دليلك لارخص شوبينج برندات في مصر

محبين الشوبينج الفترة دي عندهم زي lag من الأسعار الخزعبلاية اللي بقت في كل حاجة ، و عشان كدة قررنا نعمل لكم دليل الشوبينج لأحسن البرندات باقل الأسعار ، تلاقوها فين و تشتروها ازاي ؟ 

أولا كدة خلونا نفكر مع بعض ليه ديما بنقول ان الشوبينج برة مصر ارخص ؟ 

يعني ليه نسافر نعمل شوبينج فظيع في تركيا او لبنان او ماليزيا او غيرهم ؟

هقولكم ليه؟

معظم اللي بيعملوا شوبينج رهيب برة مصر بيروحوا شوارع معينة او محلات بعينها ، طبعا مانقدرش ننكر ان فكرة ال sale  هناك بيبقي  sale  بجد ، بس كمان نفس الشوارع و الأماكن دي موجودة في مصر لكن كتير مايعرفوش عنها حاجة زي :

١-ال outlets  احنا عندنا كمية  outlets  الحاجات فيها بتبقي بربع التمن حرفيا ، و دول موجودين في أماكن كتير جدا منهم المنطقة الصناعية في ٦ أكتوبر ، هناك هتلاقوا كمية outlets  لمعظم البرندات تقريبا  و في زي المنطقة دي كمان في العاشر من رمضان 

٢-تاني مكان بقي ممكن يبقي صدمة لناس كتير ، الا و هو ” الوكالة”

هتقولوا لي بجد الوكالة؟ هقولكم ايوة ، وبالمناسبة الشوارع اللي بنشتري منها برة مصر و بتلاقوا اللبس فيها برندات تحفة و علي استاندات هي هي نفس فكرة الوكالة ، و هنا في فرق بس مهم ، الوكالة بيكون فيها “بالة” و دة اللبس المستخدم ، و بيكون فيها بواقي تصدير او استوكات و دي بتكون جديدة بالتيكت بتاعها 

حاليا في مول كامل في الوكالة مليان كل البرندات اللي ممكن تتخيلوها بأسعار وهمية ومعظمها جديدة بالتيكت بتاعها، و المول اسمه مول ممشي مصر بالوكالة.

الناس مدمنين الشوبينج هيلاقوا كل البرندات اللي عايزينها بسعار قليلة جدا ، و هيعملوا شوبينج رخيص زي اللي بيعملوه برة مصر من شوارع الأسواق القديمة، المهم يبقي عندك طولة بال انك تقعدي تدوري و تنقي و اكيد هتلاقي كل اللي انتي عايزاه جديد و بسعر معقول جدا جدا، دمتم انيقات و محبات للشياكة و الشوبينج!