in , ,

يعني ايه حد بيحبك عشان إنتي موجودة بس ؟

عمرك إتحطيتي في موقف ومكنتيش متخيله إنك ممكن تعديه؟ طيب عمرك واجهتك مشكلة وقلتي لا يمكن تتحل ولقيتي نفسك بتحليها؟ 

أكيد كلنا إتعرضنا لمواقف في حياتنا مكناش متخيلين إننا عندنا القدرة نتعامل معاها، بس حقيقي في حاجات كتير أوي عن قدراتنا وإمكانيتنا إحنا منعرفهاش لإننا مجربناش نختبرها، أو خايفين نختبرها ونفشل.

زي فكرة الحب الغير مشروط دي كانت بالنسبالي حاجه مش متخيله إن أحسها أصلأ، يعني إيه حد يحبك من غير ما يكون عايز منك حاجة؟

 يعني إيه حد بيحبك عشان إنتي موجودة بس؟

 يعني إيه حد من أول ما بيصحى من النوم، لحد ما ينام إنتي كل محور حياته؟

 يعني إيه أنا ممكن أحب حد النوع ده من الحب؟ هل هقدر أصلأ؟ 

أسئلة كتير سئلتها لنفسي عن نفسي، وقولت لا يمكن هقدر أدي حد النوع ده من الحب الطاهر، أو هلاقي حد يدهولي! 

والحقيقة اللي أتفاجات بيها، هي إني لاقيت الحب ده، والمفاجأة الأكبر إني لقيت نفسي بدي إللى قدامي مشاعر فياضة مكنتش متخيله إنها عندي أصلاً. 

الدنيا بما فيها من مسئوليات ومشاكل بتسحب مننا واحدة واحدة طاقتنا وشغفنا، بس الحاجه اللي قدرت إنها ترجع جزء من الطاقة ديه تاني، واللي لقيت نفسي بعملها وأنا راضية وسعيدة هي:

” الأمومة”

أفتكر إن إللي بتمر بتجربة الأمومة بالرغم من صعوبة التجربة، إلا إنها بتحس إن ولادها دول جايين من قلبها مش من بطنها،

أحساس الحب الغير مشروط بيبقي جديد و مبهر و قوي، مهما أهالينا قالوه لينا، إلا إننا مابنحسوش غير لما بيبقي عندنا ولاد بتوعنا ، حتة منك ماشية علي الأرض،  الصلة اللي بين الأم وولادها، هي حقيقي مصدر السعادة الغير مشروطة.

 الحب اللي الأم بتحسه من أولادها، واللهفة إللى في عنيهم أول ما يشوفها وحبهم الطاهر ليها إللي مفيش وراه أي هدف أو غرض خفي، ده حقيقي بيطلع أحسن ما في الواحدة.

فكرة إحتياج كائن منك ليكي و إنك مصدر أمانه الوحيد بيخليكي في أحسن حالاتك ، بيديكي طاقة تعملي المستحيل عشان ولادك ، الحب المشروط ما بينكم بيبقي رايح راجع ، إنتي مصدر أمانهم و هما مصدر أمانك!

أنا مش كائن عاطفي بطبعي، ومش من نوع البنات إللى ممكن أطلع إللى جوايا بسهولة، لأني بخاف على مشاعري أوي، فا بعمل حسابها أوي، وفي بداية مشوار الأمومة كنت متلغبطة ومش فاهمة أنا حاسه بإيه؟ ومفروض أحس بإيه تجاه الكائن الصغير إللى نايم على إيدي؟

بس مع الوقت شوفت كم من الحب والبراءة خلتني أستسلم، ولما إستسلمت حقيقي حسيت إن مفيش حاجة في الدنيا ممكن تخلي الواحد مبسوط أد إن يحس إن في حد بيحبه عشان هو موجود في حياته وبس.

 الأمومة مش حاجة سهلة ، بس هي تجربة استثنائية ، و الذكاء إنك تحافظي علي علاقة الحب الغير مشروط بينك و بين ولادك ، و تحسسيهم طول الوقت و مهما كبروا إنك مصدر الأمان و الحب الغير مشروط ، عشان هما كمان يفضلوا بيدوكي الحب الغير مشروط إللي بيحولك من مجرد أم… لسوبر ماما ، تقدري تعملي المستحيل عشانهم.

Hend Ismail Passionate Writer

What do you think?

Written by Editor

Comments

Leave a Reply

Your email address will not be published. Required fields are marked *

Loading…

0

Comments

0 comments

!كلهم مصطفي أبو حجر ، و لا أستثني منهم احداً

ازاي تحاربي التوتر و الظروف و تحافظي علي سلامك الداخلي ؟