in ,

Have you watched “Don’t Look Up” Movie?

الفيلم التريندنج رقم واحد في مصر اليومين دول علي Netflix ، هو فيلم Don’t look up   و اللي فاز بسبع جوايز و أترشح لأكتر من ٣٠ جايزة، الفيلم  فيه مجموعة كبيرة جدا من الفنانين زي : 

 ليوناردو دي كابريو

جينيفر لورانس

ميريل ستريب

كريس ايفنز

آريانا جراندي 

جوانا هيل

كيت بلانشت

روب مورجان

و غيرهم كتير من فنانين كبار ، 

الفيلم من تأليف و إخراج آدم ماكاي  و من إنتاج Hyperobject Industries ، 

الحقيقة إني اترددت شوية إني اتفرج علي الفيلم لما لقيته ساعتين و نص ، و حسيت إن دة وقت طويل آوي علي فيلم ، بس بعد ما حمست نفسي، وربنا وفقني و شغلت الفيلم ، أحب أقولكم إني ماحستش بالساعتين و نص أصلا ، و فجأة لقيت الفيلم بيخلص ،

الفيلم ببساطة خلطة من الضحك علي حياتنا ، وواقعنا، و تفكيرنا،، و نظرتنا للأشياء حتي و إحنا عارفين إن العالم بينتهي ، علي إنك بتبدأي  تتخيلي لو حصل فعلا هنعمل كدة بجد؟ 

الفيلم بشكل سلس و مليان سخرية ,بيورينا إيه اللي ممكن يحصل لو عرفنا إن العالم هينتهي كمان كام شهر ، و إد إيه التكنولوجيا و أخبار النميمة عندنا أهم من حياتنا و من نهاية الكوكب !

الفيلم بيدور علي عالمين الفلك من جامعة ميشيغن و هما : راندل ماندي و اللي بيمثله “ليوناردو دي كابريو” و  كات ديابسكي و اللي بتمثلها”جنيفير لورانس،  ديابسكي بتكتشف وجود مذنب ضخم في الفضاء -و اللي بيتسمي بإسمها في الفيلم لإن هي اللي أكتشفته-  المذنب جاي ناحية الأرض بسرعة كبيرة ،و هيصطدم بكوكب الأرض ، و دة اللي ممكن يقضي علي كوكب الأرض كله كمان ٤ شهور ، الفيلم كله بيدور عن رحلتهم في إنهم يوصّلوا المعلومة المهمة جدا دي لأصحاب القرار، اللي كان ممكن يعملوا دفاع نووي قوي للمذنب عشان يغير مساره و ينقذوا كوكب الأرض ، و اللي في رحلتهم بيقابلوا كمية مواقف مضحكة جدا و تجاهل من الكل لكلامهم إذا كان بيتعارض مع مصالحهم،

الفيلم بيبن إد إيه إرتباطنا بالتكنولوجيا و النميمة و الفضايح و التفاهة، و إن  ليهم الحيز الأكبر من تفكيرنا حتي لو عارفين إننا هنموت  كمان كام شهر .

طبعا الطريقة اللي إستخدمها مؤلف و مخرج الفيلم ” آدم ماكاي” في عرض تعامل السلطة السياسية في إمريكا لقضايا كونية خطيرة ، كان مليان بالسخرية و الأسقاط علي واقعنا الجميل، و إزاي تقدر السلطة تلعب بحياة الكوكب كله عشان تغطي علي فضايح أو عشان انتخابات ، و إد إيه التفاهة و المصالح و الشهوة و الثروة ،مأثرين مش بس علي أصحاب القرار و السلطة ، لا دة كمان سهل يخليهم يأثروا بيه علي عقلنا و مخنا ، و يخلوكي تصدقي غير اللي عينكي ممكن تبقي شايفاه  أصلا ،

الفيلم خلطة لذيذة عن الواقع اللي عايشينه، بالتوحد اللي معظمنا فيه من ناحية، و تمحور كل بني آدم حوالين نفسه من ناحية تانية، و المصالح اللي بتدوس علي إي علاقة إنسانية، و كل دة بشكل ساخر و كوميدي ،

وفي النهاية بيوصلك لنتيجة غير مباشرة ، إننا فعلا عندنا حاجات كتيرة ، إن ماكانش كل حاجة ، ومع الجري في الحياة و محاولة مواكبة أحداثها ،بنتلهي و مانقّدرش الموجود ، لحد ما مابيقباش  في حاجة أصلا، 

إما عن فكرة إن التكنولوجيا هي اللي هتنقذنا ، بيوريك الفيلم إن في لحظة معينة ممكن تبقي هي  سبب ضياعنا ،

الجانب التقني ، مش هتكلم عنه كتير، لإنه ببساطة لما أقولك فيلم ساعتين و نص ، أتفرجت عليه و ماحستش بيهم ، دة يقولك إن أكتر حاجة مميزة في الجانب التقني للفيلم جنب الورق المكتوب حلو، هو المونتاج و التقطيع و النقل من مشهد لمشهد ، و دة مش هيتحقق غير لو الصورة حلوة و مريحة و النقلات سهلة  ، مدير التصوير” ليونس ساندجرين “عامل صورة حلوة جدا و التفاصيل مش منسية خالص ، المونتاج السهل الناعم “لهانك كوروين” من أهم عوامل نجاح الفيلم، 

وديما أغاني إي فيلم يا بتنجح إنها توصلك الحالة ،يا بتطلعك من الموود أصلا ، هنا  أغنية آريانا جراندي  و كيد كودي في آخر الفيلم ، وصلتنا للحالة بسهولة ملحوظة و علت إحساسنا بالتوحد مع الممثلين في الفيلم بقلقهم و توترهم و دعاويهم،

 بشكل عام الجانب التقني كله للفيلم متوازن مع بعضه، و مكمل بعض بشكل سلس جدا و من غير إي فزلكة.

نصيحتي ليكم أتفرجوا علي الفيلم لإخره خصوصا بعد الأسامي عشان في مشهد إعادة تعمير الكوكب، إعمالا بمبدأ سفينة نوح سيكا، أو جملة فؤاد المهندس “إكس لا يموت ” سكسوكتين، إيهما أقرب لمخيلتك.

Enjoy watching  “ Don’t Look Up “

بقلم نسمة مدحت

Nesma Medhat ُEntaleqi Chief Editor/Writer/Marketer/ Vlogger /Storyteller and Author for published book “إاللي إسمه إيه”

What do you think?

Written by Editor

Comments

Leave a Reply

Your email address will not be published. Required fields are marked *

Loading…

0

Comments

0 comments

ازاي تحاربي التوتر و الظروف و تحافظي علي سلامك الداخلي ؟

ايه هي أشهر الأمراض المتنقلة جنسيا، وأعراضها، وطرق علاجها؟