!السينجل مام المفروض تبقي مقدسة مش مستباحة

زمان كان في فيلم اسمه جيري ماغواير ، فيلم كان بتاع توم كروز و كوبا غودينغ جونيور و رينيه زيلويجر، الفيلم دة بغض النظر علي إنه من أحلي الأفلام اللي كنت بحب أتفرج عليها، إلا إنه كان في جملة في الفيلم دة جامدة و معبرة أوي أوي،  لما كان كوبا غودينغ بيتكلم مع توم كروز علي رينيه زيلويجر اللي كانت في الفيلم  دة سينجل مام ، و كان بيسأله إذا كان بيحبها و لا لأ؟ و لما توم كروز ماكاتش متاكد إنه بيحبها و لا لأ،  ساعتها  رد عليه بجملة مهمة أوي ، قاله دي سينجل مام، يعني مقدسة ماينفعش تلعب بمشاعرها و لا ينفع تبقي مش متاكد و أنت بتقرب لها !

فين بقي الكلام الجميل دة من اللي بيحصل دلوقتي؟

دلوقتي بقي في  قوة جذب خارقة عند  السينجل مامز للرجالة ال undecided  ، ومابقاش في أي مراعاة من أي راجل بيتقرب للسينجل مام إنها ست شايلة مسئولية نفسها و مسئولية ولادها ، وأوقات بتقوم بالدورين مع ولادها، الأب و الأم، و في بعض الأحيان هي اللي بتبقي مسئولة ماديا بالكامل علي نفسها و علي ولادها ، يعني بتشتغل و تصرف و تربي،

قبل كدة كان ديما يتقال للراجل ماتقربش من السينجل مام غير وأنت متأكد إنك بتحبها و عايزاها، و مستعد تشاركها في حياتها و مسئولياتها، مش تبقي عبء عليها ، سواء نفسي أو عاطفي أو مادي، 

يعني الست دي أصلا  شايلة كتير، و مش مستنية اللي جاي يكتشف نفسه معاها، لإنه أصلا متلغبط فهيلغبطها معاه ، و يشيّلها هم أكبر فوق همها ،

اللي بيحصل دلوقتي و بنسمع عنه كتير ، إن الرجالة بتقرب من السينجل مام بدم بارد، عادي يعني ، بيعتبرها مستباحة و متاحة،  سمعنا كتير مؤخرا عن رجالة بيكون ماتجوزش قبل كدة و يبقي معاه سينجل مام في الشغل أو أتعرف عليها في أطار أصدقاء أو غيره، و هوب تلاقيه بيقرب لها و يهتم بيها و يعلقها بيه ، و هوب برده يعمل مفاجأة من تلات مفاجأت :

يا اما يقولها مش هقدر أكمل ، أصلي بخاف من فكرة الأرتباط!

يا اما الأسوأ يقولها أصل أهلي مش هيوافقوا عليكي عشان مطلقة أو أرملة وعندك أولاد! 

يا اما بقي يقولها عشان عيلتي وأهلي فأحنا نفضل متصاحبين أو نتجوز عرفي !

السؤال هنا ، هل حضرتك هي فجأتك يعني؟ يعني ماكنتش تعرف قبل ما تقعد تقرب لها و تعلقها بيك ، و تحسسها إنك ممكن تبقي شريك حياتها ، إنها سينجل مام ؟ فأنت يا حرام أتخضيت؟!

كام واحدة من السينجل مامز، و اللي بقوا كمية كبيرة من الستات في مجتمعنا دلوقتي عاشت تجربة زي دي ؟ و كام واحدة أتعذبت و جلدت ئاتها إن أكيد هي السبب، أو عملت إيه عشان يشوفها قليلة كدة؟ ودة آثر عليها و علي نفسيتها اللي أكيد بتآثر علي ولادها!

لكل راجل ممكن يتشد لسينجل مام ، إليك هذه النصيحة!

السينجل مام ست شايلة مسئولية ،و عديت بتجربة فاشلة، أو تجربة مكملتش، الست دي أكتر حاجة ممكن تبقي محتاجاها هي أحساس التقدير و الأحترام و السند و الأمان و الاستقرار ،

فلو حضرتك ، مش عارف، مش متاكد، مش فاهم ، إنت بالظبط حاسس لها إيه؟ أو عايز منها إيه ؟ يبقي ياريت تحترم خصوصية حياتها و ماتقربش ليها ، و ماتكونش سبب في هم زيادة ليها و عدم تقدير منك لإنها ست بتربي ولادها لوحدها ،

فلو ماكنتش هتبقي دعم يبقي ماتبقاش كسرة ضهر تانية ليها!

المجتمع كله، و خصوصا كل راجل فيه، محتاج يفهم إن السينجل مام لازم تبقي ست مقدسة مش ست متاحة و لا مستباحة لأي راجل undecided !