in ,

الأمومة قرار سهل؟ Expectations VS Reality

الأطفال هما زينة الحياة الدنيا والنص الحلو في الجواز بس محدش قالنا إن النص الحلو ده هيشقلب حياتنا من الألف إلى الياء. 

من قبل ما نخلف ، بنسمع من أمهاتنا وستات عندهم أطفال إن الخلفة مش سهلة ومسئولية كبيرة، وبنسمع برده من نفس الناس الجملة الشهيرة “مفيش حاجه جايه في السكة؟” 

فا بنبدأ نتحمس ونحس إن أكيد إحنا أد المسئولية بقي، وفعلا ناخد خطوة إننا نجيب حاجه  في السكة ، بامبينو بقي نتبسط بيه و يتبسطوا بيه معانا!

ومن أول لحظة بيشرف البيبي الجديد وحياتك حرفيا بتتغير١٨٠ درجة ومستوى التغيير بيبقى أسرع من إنك تستوعبيه أو حتى تتقبليه،

الحقيقه إن إحنا إتضحك علينا جامد أوي في موضوع الخلفه ده!

أه أنا كنت عارفه إن الولاده هتكون صعبه ،

 بس متخيلتش إني هبقى بعيط بالدموع من الوجع، وإني هنام وأنا قاعده أول أسبوع بعد الولاده من كتر الوجع،

أه كنت عارفه إني أول كام شهر هسهر الليالي ومش هنام،

 بس محدش قالي إني مش هتهنى بالنوم تاني لوقت طويل شويتين تلاتة أربعة، 

أه كنت عارفه إن الرضاعه الطبيعي مفيدة، وإن اللبن الصناعي إبعدي عنه عشان ملهوش فايده ،

 بس محدش قالي إني هقعد بالأسابيع مش عارفه أرضع طبيعي، ومنهاره بسبب إحساسي بالتقصير وعدم قدرتي إني أكفي إحتياجات إبني، وضغط اللي حواليا إن أحاول مره وإتنين وألف ومستسلمش للبن الصناعي اللي هيجيب لإبني جفاف!

أه إتقالي إن العيال بتقرب الزوجين وتقوي علاقتهم ،

 بس محدش قالي إن إنشغالي ما بين محاولاتي أني أرضع طبيعي، وأفهم البامبرز بيسرب ليه ؟والسره بقالها شهر وموقعتش ليه؟ وأن جسمي بقي شكله غريب كدة ليه؟ إن كل ده خلاني أنفصل جسديًا وعاطفيًا عن حياتي كلها و أولهم جوزي!

أه إتقالي إن حياتك هتتغير بعد الخلفه ،

 بس محدش قالي إن الحياه هتقف أو هتاخد شكل جديد ولسنين، لحد ما إبنك يشد حيله!

الحقيقه هي إن الجواز ده حماده والخلفه حماده تاني خالص!

وعلشان مبقاش ظالمة في حق الخلفة والأطفال ومدى تأثيرهم على الحياة الزوجية، كتبت بوست على الجروب بسأل فيها الماميز عن أد إيه الخلفه والأطفال بيأثروا على العلاقة بين الزوجين؟ والحقيقة إني لقيت إقبال جماهيري على البوست.

خلينا بس في الأول نتفق إن ولادي هما أحلى حاجه حصلتلي في حياتي وإن حياتي فعلا كانت ناقصه من غيرهم وحبي الغير مشروط ليهم ده رجع روحي ليا تاني.

بس إللى إكتشفته من تعليقات الستات على البوست إن المشكله الرئيسيه مش في الخلفة وإنما في توقعاتنا إحنا تجاه الحياه الزوجية بعد الخلفة.

الواقع  vs التوقعات

إحنا كستات فاهمين إن الحياه بعد الخلفه مش هتكون وردي أكيد، 

بس توقعاتنا كانت بتقول :

 إن في الحياه الزوجية بعد الخلفة، جوزك هيشيل معاكي شويه سواء تغيير بامبرز أو يحمي الطفل أو ينيمه أو يصحي معاه في يوم أجازته ويقعد بيه شويه لحد ما تصحي.

