بس احنا أصحاب بسسسس

في حد في حياتك و بتتعاملوا كأنكم في علاقة في كل التفاصيل بس بتقولوا لبعض و للي حواليكم ” احنا أصحاب بسسس!”

هتقولي لي ازاي مش فاهمة؟! 

اقولك….

-يعني بتتكلموا كل يوم

-ال morning message  أساسية

-بيكلمك اول ما ينزل أو انتي بتكلميه اول ما تنزلي

-بتتكلموا في الطريق

-بيفضل معاكي علي التليفون او مسدجات كل يوم لحد ما ينااام

-بتخرجوا مع بعض كتيير

-بتجربوا أماكن جديدة مع بعض / اكلات جديدة مع بعض/ أفلام جديدة مع بعض

-بتصوروا لبعض كل حاجة و تشاركوها مع بعض، يعني اكل / لبس/ بحر / سفر 

-مكالمة بالليل بتبقي عملت ايه في يومك و عملتي ايه في يومك

-لما بيكون في حاجة مهمة عايزة تاخدي فيها قرار بتكلميه اول حد و هو كمان بيعمل كدة معاكي

-لما بيبقي زعلان او بتبقي زعلانة بتفكوا لما بتتكلموا او بتكونوا مع بعض

بس احنا اصحاااااب بسسسسسس!

طيب ما تيجوا نفكر كدة ، ليه حد بتشاركيه او بيشاركك كل حاجة في حياته بالشكل دة و مع ذلك ممكن جدا تلاقيه بياكدلك او انتي بتاكديله انكم اصحاااب بس؟!

انه الخوووف من الارتباط!

طبعا  الخوف من الارتباط دة بيرتبط بحاجات تانية  من الطرفين،  زي :

-بيبقي في نسبة لا بأس بها من الاستعباط عند بعض الولاد  أو البنات و بيبقي بيسلي وقته و خلاص بلا هدف، و هوووب تلاقيه بيعزمك علي خطوبته أو العكس ، و محدش يقدر يعترض ما احنا كنا أصحاب بسسس!

-بيبقي عنده أو عندها وحدة قاتلة، و من كتر الخوف من الوحدة و الخوف من الارتباط ، بنضرب الاتنين في الخلاط و نقرب من حد نشاركه كل حاجة بس من غير أي التزام بوجود علاقة و لا مشاعر و لا غيره ، و في الحالة دي مابيبقاش في مشاركة للتفاصيل الشخصية اوووي ، بتبقي اه علاقة ٢٤/٧ بس من غير أي تفاصيل شخصية لان النوع دة أصلا مابيثقش في حد ، بس خايف من الوحدة فبيوجد بديل عشان يعدي الوقت بس!

– خارج أو خارجة من علاقة صعبة جدااا و بيدور علي مساحة امان و شخص يحسسه باهميته ووجوده و انه لسه مرغوب ، بس في نفس الوقت في رعب من فكرة الخازوق التاني، أو من فكرة انه يسمي الحاجات باسمها الحقيقي، بيبقي في رعب من فكرة انه يتحط او يدخل علاقة تانية، و بالتالي بياكد جدا لنفسه أولاً حتي قبل الطرف اللي معاه ، انهم اصحاااب بس!

طب السؤال بقي، لو انتي في علاقة كدة تعملي ايه ؟

الحقيقة انه مسالة الخوف من الارتباط دي بقت منتشرة كالنار في الهشيم ، اما بسبب علاقات سابقة او بسبب اللي بنشوفه و بنسمعه حوالينا ، او بسبب اللي كتير شافوه في علاقات اهاليهم مع بعض و كمية الطلاق و الانفصال !

بس لو انتي في علاقة زي دي حاولي علي اد ما تقدري تبقي واعية و ماتسيبش نفسك، و الأفضل تقللي في العلاقة دي علي اد ما تقدري و تنهي شكلها دة لعدة أسباب :

-التعود ، لما شخص بيبقي جزء مهم من روتين يومك ، شئتي ام ابيتي بتتعلقي بيه ، و بيبقي البعد او التغيير في الروتين دة بيضايقك و بيزعجك و ممكن يخليكي طول الوقت عصبية من غير ما تفهمي السبب الحقيقي

– سقف التوقعات، لما بتبقي العلاقة رايحة في السكة دي و فجأة حد منكم يقرر يرتبط او يشوف ناس تانية او يرجع لعلاقة قديمة ، سقف التوقعات اللي أصلا بتبقي متجاهلاه و في انكار من وجوده بيتهد علي راسك ، و في نفس الوقت مابتقدريش تعبري عن غضبك و لا زعلك ، لانه ببساطة مافيش حاجة اتقالت و ببساطة انتوا بس أصحاب !

العلاقات الصحية أساسها الصراحة و الحوار و التقدير ، لو انتي في علاقة متلغبطة زي كدة حاولي تحطيها في اطارها المظبوط ، أولا صارحي نفسك انتي في العلاقة دي بالشكل دة ليه؟ ثانيا اسالي الطرف التاني و خلي الكلام علي اد ما تقدري واضح و صريح ، لو بعد مصارحتك لنفسك و للطرف التاني لقيتي ان العلاقة دي مش رايحة حتة ، قلليها او انهيها لانها مش هتعمل حاجة غير انها تأذكي من غير ما تحسي !

حبي نفسك و قدريها و خافي عليها و ماتحطيهاش في علاقة مش محددة و لا ليها بداية من نهاية و تقولي ” احنا بس أصحاب”!