٥ نصايح تخليكي تتعاملي احسن في العلاقات

١- *متقارنيش جوزك او شريك حياتك بنفسك*

شريك حياتك مختلف في طريقه تفكيره وتصرفاته واستيعابه للامور عنك ، 

دائما بتقارنيه بنفسك وازاي انتي بتتصرفي في المواقف المختلفه يعني مثلا ( ممكن تقوليله انت مثلا مش بتسال عليا زي ما بسال عليك او مش بتهتم بتفاصيلي زي ما انا بعمل وهكذا…..)،

  الحقيقة ان طريقه تفكير الراجل غير طريقه تفكير الست تماما عشان كده مينفعش ابدا تقارني نفسك بيه ، اقبلي انه كائن مختلف تماما واتعرفي عليه من اول وجديد

٢-* بلاش دور الام مع جوزك*

ودة بيبقي في دور الست لما بتحب  تاخده مع شريكها ، يعني  انها تبقي مسئوله عنه وكانها مامته، وبتعتبر ده دورها  وتبدا تحطه في خانه الاهتمام بكل تفاصيله وتبدا تنصحه وتوجهه في كل حاجه من خوفها عليه!

فكره النصحيه او توجيه الاوامر للزوج من الحاجات اللي بتقفل الراجل تماما،  لانها بتحسسه انه مش كفيء انه ياخد قراره بنفسه ده غير اني بتكوني في دور مامته مش حبيبته وبالتالي بيقفل منك .

٣- *ما تقارنيهوش بازواج صحابك*

 المقارنه بينه وبين رجال تانيه زي جوز صاحبتك من اكتر الحاجات اللي بتبوظ علاقتك بشريك حياتك

كل راجل  ليه قدراته ومميزاته وعيوبه،  والمقارنه بينه وبين حد تاني من اكتر الحاجات اللي هتجرحه وتخليه يعند معاكي اكتر  ، كل شخص ليه مميزاته وليه عيوبه ركزي علي مميزاته.

٤- *وصليله دائما احساس انك واثقه فيه*

الشك من الحاجات اللي بتدمر اي علاقه ، اولا بيخليكي عايشه في عذاب طول الوقت ، ثانيا بيدفع الطرف التاني انه يتصرف تصرفات مش طبيعيه عشان خايف منك، عشان دائما بتشكي فيه ، والتصرفات اللي مش طبيعيه دي تخليكي تشكي زياده وتزود المشاكل والفجوه ما بينكوا ، محتاجه تدي شريكك الثقه اللي محتاجها وتوصليله ده دائما بشكل مباشر انك واثقه فيه عشان يطمن 

٥-* بلاش تصري ان المشكله عند جوزك بس وانه هو محتاج يتغير*

 المشاكل بتكون من الطرفين ، زي ما في حاجات بتضايق منه اكيد في حاجات بتضايقه منك ، اعرفي منه ايه اللي ممكن تكوني بتعمليه بيضايقه وانتي مش واخده بالك 

 وواحده واحده اطلبي انتي كمان تغير تصرف واحد بيضايقك (مش تعترضي علي كل التصرفات )، وادي وقت للتغير وكرري الطلب وشجعيه علي اي خطوه ياخدها في انه يعملك اللي انتي عايزاه ، (بلاش لوم وعتاب لو معملش حاجه او عمل حاجه غلط )بس كرري الطلب وخليه واضح علي قد ما تقدري.

العلاقات أصلا صعبة و عشان كدة محتاجين نشتغل اكتر علي علاقاتنا و نديها مجهود اكتر عشان نقدر نحافظ عليها و نتعامل احسن في علاقاتنا