in , , ,

امتي هنبطل نتخانق؟

مفيش علاقه ارتباط مفيهاش خناقات او خلافات ، ده يعتبر شيء اساسي في اي علاقه ومهما بنحاول نتفادي الخناقات او نمشي الدنيا زي ما بيقولوا، بتفضل برده موجوده اذا مكانتش بتزيد،

وفي بعض الاحيان الموضوع بيفضل يزيد جدا لدرجه ان محدش بيكون طايق للتاني كلمه ولا طايق يبص في وشه وبتفضل الفجوه تزيد لحد ما بيكون صعب محاوله اصلاحها وغالبا بيحصل الانفصال في الحالات دي،

عشان كده في حالات انفصال كتير لو سالتهم عن الاسباب مش هيقولوا سبب واحد جوهري ، بس هيقولوا مكناش متفاهمين،

النوع ده من الناس هم اللي عندهم مشكله في التواصل واللي في النهايه وصلتهم للمرحله دي،

وعشان كده مهم جدا اننا نعرف ازاي نتعامل وقت الخلافات عشان الموضوع ما يكبرش ويوصل للانفصال او يوصل لمرحله صعب اصلاحها.

 

خلونا نتفق ان الخلافات هتحصل هتحصل ، مهما حاولنا نتفاداها ، فا ممكن نتفادي شويه بس الاكيد ان مش هانتفادها كلها

طيب ليه اصلا بتحصل الخلافات ؟

الخلافات بتحصل عشان سببين:

١- ان عندي احتياج معين (زي اهتمام ، مساعده ، فلوس ، تواجد ، مشاعر ) او حتي احتياج في ابسط صوره( زي توصيله ، يسال علي اهلي ، يكلمني في التليفون ، نخرج مع بعض ……) والاحتياج ده مش بيلبي حتي لما بطلبه من الطرف فبتقلب خناقه

 

٢- اني عايزه اوقف تصرف معين بيحصل ان يفضل يحصل في المستقبل ( يعني مثلا بيكلمني بطريقه وحشه ، بيتجاهلني مثلا قدام اهله ، بكلمه دائما مش بيرد عليا بسرعه ، علي طول خارج مع صحابه ،……. الامثله كتير) فانا هنا بتخانق عشان في تصرف مش عاجبني وعايزه التصرف ده يوقف

 

طيب ليه مش بنطلع بنتيجة من الخلافات ؟

 

دائما بنلاقي الخلاف بيوصل في الاخر لخناقه اللي بتخلي الموضوع اسوء والسبب في كده :

 

١- طريقه طلبي : غالبا لما بنحاول نطلب حاجه والموضوع متضايقنا بنبدا نهاجم الطرف التاني ، يعني مثلا ( انت علي مش موجود ومش متواجد ، انا طول الوقت لوحدي ، انت مش بتشيل اي مسئوليه ، انت بتفكر في نفسك وبس ومش حاسس باي حد غيرك …..وهكذا(

طبعا الهجوم ده بيترد عليه بهجوم زيه او اشرس او صمت تام وده معناه ان الشخص ده قفل منك تماما

٢- اختيار الوقت المناسب : لما بنختار وقت غلط نطلب في اللي احنا عايزينه غالبا طلبنا بيترفض او مش بيتسمع اصلا وبيفسر برضه علي انه هجوم وبيقابل بهجوم مضاد

٣- الوضوح في الطلب : غالبا لما بنجي نطلب احتياج معين زي مثلا اني لما اكلمك ترد عليا او تبعتلي msg ، حاجه زي دي ممكن نكون بنتكسف نطلبها زي ما هي ، فابنبدا نقول انه مفيش اهتمام ومفيش احترام وفي تجاهل وهكذا … المخ للاسف مش بيفهم الطريقه دي في التعامل و مش فاهم انتي عايزه ايه وبيفسر ده انه هجوم برده ومش بعمل اي حاجه من اللي انتي عايزاها

طيب ايه الحل و ازاي نتعامل مع الخلافات اللي بتحصل ؟

١- لازم يكون في وضوح شديد في الطلب ، يعني مثلا محتاجه انك ما تهزرش معايا هزار تقيل قدام اهلك لما نكون عندهم وتحكي موقف محدد حصل فيه المشكله دي ( تبقي محدده جدا لان المخ مش بينفذ غير الاوامر المحدده ، غير كده هتفضلي تتكلمي وهو مش هينفذ وهتكرر الخناقات وهتقولي انا طلبت كتير ومفيش فايده

انتي طلبتي بالطريقه الغلط خدي بالك!!

٢- اختاري الوقت المناسب اللي الطرف التاني يكون قابل انه يسمع ويتكلم ، ميكونش متنرفز ولا stressed عشان يقدر يسمعك ، تخيلي كده نفسك مضغوطه من كذا حاجه وجه جوزك يقولك انتي مش بتردي عليا في التليفون ليه مثلا ، هتنفجري في وشه دي اقل حاجه هتحصل والعكس صحيح

٣- اطلبي اللي انتي محتاجاه من غير لوم وعتاب ، كانه شخص جديد بتتعرفي عليه ، اللوم والعتاب بيقطع كل التواصل وبالعكس بيخلي الناس تقفل من بعض وتتراكم المشاعر السلبيه ناحيه الطرف التاني ، يعني من الاخر بيشيل منك ومع الوقت لو الموضوع ده متكرر هيكون بتفادي ان يقضي معاكي وقت طويل او بيتفادي الكلام معاكي ويتجنبك

عشان كده اطلبي اللي انت عايزه بس من غير لوم وعتاب

٤- خلي في وقت ليكوا يتكلموا في حاجات بتحبوها ، حاجات ايجابيه مش كل الكلام يبقي علي طلبات او مشاكل ، ممكن تكلموا حتي علي مسلسل عاجبكوا ، مهم اوي الموضوع ده

٥- اختاري معارك مش كل حاجه نتخانق عليها ، في حاجات ممكن نفوتها في مقابل الحفاظ علي سلامنا النفسي

٦- متطلبش حاجه وانتي شخصيا متعصبه او متنرفزه لان ده بنسبه ٩٥٪؜ هتقلب خناقه ، استني لما تهدي وبعدين افتحي الموضوع

٧ – في حاجات مش بتتغير محتاجه ابقي صريحه مع نفسي و اقلبها زي ما هي ، زي مثلا لو حد بخيل هو مش هيتغير ، محتاجه اعرف كويس ان دي صفه مش بتتغير ، زي مثلا الدين طريقته في التفكير في الدين متشدد مثلا دي حاجه مش هتتغير ، علاقته باهله واهميه دي عنده … وهكذا

 

عشان كده بتقول اه مش هنقدر نتلافي كل الخلافات بس لو علي الاقل عددها قل وحدتها قلت احنا برده اللي كسابنين

 

 

وعلي راي المقولة الشهيرة

If I make you angry , I am making my life difficult

ASma Shehab

Relationship coach & Neuro-Semantics Trainer

What do you think?

Written by Editor

Comments

Leave a Reply

Your email address will not be published. Required fields are marked *

Loading…

0

Comments

0 comments

ازاي نقدر نتعامل مع انتشار فكرة و مفهوم و دعم المثلية كأهالي

ازاي تختاري شريك حياتك من٥ حاجات