٥ أسباب بتقولك ليه إنتي محتاجة حيوان أليف في حياتك

الفترة اللي فاتت –وطول الوقت- بنسمع كلام عن قد ايه الحيوانات الآليفة محتاجة لنا، بس تعرفي انك انت كمان محتاجة ليهم ويمكن أكتر؟ 

ازاي؟

دول أهم ٥ حاجات تعرفك ليه ممكن تبقي محتاجة في حياتك حيوان أليف وكلها من تجارب حقيقية:

أول حاجة ، مصدر حب وطاقة ايجابية مبيخلصش!

 الكلاب أو القطط ، لو متربيين مع أسرة و بيت سوي ورحيم وقد المسؤولية، بيبقوا أهم مصدر للحب والسعادة في البيت،

عندهم  قدرة غريبة إنهم يحولوا البيت لمكان دافيء وطاقته حلوة،

 بحركة مش متوقعة، بحضن أو بوسة مفاجأة عشان وحشتيهم،

 بفرحتهم أول ما يسمعوا إنك بتفتحي باب البيت ويقعدوا يحتفلوا برجعوك،

 بإهتمامهم إنك تكوني موجودة في كل نشاط بيقوموا بيه و يقعدوا يلعبوا معاكي،  فبالتالي إنتي بتفصلي شوية عن كل تفاصيل اليوم المتعبة أو المشاكل اللي مضايقكي وبتجددي طاقتك معاهم. 

تاني حاجة، صاحب موجود طول الوقت وعمره ما هيزهق منك!

 الحيوانات الآليفة هتحسسك دايماً انك مش لوحدك،

 يلا ننزل؟ يلا،

 يلا نتمشى شوية؟ وماله،

 طب نقعد في البيت تحت البطانية؟ يا سلام انا بحب كده اوي … شوفي عايزة تعملي ايه وانا معاكي.

تالت حاجة، سبب للحركة وتوسيع دايرة معرفك!

 الحيوان الآليف زي الطفل، عنده طاقة دايماً ،وبيحتاج يتحرك، فده هيخليكي انت كمان على طول بتتحركي وعندك نشاط،

 والكلاب تحديداً في النقطة دي بتساعدك إن يكون في وقت في يومك للمشي، وده مهم جداً ليكي لتحسين مزاجك، وبيساعدك على التفكيربشكل أفضل.

 مش بس كده، الكائن الصغير ده قادر يخليكي توسعي دايرة معارفك، وتكوني صداقات مختلفة بسبب انك بتخطلتي بأماكن ودواير مختلفة، زي مثلاً إنك هتروحي مكان مخصص  للعب الحيوانات أو حتى انك هتتعرفي علي جيرانك اللي بيربوا حيوانات زيك.

رابع حاجة، تحمل المسئولية!

مهم جداً ان يكون عندك مسؤوليات في حياتك، وتربية الحيوانات الآليفة مسئولية مش صغيرة، بس مسئولية لذيذة وبتضيف لك، لإن دايماً عندك سبب تقومي عشانه،  تنجزي حاجات في يومك عشانه،  حتي في الأيام اللي مش قادرة فيها بيبقي عندك حافز إنك تقومي، لإنك عارفة إن في كائن محتاج لك وإنتي كل العالم بتاعه.

 خامس حاجة، تحسين صحتك النفسية والعقلية بصفة عامة!

بالأضافة لكل النقط اللي فوق، الحيوانات الآليفة وجودها بيقلل بشكل كبير من نوبات القلق و الاكتئاب عند صحابهم، وبيساعدوكي إنك تنامي نوم عميق بوجودهم جنبك، وكمان بيجددوا قلبك ومشاعرك..هتلاقي نفسك بقيتي طيبة وحنينة بشكل أكبر، وعندك أستعداد لمساعدة الناس والحيونات اللي في الشارع على طول.

عشان كدة تربية الحيوانات الآليفة حاجة مهمة ولذيذة في نفس الوقت، بس لازم تبقي عارفة إنها مسئولية وإن ليهم حقوق فمتخديش الخطوة إلا لو انتي متأكدة إنك هتقدري عليها.

 في مقولة بتقول إن الراجل اللي يعرف يربي قطة يعرف يبقي كويس في علاقته بالستات ،

 والست اللي تعرف تربي كلب تعرف تتعامل مع وجود الراجل في حياتها ،

 دة غير إن تربية الحيوانات الأليفة بيبقي بروفة لتحمل مسئولية وجود أطفال في البيت، 

يعني وجودهم في حياتك ليه مزايا كتير،علي أصعدة اكتر، 

وفي النهاية خليني أفكرك ، زي ما وجودك في حياة أي حيوان أليف هو مصدر سعادته، وجوده في حياتك هيبقي مش بس مصدر سعادة ليكي ، لا دة كمان هيغير في شخصيتك و حياتك كتير. 

لو تقدري، ماتضيعيش الفرصة!