنا فر رحلة مع بطلته اللي حياتها تبدو مستقرة و ناجحة مع جوزها و أولادها ، لكن لو بصيت جوة شوية هتلاقي ان كل حاجة في حياتها مضطربة، من ماضي مقدرتش تنساه، لانعدام سعادتها الجنسية مع جوزها ، لعقدها من الطفولة ، وكل دة بتحاول تعالجه بزيارتها لعيادة نفسية، و الاحداث بتاخدك من الحالي للفلاش بالك و بتحصل اكتر من جريمة المحرك الأساسي ليهم كلهم هي البطلة، اللي ديما بيتم دفعها للجريمة و هي أصلا مابتبقاش عايزة تعملها ، فتبقي متلغبط بمرور الاحداث ما بين انها صعبانة عليك من اللي حصل لها و اللي حسيته و لسه بتحسه و انها بتحاول تبقي احسن ، لطريقة معالجتها للمشاكل اللي بتوقعها في مصايب اكبر كل مرة!

المسلسل اللي من بطولة:

زينة

محمد شاهين

سماح أنور

أبو يوسف 

علاء مرسي

آلاء سنان

و من تاليف: محمد رجاء 

وإخراج المبدع : هاني خليفة

قوة إيقاع المسلسل و الجو اللي بيعيشك فيه و هو بيناقش قضية حساسة جدا جدا بشكل مشوق جدا و من غير أي ابتذال و يخليك كل حلقة مستني اللي بعدها، أسلوب هاني خليفة اللي ديما بصمته واضحة في أي عمل بيخرجه، طبعا الاسكريبت الحلو و القوي بيفرض نفسه، التويستات اللي كانت بتعملها و تقولها البطلة في كل موقف عشان ما تتكشفش ، الابعاد النفسية للشخصية و ازاي زينة ترجمتها بتمثيل قوي و بيقول اد ايه نضجت، كلها لوحة فنية قوية و جريئة و تستحق الإشادة، ظهور سماح أنور بالقوة دي و بعد فترة الغياب دي عَلي المسلسل و اداله طعم الاكلة الحلوة المستوية بروقان، كل عناصر المسلسل كانت موفقة،

قوة محمد شاهين و ردود فعله ، هدوء آلاء سنان و ثباتها في كل المشاهد اللي طلعت فيها ، الحقيقة ان المسلسل ممتع اقصي درجات الامتاع الفني و البصري، جنب الامتاع و قدرته علي انه يثير جوانا فهم لحاجات ممكن جدا تبقي بتحصل لنا او لناس نعرفهم و مش قادرين نفهم سببها او نستوعبها، فتح عنينا بشكل مش مبتذل ابدا و في اطار درامي قوي، 

الملخص ان المسلسل وجبة لذيذة و دسمة و قوية جدا لفكرنا و عقلنا  و حسنا الفني و عينينا !

ارشح بقوة انكم تستمتعوا بعمل فني قوي و ممتع و مثير للفكر زي مسلسل “الليلة واللي فيها”.