خمس علامات تقولك انك لازم تخرجي من العلاقة اللي انتي فيها

العلاقات عموما شيء صعب جدا ، يعني الدخول في علاقة صعب، و انك تحافظي علي العلاقة صعب ، و الاصعب انك تخرجي منها ،

بس بيبقي في وقت معين ، نقطة فاصلة كدة في العلاقات،

نقطة بتتقلب فيها العلاقة، و بتبقي مليانة علامات انك لازم تخرجي من العلاقة دي والا هتأذي نفسك، 

في النقطة دي لقطة  I can fix him   مش هتعمل حاجة غير ان انتي اللي هتبقي محتاجة كونسلتو ي fix u   ، فهنقولك هنا علي اهم خمس علامات يقولولك انها اللحظة الحاسمة،

وإن دة الوقت المناسب إنك تخرجي من العلاقة :

أولا ، أسالي نفسك، هل العلاقة دي بتديني اللي انا محتاجاه؟

يعني كل حد مننا و احتياجاته من العلاقة بيختلف عن التاني ،وحتي الاحتياجات دي بتتغير من وقت للتاني في العلاقة، المهم أسالي نفسك هل العلاقة اللي انتي فيها مدياكي اللي انتي محتاجاه منها و لا لأ؟ 

سواء بقي اللي محتاجاه ده كان : 

 حب،

 عطف، 

احتواء،

 تحمل مسئولية، 

استقرار مادي،

 استقرار اجتماعي،

أسرة و أولاد،

راحة.

ولو الإجابة كانت لأ ، وكان في محاولات قبل كدة منك انك تعبري عن احتياجاتك و مافيش أي استجابة من الطرف التاني، يبقي دي علامة إن دة الوقت المناسب انك تخرجي من العلاقة دي .

ثانيا، هل انتي علي طبيعتك في العلاقة دي ؟

من الحاجات المهمة جدا في العلاقات عموما ،إنها تبقي مريحة، مافيهاش تصنُّع و لاتمثيل،

لو الشخص مش عارف يكون نفسه الحقيقية مع شريك حياته و بيمثل طول الوقت ، ماتبقاش علاقة سليمة ،

ولو شريكك مش بيقبلك زي ما انتي، و ديما عايز يغيرك، أو بيضغط عليكي و بيرفضك او يقلل منك لما بتكوني علي طبيعتك، فدي علامة مهمة إنك فعلاقة مش صحية، ولو حاولتي تعالجيها و مافيش أمل ، يبقي لازم تخرجي منها .

ثالثا، هل شريكك شايفك؟

لو العلاقة اللي انتي فيها شريكك ديما في أي نقاش أو أي مشكلة بينكم مش بيشوف غير نفسه يعني self centered يبقي عندك مشكلة كبيرة، لو ديما مش بيفكر غير في نفسه،

أنا متضايق،

أنا زعلان،

أنا مكتئب،

أنا مضغوط،

أنا محتاج،

كل كلامه أنا…أنا…أنا ، اومال الطرف التاني في العلاقة فين؟

العلاقات بتقوم بين شخصين، طرفين،

يعني زي ما هو محتاج أنتي محتاجة، زي ما هو مضغوط أنتي مضغوطة،

لو أنتي في علاقة الشخص اللي معاكي مش بيشوف غير نفسه مهما حاولتي تفهميه انكم اتنين، يبقي دة الوقت المناسب انك تخرجي من العلاقة دي.

رابعا، هل عندك إحساس بالذنب طول الوقت في العلاقة دي ؟

مش إحساس بالذنب لانك انتي شايفة انك مقصرة، لأ

في نوع كدة من العلاقات بيبقي طول الوقت الطرف التاني محسسك بالذنب،

يعني الطول مشيلك مشاكله، و عيوبه، و غلطاته،

لو بيعاملك وحش فعشان انتي بتستفزيه،

لو بيخونك فدة عشان انتي مش مكفياه،

لو مابيتكلمش معاكي، فده عشان انتي مش فاهماه و مش عارفة تتعاملي معاه ازاي؟

لو مضغوط يبقي عشان انتي بتطلبي منه الأساسيات،

و هكذا،

طول الوقت بيشيلك الهم، طول الوقت محسسك بالذنب، طول الوقت بيشيلك سبب المشاكل، او سبب تصرفاته الوحشة معاكي،

لو انتي في علاقة من النوع دة ، يبقي لازم تخرجي من العلاقة، لان دي من اهم اعراض العلاقات ال toxic .

خامسا ،هل انتي و شريكك مش علي نفس الصفحة في التفكير ، و الطموح ، و الشخصية؟

دي بقي مالهاش علاقة بانكم مختلفين عن بعض فبتكملوا بعض، و لا شبه بعض فكل حاجة بتعملوها زي بعض ،

المهم في الحالتين انكم تكونوا علي نفس الصفحة، انكم تبقوا عايزين نفس النهايات و نفس النتايج،

 يعني مهم جدا تسالي نفسك هل انا و شريكي عندي نفس مستوي الطموح و لا لأ؟

 عندنا تقبل و تفهم لاختلافتنا و مع ذلك بنعرف نتقابل في ارض وسط و لا لأ؟

لو دة مش حاصل يبقي لازم تخرجي من العلاقة دي، 

لو انتي طموحة بزيادة و شريكك مش طموح أصلا ، في مرحلة ما من العلاقة ياما هيغيِر من طموحك و نجاحك ، ياما أنتي هتشوفيه كسول و يقل من نظرك ، وفي الحالتين مش هتقدروا تكملوا مع بعض،

ولو انتوا الاتنين مافيش بينكم ارض وسط، و لما بتختلفوا مابتعرفوش توصلوا لحل يرضيكم انتوا الاتنين، يبقي لازم تخرجي من العلاقة.

 بمعني إن انتوا الاتنين  لازم تبقوا بتبذلوا مجهود في العلاقة مش طرف واحد هو اللي بيعمل مجهود،

إن انتوا الاتنين بتقدموا تنازلات عشان تبقوا انتوا الاتنين مبسوطين في العلاقة، مش طرف واحد هو اللي ديما بيتنازل، ولو دة مابيحلش يبقي مش هتعرفوا تكملوا ،

 لان في طرف ديما فايز و التاني ديما خسران  ،

 او طرف ديما بيدي و التاني ديما بياخد، 

و بالتالي العلاقة هتبقي مش متوازنة و هيبقي فيها انفجار للطرف المكبوت في وقت من الأوقات.

الخروج من أي علاقة بيبقي صعب جدا ، خصوصا لو بعد وقت طويل و عشرة،

 بس في وقت معين لو مافتحتيش عينك وشفتي انك في علاقة بتأذيكي اكتر منها بتريحك، هتوصلي لمرحلة انفجار ممكن تخلي الخروج يبقي بخساير اكتر منه خروج صحي.

حياتنا اقصر من اننا نضيعها في علاقة مش مريحانا أو بتأذينا ،

 اختاري نفسك و راحتك وماتخافيش لان الوقت بيعدي كل حاجة ، و بيعرفك نفسك اكتر و اللي تستحقيه اكتر .

أنتي تستحقي تبقي في علاقة مريحة و بتزقك لقدام، مش بتتعبك و تخليكي محلك سر أو أصلا بتشدك لورا.

افتكري انه حتي الحاجات الصعبة … كلها بتعدي!