خمس أسئلة تفكري فيها وتتأكدي من إجاباتها لو هتدي فرصة تانية

 كتير مننا دخلوا في علاقات ومكملوش وبعد شوية بتحصل حاجات تخليكي تفكري تدي فرصة تانية لنفس الشخص ونفس العلاقة، لو فكرتي تعملي كدة، احنا هنقولك هنا إيه اهم خمس اسئلة تفكري فيهم وتجاوبي عليهم قبل ما تقرري:

 أول حاجة:

 ايه اللي بيخليكي تفكري تدي فرصة تانية؟ يعني مثلا هل الزهق؟ هل انه مافيش حد تاني؟ هل انه بيحاول بقاله فترة يرجعك؟ طب هل شفتيه مع حد تاني ومش عايزاه يحب غيرك؟ ولا هل مش عارفة تحبي حد غيره ومش عارفة تطلعيه من دماغك؟ لازم تكوني صريحة الأول مع نفسك عشان تعرفي لو هتاخدي قرار الفرصة التانية هيكون ليه بالضبط؟

 ثاني حاجة:

 لازم تفكري وتفتكري كويس انتوا سيبتوا بعض اول مرة ليه؟ او المرات اللي فاتت ليه؟ وتحطي قدامك اللي حصل منك ومنه وتقيمه كويس وتفكري هل لو اديتي فرصة تانية هل النهاية هتتغير ولا لا؟ و ده بقي ياخدنا لثالثا؛

 ثالث حاجة:

 هتدي فرصة تانية بناءا على ايه؟ يعني هل هو هيقدم حاجات كنتي محتاجاها؟ هل انتي بقتي تقبلي حاجات ماكنتيش قابلاها؟ هل في أرضية مشتركة انتوا الاتنين واقفين عليها؟ يعني اتكلمتوا و لقيتوا حلول للمشاكل اللي خليتكم تسيبوا بعض قبل كدة؟ اتكلمتوا واتفقتوا ان انتوا الاتنين موافقين تبذلوا شوية مجهود زيادة عشان المركب تمشي؟ هل هو قدم حاجات جديدة ماكنش قدمها قبل كدة تخلي علاقتكم مستقرة اكتر؟

 رابعا:

 افتكري كويس كان احساسك ايه وانتي مع الشخص دة قبل كدة؟ يعني هل كنتي مرتاحة في معظم الحاجات وكان في حاجات بسيطة هي اللي محتاجة تتظبط بس ماصبرتوش على بعض؟ ولا هل كنتي بتحسي معاه بالقلق؟ وانه مخليكي طول الوقت ولا علي حامي ولا على بارد بالعكس كانت السعادة في العلاقة جاية من الادرينالين الزيادة وأنك طول الوقت مستنية حاجة مش عارفة هتحصل ولا لا؟ ومفتقدة الإحساس دة بالمغامرة حتى لو بيتعبك.

 خامسا:

 الفرصة التانية اللي هتديها والشخص اللي هترجعيه حياتك هيضيف لك ايه؟ يعني هل هو شخص بيحسسك بالأمان؟ هل بيحسسك بقيمتك وحبه ليكي؟ هل هيتحملك ماديا؟ هل هيديكي الاستقرار اللي انتي عايزاه؟ هل بيحسسك بالسعادة؟ ولا بيحسسك بالنقص والوجع والتعاسة؟ هل هيضيف؟ ولا هياخد؟

 اول ما تردي على الأسئلة دي بشكل صريح مع نفسك هتعرفي إذا كانت العلاقة دي صحية و تستاهل فعلا منك فرصة تانية و لا لا؟ هتتاكدي إذا كانت الفرصة اللي هتديها هتضيع سنين تانية من حياتك لمجرد تعلق؟ ولا هتديها لشخص فعلا هيقدرها و هيبذل مجهود عشان العلاقة دي تنجح و تستمر و ماتوصلش لبعد تاني؟

 كتير مننا دخل علاقات مؤذية ومهما حاول مش بيعرف يطلع منها بالعكس دة كمان بيفضل يضيع عمره ويلف في دواير مغلقة.

 عشان كدة لازم تفكري وتفتكري كويس كل تفصيلة من اول أنتي هتدي فرصة تانية ليه لحد هو هيضيف لك ايه؟

 العلاقات مش حاجة سهلة، ومحتاجة مجهود من الطرفين عشان تنجح وتكمل، بس مهم اوي اننا نفرق بين العلاقة الحقيقية والتعلق المرضي، اننا نفرق بين اننا بندي فرصة تانية عشان كل واحد فينا مقرر يبذل مجهود زيادة عشان نكون مع بعض! و لا اننا بندي فرصة تانية عشان احساس انك مش عارفة تبعدي عن الشخص دة مع ان عيوبه هي هي ، و الدايرة هتفضل بس بتلف .

 عمرك وحياتك اديهم للي يقدرهم، ادي فرصة تانية للي يسعدك، مش اللي يقلل منك ويعجزك بدري ويحسسك أنك مش كفاية.