ايه هي أشهر الأمراض المتنقلة جنسيا، وأعراضها، وطرق علاجها؟

كتير أوي مننا بيسمع مصطلح أمراض جنسية أو تناسلية أو أمراض بتنتقل عن طريق العلاقة الحميمية،

لكن الأغلبية فعلا مش عارفة هل هو مرض واحد ولا كذا مرض؟

 وايه الأعراض اللي لو لقيتها اشك إني عندي مرض جنسي؟

 وازاي أمنع اصلا إن يجيلي مرض جنسي؟

 ولو جالي أروح لمين عشان أخد العلاج الصح؟

 وهل محتاجة كمان إن الطرف التاني ياخد علاج ولا لأ؟

 أسئلة كتيرة لكن كلها مهمة جدا … وعلشان نفهم محتاجين نشرح الموضوع باستفاضة أكتر:

أولا:

الأمراض الجنسية هي أمراض بتتنقل عن طريق ممارسة الجنس، 

وده مش معناه فقط العلاقة الجنسية الكاملة … لإن ممكن الأمراض الجنسية تتنقل عن طريق:

القبلات،

أو الجنس الفموي للطرفين

 أو حتى التقاء الأعضاء التناسلية من غير حتى ممارسة العلاقة الكاملة،

ثانيا:

هو مش مرض واحد لكن دول امراض كتيرة:

١-السيلان أو gonorrhea، غلاسة المرض ده إنه متكرر، يعني لو جالك مرة ممكن يجيلك تاني لو حصل ممارسة جنسية مع شخص مصاب بالمرض ده، من الاخر الأصابة بيه مرة مش بتديكي مناعة طول العمر، 

الأعراض بالنسبة للرجل بتكون حرقان شديد في البول وافرازات صفراء سميكة بتنزل من فتحة مجري البول ودي بتنزل من غير ما يكون الواحد بيتبول، يعني ممكن يلاقيها الصبح في underwear بتاعه، ممكن كمان يكون في حرارة ووجع في الخصيتين وتورم فيهم،

 اما بالنسبة للستات فالأعراض ممكن تكون آلام مزمنة بمنطقة الحوض، افرازات نفس الشكل بتنزل من المهبل وحرقان والم بالمنطقة دي وممكن كمان حرقان في البول،

 ولو الموضوع ده متعالجش صح وفي الوقت الصح، ممكن ينتهي عند الطرفين بالعقم وعدم القدرة علي الانجاب.

علاجه سهل في شكل مضاد حيوي يتاخد بدري في الوقت المناسب. 

٢-مرض تاني اسمه كلاميديا chlamydia

 الأعراض عند الرجال بتكون في شكل افرازات شفافة من مجري البول، حرقان في البول وآلام في الخصيتين. بالنسبة للبنات والستات، الأعراض بتكون إفرازات مهبلية شفافة ليها ريحة مش كويسة، آلام اثناء الجماع، حرقان بالبول ودم بينزل في غير أوقات الدورة الشهرية،

 مشكلة المرض ده، إنه دايما محدش بياخد باله منه، لانه بيجي مع gonorrhea وبالتالي الدكتور بيكون مهتم بعلاج ال gonorrhea ومش مركز مع ال chlamydia … بالتالي تستمر شكوى المريضة لكن فقط مع اختلاف لون الافرازات،

علاجه برضه مضاد حيوي معين للقضاء على البكتيريا دي.

٣-مرض تالت وشائع اوي اسمه تريكوموناس trichomonas vaginalis

بتشتكي المريضة من حرقان بالمهبل وهرش وآلام أثناء العلاقة، لكن أهم عرض هو إفرازات مهبلية لونها أصفر مخضر وريحتها مميزة جدا زي ريحة سمك بايظ،

 بالنسبة للرجال الأعراض بتكون إفرازات برضه نفس الشكل، لكن ممكن كمان يكون في الم وحرقان بعد القذف …

 العلاج برضه مضاد حيوي معين للقضاء عليها.

