١٠أماكن للسحور مميزه هتعيشك تجربه رمضانيه مختلفه من نوعها

رمضان خلاص على الأبواب – كل سنه وإنتو طيبين – وأكيد كلنا بنحضر نفسنا لعزايم الفطار ولمة السحور، عشان رمضان مرهق في التفكير والتحضير لأكلات جديده ومبتكره كل يوم، 

خلي الفطار عليكي والسحور علينا!

جمعنالك هنا 10 أماكن أحلى من بعض وبيقدموا سحور جديد ومختلف وهينسيكي تعب ووقفة المطبخ في تحضير الفطار.

١-طبالي

https://www.facebook.com/tabali.bistro/photos/29480519287618231 

من الأماكن اللي نجحت إنها تجذب الناس ليها هو طبالي! من أول فرع  في الكوربه لمطعم طبالي، ولحد أخر فرع ليه، والمطعم قدر إنه يحافظ على أدائه وطعمه ،

 منتجات طبالي من فول وجبنه بالطماطم وبصارة وغيرها بقت بتتباع في السوبرماركت، فا تقدري بكل سهوله تعملي سحور طبالي في البيت، بس أكيد السحور في المطعم نفسه مع طبق البيض بالبسطرمه والبطاطس المحمره الوهمية بتاعته وفي أجواء رمضانية مبهجة هيكون ليه طعم تاني.

2- عيش وجبنة

https://www.facebook.com/eishwgebna/photos/599610393768349

عشاق الجبنه يجمعوا هنا عشان مطعم عيش وجبنه هيدلعك على السحور بأصناف كتيره لذيذه والجبنه السايحه هي عنوان كل أطباقه،

 طاسات البيض بالجبنه والفول والبطاطس المحمرة والتغميسات المختلفه من الحمص والجبنه بالبسطرمه مع العيش الطازه والسخن هتخليكي عندك طاقه عشان تستقبلي يوم صيام جديد وإنتي كلك نشاط وحيوية.

3- تغميسة

https://www.facebook.com/taghmisa/photos/2534617943479042

حفلة سحور هي اللي هيوعدك بيها مطعم تغميسه! سكان التجمع والقاهرة الجديدة عارفين المكان ده وحتى سكان الجيزه يعرفوه من كتر ما الناس إتكلمت عنه وعن حلاوة قاعدته في الهوا الطلق وسحوره اللي يجنن العقل. أول مره أدوق الطعميه المحشيه جبنه كيري كان عند تغميسه وبجد طعمها من ورا الخيال.

٤-دسوقي اند صودا

https://www.facebook.com/desokyandsoda/photos/16343085167427594

الأطباق الشرقيه التقليدية بس مع تويست مودي الطعم في مكان تاني خالص هو أكتر ما يميز مطعم دسوقي أند صودا، إٍستمتعي بسحور بطعم الشارع المصري وفيه فن في الصنعه زي طبق الفول المبتكر بالكريمه والثوم واللي طعمه تحفه بس في مكان شيك ومريح ليكي وللعيله كلها.

٥-حلاوة و زعتر 

https://www.facebook.com/Halawawzataar/photos/28296268340248715

بإطلاله بانوراميه على نهر النيل، مطعم حلاوة وزعتر في نايل لاونج بيقدملك نوعين من وجبات السحور في رمضان واللي مليانين بإختيارات متنوعه من الفول والبيض والجبنه بطرق فيها إختراع لذيذ،

 تأكدي إن سحورك هناك وقدامك النيل وسط أجواء رمضانية مميزه من مزيكا وديكورات هتخلي رمضانك السنه دي مختلف.

6- زوبا

https://www.facebook.com/ZoobaEats/photos/1923220987777392

مطعم زوبا من أول ما تدخليه والألوان وستايل الديكور هناك بيحي فيكي شعور غريب فيه ميكس من الحنين للماضي والتراث الشعبي،

 أنا جربت كل حاجه هناك من فول وطعميه وبيض وجبنه بالطماطم وبيض بالبسطرمه وحقيقي أكله مش بس طعمه محترف لكن كمان حجم الأطباق والساندويتشات يخليكي مش قادرة تفكري في أي أكل لحد تاني يوم.

7- درب شكمبة

https://www.facebook.com/Darbshakamba/photos/2710061605788114

أصل الأكل الشعبي القديم، درب شكمبه من الأماكن اللي هتتبسطي فيها أوي لو قررتي تتسحري هناك. العيش الفينو الرفيع زي بتاع الأفران الشعبيه من الحاجات اللي حقيقي بتخليني مش عايزه أقوم! طعم الفول والطعميه بتاع عربية الفول ده مش هتدوقيه غير في درب شكمبه وعشان تبقي “شكمبيه” على حق ما تقوميش غير وإنتي مخلصه الأطباق كلها لحد أخر لقمة عيش.

٨- صاحب السعادة

https://www.facebook.com/photo/?fbid=10222724301228411&set=pcb.102227243020684328

في وسط الحسين ووسط أجواء رمضانيه أصيله جدًا من الطبله والتنوره والفلكلور الشعبي الجميل، مطعم صاحب السعادة بجوار متحف النسيج هو فعلا التجربة الرمضانيه اللي لازم تجربيها على الأقل مره واحده في العمر،

 روف كبير وسحور كامل متكامل بطعم التراث المصري، مطعم صاحب السعادة حقيقي هيسعد رمضانك كله.

٩-المركب

https://www.facebook.com/Almarkeb/photos/47815011652016669

عيشي أجواء رمضانيه فريده من نوعها مع أقرب الناس ليكي في مركب خاصة وسط النيل، تجربه سحور خاصة جدا بعيد عن زحمة رمضان وتجمعاته، السحور في المركب هو مسك الختام ليوم صيام طويل ومرهق هتنسي فيه كل همومك وهتغيري موود.

١٠- الجدع

https://www.facebook.com/algadaarestaurant/photos/87669626976377210

كتير بيقولوا إن مطعم الجدع رجع الواحد للطعم “الحرش” بتاع الشارع المصري بأطباق السحور المميزة والعيش البلدي السخن والمخبوز عنده، على الرغم من إن المطعم معندوش إبتكارات في أطباق السحور بس الطعم اللي متعودين عليه في بيوت أهالينا وأجدادنا زمان هو اللي أكيد هتحسي بيه وإنتي هناك.

المطاعم ديه كلها بتقدم منيو فطار في رمضان في نفس جودة الطعم وتنوع الأصناف زي منيو السحور، وسواء قررتي تروحي تفطري أو تتسحري في أي من المطاعم المقترحه، تأكدي إنك هتقضي وقت جميل وهتدوقي أكل معمول بحب.