أنا بومة أنا فقرية

يوووووه كتشير أوي بيقولوا كده علي نفسهم، و أنا منكم علي فكرة عادي جدا ، هحكيلكم موقف مرة حصل لي مع واحدة صاحبتي عشان بس أقرب لكم الوضع لواصل لإيه؟ بصوا بقي أنا و صاحبتي دي نعرف بعض من أيام حضانة و الحقيقة إن حظي و حظها يعني زي ما تقولوا كدة أسوا من بعض ، المهم إننا في يوم إتقابلنا بدري عشان ننزل نفطر و الدنيا تمام و الناس بتطلب و كله أخر حماده ، المهم دخلت أنا و هي الطابور بقي عشان نطلب ، هوب السيستم وقع، متضحكوش اه والله بجد ، المهم لاقيتها بتقولي يالا نطلع من الصف خلي الناس تاكل، هنجوع الناس دي كلها ، بس أنا إعترضت و قلت لها بنت عيب كدة، إحنا أه فقريين بس مش للدرجة دي ، دي عكوسات مش إحنا اللي وقعنا السيستم ، و أصرِيت نقف و نستني و نطلب ، ثقة في الله نجاح اومال ايه ؟

موضوع إن في كتير مننا شايفين إنهم فقريين دة منتشر كالنار في الهشيم أي والله ، أنا قابلت و بقابل ناس كتير جدا من مستويات و أفكار و معتقدات مختلفة لكن الله لقيت تقريبا ٩٩.٩ منهم حاسيين نفسهم فقرين ، يعني مثلا يدخلوا مشروع فيقف ، يجوا يروحوا مكان يلاقوه قفل ، يتفقوا علي سفرية فيشيلوا البحر …و هكذا، كلها تفاصيل صغيرة مش عارفة مكبرين الموضوع ليه ؟ 

أعرف ناس من كتر ما لما بيجوا يعملوا حاجة أو يتبسطوا أو ينجزوا حاجة فالقصة تبوظ بيدلعوهم ويقولولهم يا  بومة، شوف الصحوبية الجميلة و الدفعة الإيجابية القوية .

بصوا بقي أنا شخصيا بقابل من دة كتير عادشششي جدا ، فكركوا بتاثر ولا بياس؟ نوووو ابداااا ، أنا عندي مبدأ إن إن شاء الله دي كلها عكوسات و بتحصل لمعظم الناس ، هتقولولي جايبة الثقة دي منين ؟ هقولكم والله الحمد لله مش عارفة هي ثقة في الله نجاح و خلاص .

 طبعا أصدقائنا بتوع التنمية البشرية هيقولولنا يا جماعة دة قانون الجذب يعني لو فكرتي إنك فقرية أو بومة هتفضلي بتجذبي ليكي الحاجات الوحشة و الحظ السيئ إما لو فكرتي بإيجابية فاللي إنتي عايزاه هيتحقق، وجهة نظر برده! 

و عشان مانزعلش بتوع التنمية البشرية و لا نحسس الأغلبية العظمي إللي شايفين إن حظهم دكر و إن الحاجة بتبقي ماشية فلة لحد ما هما يدخلوا و تقف إننا مش حاسيين بيهم أو بنتكلم كلام نظري و خلاص ، إحنا هنضرب الاتنين في الخلاط ، خلونا نقول إن الحاجات الوحشة إللي ممكن تحصلك، أو الحاجات إللي بتقف لك و مابتكملش دي، أو إن كله يعمل حاجة و تعدي و إنتي تيجي تعمليها تبوظ أو الموضوع كله يقف، دة مش لإنك فقرية أو بومة، دي بس عكوسات و هتعدي ماتركزيش فيها بانك فقرية، و خلي في شويتين تفاؤل إن اللي جاي احسن بكتير ، و إن إللي مكملش، مكملش لسبب إنه ماكنش هيبقي كويس ليكي دلوقتي، يعني نعمل بنظرية إن كل حاجة بتحصل لسبب أحسن و لمصلحتك أكتر في الوقت الأنسب .

و بدل ما تخلي المثل اللي بيعبر عنك ” قليل الحظ يلاقي العضم في الكرشة “، خلي مثلك الأعلي ما قالته نيللي كريم في ب ١٠٠ وش خليكي “هااابي هااابي ” سانك يوو