شواطئ خاصة في الساحل الشمالي لمصيف مختلف من نوعه

موسم الساحل الشمالي خلاص بدأ ومعظم الناس سواء اللي يملك شاليه أو بيأجر، بيروحوا يقضوا الويك إند هناك أو ياخدوا إسبوع أو عشر أيام يفصلوا من زحمة الروتين اليومي ويستمتعوا ببحر الساحل ونسمة الهوا اللي مفيش زيها في مكان تاني. 

ولأن مش كل الشاليهات هناك بتبقى الشواطئ بتاعتها مجهزة بالخدمات الكامله للعيله كلها، جمعنالك هنا أربع شواطئ خاصة في الساحل الشمالي تقدري تروحي من أول النهار إنتي وعيلتك وتقضوا اليوم كله في البحر وتاكلو أكله حلو وتنبسطوا بالأنشطة المختلفة.

Karl Beach Club–1

شاطئ كارل هو مكان جديد في الساحل الشمالي الصيف ده ومناسب جدأ لكل أفراد العيله إنهم يقضوا أمتع الأوقات من الصبح لبليل. هدوء البحر هناك – واللي مش من طبع مياة الساحل عامة – واحد من مغريات المكان لأنك هتستمتعي بوقت لذيذ في المياه الصافية الزرقاء الجميله بتاعة الساحل.

 المكان بردوا علطول في حفلات وبرامج ترفيهية لكل الموجودين، وغير منطقة الشاطئ فيه كمان حمام سباحة كبيرو ومطعم بيقدم المشروبات الفريش المنعشة وأطباق كتير متنوعة ومشبعة.

Kiki’s Beach Bar–2 

في هاسيندا وايت هتلاقي شاطئ كيكي، إللي بقدملك تجربة مصيف مختلفة من نوعها. المطعم هناك عنده أطباق خمس نجوم وهتاكلي هناك أكل فعلا أكنك في أفخم المطاعم.

 والطابع البوهيمي للشاطئ كله في الديكور هيديكي إحساس أكنك في شاطئ عالمي والحفلات هناك فيها أشهر النجوم والمغنيين اللي بتبدأ حفلاتهم من الصبح لحد بليل في أجواء صيفية وعلى أنوار القمر وبطابع 80 شويه فا تأكدي إن أجواء الصيف والساحل هناك هتخليكي مش عايزه تروحي.

Barbarossa Beach Club Masyaf–3

جيم عل البحر! شاطئ بارباروسا عنده جيم كامل مجهز بأحدث الأجهزة بفيو مباشر على البحر.

 إللى بتحب الرياضة ومحافظة على الحركة الدائمه هتتبسط في الشاطئ ده لأنه فيه كل حاجه حرفيًا ده بجانب حصص التمارين الرياضية اللي بتتعمل مع أمهر المدربين على الشاطئ علطول، الشماسي على البحر على شكل نخل والقعدات هناك شبه شواطئ أوروبا الجميله. ولو قررتي تكملي لحد بليل هتقضي وقت حلو مع الحفلات ومزيكا لذيذه تغيرلك الموود وتخلي يومك مليان طاقة.

فكرة الشواطئ الخاصة لذيذه أوي في المصايف لأنها بقت ماشية مع مفهوم العصر الجديد إن المصيف مش بس بحر.

 الناس أغلبها عايزه تروح تقضي على البحر وقت مختلف من أول يوم لأخره مش بس أنزل البحر وأطلع أفعد على الشط وأرجع البحر تاني وتلاقي نفسك تاني يوم زهقتي من روتين المصيف المتكرر. جربي الشواطئ ديه وقوليلنا رأيك إيه؟