توقعاتنا كانت بتقول،  إن أهالينا هيشيلو معانا ومش هسيبونا في الحوسه ديه لوحدنا،

الواقع بيقول:

 إن أهالينا كبروا على الشيله ديه والعشم الجامد إللى داخلين بيه عليهم دة مش مظبوط،

 الواقع برده بيقول، إن جوزك مش هيصحى من الفجر يوم أجازته عشان يسكت البيبي عشان إنتي تفضلي نايمة (ده على إفتراض إنه أصلا بينام معاكي في نفس الاوضه إنتي والبيبي)

الواقع  اللي فتحنا عينينا عليه بيقول ، إنك بتلاقي نفسك شايله الليله كلها لوحدك،  من نوم متقطع وصحيان ألف مره وسط الليل عشان ترضعي أو تغيري أو تدي الدوا، 

الواقع هو إن وقت ما إبنك أو بنتك يتعبوا أو يكون عندهم مشكلة ما (خاصة في الفتره الأولى بعد الولاده) إنك إنتي إللى هتوقفي دنيتك عشان تلبي إحتياجات إبنك، وده مش غلط خالص، وإنتي أكيد بتعملي كده وإنتي راضيه ومبسوطه، و بكل حب حقيقي! 

الحاجه اللي هتخلي توقعاتك وواقعك قريبين من بعض، هي المشاركه الزوجية،

 إن جوزك يشيل ولو جزء بسيط معاكي عشان إنتي تقدري تشمي نفسك وتشوفي نفسك وجوزك، ، ماتبقيش مقصرة مع نفسك و لا مع جوزك و لا مع البيبي ، لإن لما بتاخدي وقتك تفصلي ، بتقدري ترجعي أحسن لكل اللي حواليكي،

إسمحي  لجوزك  و أطلبي منه إنه يساعدك، زي ما إنتي أخدتي وقت عشان تفهمي إبنك أو بنتك محتاجين إيه؟ جوزك بدره هياخد وقته عشان يتعلم، إصبري عليه، وفهميه، وخليه يساعد، ومتاخديش الطريق السهل بإنك تعملي كل حاجه لوحدك عشان إنتي أسرع، لأن والله هيتعود وهيشيل إيده من كل حاجه خالص بعد كده.

حاجة كمان مهمة جدا،هل الإستشارات الزوجيه مفيدة في الوقت دة؟

أه الإستشارات الزوجية مفيده جدًا قبل الجواز، وقبل الخلفة، وبعد الخلفة،

 العلاقات الزوجية بتتأثر جامد بعد الخلفة، والمشكله إن الزوجين مش بيكونوا مستوعبين حجم التغيير ده، وأد إيه هيأثر عليهم؟ والموضوع في الأخر بيوصل إن الست مش بتفكر غير في عيالها بس، والراجل بره البيت بيشتغل ولما بيرجع مش قادر يستحمل مراته – إللي جايبه أخرها من الزن والعياط – والسكوت والجفاء هما اللي بيحلو محل الحب والعلاقة الزوجية الصحية.

والحل إللي أجمعت عليه ستات كتير هو إن قبل قرار الحمل أصلًا لازم الزوجين يقعدوا مع بعض ويتكلموا،

هل هما فعلا مستعدين للتجربة دي؟

 هل هما مستعدين يفهموا الحقوق والواجبات والمسئوليات إللي هتزيد عليهم بعد الولاده ؟ وإنهم متفقين يشاركوا بعض الأعباء ديه عشان المركب تمشي، وعشان الحياه الزوجية والأسرية بينهم تستمر بشكل صحي، و الاتنين يفضلوا مبسوطين؟

لو إتكلموا و أتفقوا ، يقدروا ياخدوا قرار إنهم يكبروا عيلتهم و يجيبوا بيبي فعلا،

 لو لأ ، 

يبقي أي كلام من نوع مافيش حاجة جاية في السكة دة ، ننساه و نتجاهله تماما ، لحد ما نكون جاهزين نعدي بالتجربة دي و مستعدين لها تماما ، عشان مانجيبش طفل إحنا مش فاهمين دورنا معاه إيه من جهة، و عشان مانآثرش علي حياتنا الزوجية بشكل سلبي  لأننا مش فاهمين أو مش مستعدين للتجربة من جهة تانية! 

Hend Ismail Passionate Writer

What do you think?

Written by Editor

Comments

Leave a Reply

Your email address will not be published. Required fields are marked *

Loading…

0

Comments

0 comments

ليه الرجالة بطلت تتجوز ؟

هل السكس قلة أدب؟ و بنمارسه لعدم انقراض البشرية فقط؟