ليه لعبتوا في مصطلحاتنا و خليتوا رمضان أبو سرة بقي مونامور

لما بقيت بسمع اللغة الجديدة و المسميات الجديدة للبس او الاكل او حاجات كتيرة تانية كان ليها اسامي مختلفة علي أيامنا بستغرب جدا ، و بسأل نفسي ليه خلينا رمضان أبو سرة بقي مونامور، و هنا اسمحوا لي أتكلم عن اللبس ، يعني مثلا، و دة علي سبيل المثال وليس الحصر : 

١-السويت شيرت ، فجأة و بقدرة قادر بقي  هودي ، و الحقيقة اني لما سألت اسمه اتغير ليه يا ولاد؟ قالك لان السويت شيرت دة العادي انما اللي بالكابتشو بقي اسمه هودي!

٢-اما عن السالوبيت  اللي كلنا عارفينه من يومنا علي انه سالوبيت -وبالمناسبة دة كان تطور خطير عن اسمه الحقيقي الا وهو العفريتة- فجأة اتطور و بقي اسمه جامب سوت ، و دة طبعا لسالوبيت الخروج عادي يعني ، اما لو اتكلمنا عن سالوبيت البيت فهووووب بقي اسمه “وانزي”، اه والله زي ما بقولكم كدة!

٣- اما عن الروب و اللي بقي بيتلبس في الخروج فهنلاقي ان التطور في اسمه اتلزق في  الكيمونو الياباني من غير أسباب معروفة ، و بقي اسمه كيمونو ، ودعونا لا ندخل في تفاصيل الفرق بين الكيمونو و الكارديجان لانها أشياء لا يعلمها الا الله !

٤- فاكرين اروش لبس للنادي و الخروج عندنا الا و هو “بنطلون الترنج” ، دلوقتي ربنا كرمه و اتعلم برة و بقي اسمه سويت بانتس

اما عن البنطلونات بانواعها و خصوصا الجينز فحدث و لا حرج !

الموضوع بقي مربك اوي ، و بقي اللي مش مواكب او متابع المسميات الجديدة للبس فايته كتير او مستواه و تعليمه مش اد كدة من وجهة نظر كتير من اللي حواليه!

بس في رايي المتواضع ان فكرة المسميات الكتيرة اوي دي مربك اكتر منه حاجة مودرن اوبيعبر عن  ثقافة ، الموضوع قلب انه بقت تريندز و بنجري وراها من غير فهم، وبقت منظرة اكتر منها أي حاجة تانية ! 

بس احنا كجيل التمانينات و التسعينات بننادي بتطبيق شعار “رجعونا لايام رمضان السكري و المسميات البسيطة في حياتنا، و بلاها رمضان مونامور اللي شقلب لنا القاموس دة”! 

أقول قولي هذا و اتمني نرجع نقول اللبس بمسمياته القديمة من غير ما يتقال علينا جهلة أو رجعيين، و شكراً .