٤-مرض كمان هو ال papilloma virus أو ال genital warts أو الأسم العربي الشائع ” الصنطة “، المريضة بتشتكي من نتوءات أو زوايد جلدية بتسبب هرش وموجودة على المهبل، أو من داخله، أو عند فتحة مجري البول، ممكن كمان الصنطات دي تكون موجودة حول الفم،

 خطورة الفيروس ده إنه ممكن يصيب عنق الرحم ويعمل سرطان عنق الرحم بعد فترة وممكن كمان يجيب سرطان بالقضيب لدي الرجال.

٥-مرض اسمه ال genital herpes

في ناس كل ما يجيلها دور برد يجيلها طفح جلدي حول الفم، بتكون فقاقيع مؤلمة ومليانة مية وبتفرقع بعد يومين، 

 نفس الشكل ده ممكن ييجي لكن في الأعضاء التناسلية وبيكون نتيجة أنتقال الفيروس ده من شخص لشخص، المشكلة إن الفقاقيع دي ممكن تتجدد الأصابة بيها كل شوية أو مع حدوث نقص في مناعة الشخص.

٦-في مرض تاني لكن حاليا تقريبا أختفي إسمه الزهري أو syphilis

 ده كان من أخطر الامراض الجنسية، لكن بينتهي من إي مضاد حيوي تاخديه وعشان كده اختفي،

 وكمان الإصابة بيه مرة واحدة بس في العمر لإنه بيدي مناعة دايمة،

خطورته كانت إن المرض ده ثلاث مراحل زمنية:

 الأولي بتكون في شكل قرحة موجودة في المهبل أو القضيب، وبتختفي لوحدها بعد اسبوع، المشكلة لو ماخدناش العلاج في الفترة دي، المرض بينتقل للمرحلة التانية، واللي بتظهر أعراضها بعد كام شهر في شكل طفح جلدي في الأعضاء التناسلية أو على الإيدين والقدمين أو فقافيق في الفم،

 تاني الأعراض دي بتختفي لوحدها من غير علاج، وبالتالي لو متعلجش المريض حيدخل المرحلة التالتة اللي حتظهر بعد كذا سنة وبتكون تاثيرها على القلب والمخ وملهاش علاج لو وصل المرحلة دي،

 أهم حاجة العلاج في اول مرحلتين قبل ما نوصل لمرحلة اللاعودة …

عشان أقولكم المفيد والملخص: 

– التشخيص المبكر مهم جدا لتفادي الأعراض والمشاكل المستقبلية، يعني مع ظهور أي عرض لازم تروحي للدكتور علطول و ماتستنيش، لان العلاج بدري بدري مهم لتفادي المضاعفات، والعلاج للطرفين مهم جدا جدا …

 – تاني حاجة وآخر حاجة، الوقاية خير من العلاج،

وهنا مهم اوي أقول إن الأمراض دي مش هتيجي لأي طرف إلا لو كان على اتصال جنسي بشخص مصاب، وبالتالي الوقاية ممكن تكون عن طريق استخدام الواقي الذكري condom ومش حيمنع بنسبة ١٠٠٪ … في بعض الأزواج بيستخدموه لكن كوسيلة لمنع الحمل وليس كوسيلة لمنع انتقال الامراض الجنسية لأنه مش معقولة يتم استخدامه لمنع انتقال امراض جنسية المفروض انها مش حتيجي لحد منهم الا لو كان علي اتصال جنسي بطرف اخر مصاب … 

نخلي بالنا ان الاتصال الجنسي مع أكتر من حد ممكن مش بس يضر الشخص نفسه و ينقل له أمراض خطيرة، لأ ، ده كمان بينقل الأمراض دي لشريك حياته الحقيقي ، و ممكن يعرض حياته للخطر ، وبالتالي لو ظهرت أي أعراض غريبة مانستناش و نروح نكشف علطول عشان نقدر ناخد العلاج الصح في الوقت الصح …

دمتم أصحاء!