Editor
السؤال دة بنسمعه كتير من رجالة وستات حاليا، يعني بقي مش مفهوم ليه راجل فوق ال ٣٥ و مش بيفكر يتجوز؟
أو مش عايز يتجوز ؟
لما قعدت كدة أتفحص الموضوع ، لقيت أسباب مختلفة لانعدام الرغبة في الجواز للرجالة اللي يعتبروا مش صغيرين ، الا و هي :
١-عايز عروسة متفصلة علي مزاجه،
يعني ايه؟
عارفين كدة أداء الفنان محمد رياض في مسلسل ” لن أعيش في جلباب أبي” ، غريبة أوي روزالين دي !
متفتحتة و عندها شخصية و في نفس الوقت متدينة ، و كروهات بس في نفس الوقت مقلمة ، الله ، simple ذوجي.
الحقيقة إن رجالة كتير بقت بتطلب حاجات كتير في العروسة اللي بيحلم يتجوزها ، مع العلم إن اللي بيطلبه دة موجود كتير عااادي ، بس لما بيلاقيه بيخاف سيكة ، فيطلع فيها القطط الفطسانة، و يقولك ،لأ ، مش هو دة اللي أنا عايزه ،
محدش فاهمني !
حضرتك أحنا بنحاول والله نفهمك بس أنت مش فاهم أنت عايز إيه عشان احنا نفهمه! وبعدين لما نطلب مواصفات معينة لازم يبقي عندنا أدها أو أكتر ، يعني لازم تشوف أنت حقيقتك اد ايه و اللي بتطلبها حقيقتها اد ايه؟ عشان يبقي في توازن ، يعني حقك قطعا تطلب انجلينا جولي لو انت براد بت و لا ايه؟
٢-شخصيتها قوية بزيادة ، و دي بقي يتخاف منها ،
نظرا لان بقي في انتشار لحالة إن الرجالة مش بيقوموا بدورهم الطبيعي، فبنات كتير بقت معتمدة جدا علي نفسها ، و بتكبر و تقوي شخصيتها و اعتمادها علي ذاتها ،
هنا بقي رجالة كتير تخاف منها ، بدل ما يطبق مقولة إن الست القوية في يوم هتبقي هي جيشك الوحيد لو عرفت تحتويها ، بيروح يهرب من البنت اللي محققة نفسها ، و يقولك دي بقي هتتنط عليا و مش هعرف أمشي كلامي عليها ،
فاكرين فيلم ” محامي خلع ” لما قالها أنا في بيتي أحب ابقي الديك الوحيد ، ماحبش ديك تاني يكاكي في وشي ، هو دة بالظبط الأداء يخاف من البنت القوية و اللي عندها شخصية ، يا مش هيعرف يتحكم فيها ، يا هتاكل الجو منه ! و دة طبعا للرجالة اللي بتبقي شخصيتهم ضعيفة، اما الراجل اللي شخصيته قوية فهتلاقيه بيتفهم و يقدر جدا الست القوية و بسهولة يعرف يحتويها.
٣-أجيب واحدة أصرف عليها ليه؟ أنا كدة حر و ليا من كل بستان زهرة!
طبعا هنا بقي يظهر و بقوة الراجل متعدد العلاقات ، يقولك ما كل حاجة متاحة و موجودة، أتجوز ليه؟
ليه أجيب واحدة اصرف عليها ، ما اخلي فلوسي ليا و اتبسط بمزاجي ،
الدنيا مفتوحة قدامي بكل الاوبشنز ، أضيقها علي نفسي ببيت و ست و عيلة و مسئولية ليه ؟
و طبعا مش محتاجين نقول إن الموضوع غالبا عند النوع دة بيقلب بإدمان و بينتهي بانه بيقضي كل حياته لوحده و غالبا بيموت لوحده، صدمتك؟ إني آسف!
٤-يبغي يتجوز واحدة أصغر منه ب ١٥ /٢٠ سنة
يقولك ايه بقي؟ انا عايز واحدة صغيرة تدلعني و في حالات كتير مايقدرش يواكب حياة الأصغر منه ، زي كدة في friends لما روس قرر يصاحب الطالبة اللي عنده و مقدرش يواكب حياتها و تفاصيلها ،
ولما يقابل واحدة في آواخر العشرينات أو أوائل التلاتينات ، نلاقيه بيسألها، و أنتي ليه مارتبطيش قبل كدة؟ و يبدأ يشك بقي ، يعني ايه ماتخطبتيش و لا دخلتي علاقة ؟ أنتي معقدة؟
طيب و هي ليه ماقالتش عليك معقد يعني ؟ مش ممكن يبقي محصلش نصيب في حاجة ، بس كدة، من غير ما تبقي معقدة و لا حاجة!
٥-الخوف من الارتباط،
زي ما في بنات كتير بتخاف من الارتباط في رجالة كتير كمان بيترعبوا من الفكرة، بيخافوا من المسئولية، بيخافوا و بيترعبوا من فكرة الفشل ، بيخافوا أصلا من فكرة انه يحب واحدة و يتعلق بيها ، بيخافوا من فكرة الاحتياج و الارتباط و المسئولية بكل صورها.
الحقيقة إن الأسباب تنوعت و اختلفت و طبعا في جزء ليه علاقة بالإمكانيات المادية ، بس اللي بنتكلم عنهم هنا هما اللي ميسرين ماديا و مع ذلك بيتلككوا عشان مايتجوزوش، سواء لأسباب و مشاكل نفسية، أو عايزين يفركوا مصباح علاء الدين عشان يجيب لهم فتاة أحلامهم من عالم موازي بغض النظر عن امكانياتهم هما الحقيقة، بس المهم طلباتهم تبقي أوامر ،
ودول ليهم حل و دول ليهم حل،
الأمراض النفسية بتتعالج عادي، المهم نعترف بوجود مشكلة، و ناخد خطوات عشان نحلها، و نتصالح مع نفسنا، عشان نقدر نبقي أحسن و أسوياء أكتر،
اما اللي بيعانوا من نكران للواقع، و بيطلبوا أكتر من اللي يقدروا عليه، فمهم آوي يعرف و يفهم نفسه و إمكانياته، و هو بيقدم ايه بالظبط للطرف التاني، عشان يتمني اللي يتناسب معاه، فيبقي سهل يلاقي شريكة حياته اللي في تكافؤ و تفاهم بينهم.
نصيحتي الأخيرة لأي راجل مش عايز يتجوز ، ماتتجوزش!
أه ، بجد،
ماتتجوزش غير لو فعلا هتصون الست اللي معاك،
ماتتجوزش غير لو لقيت الست اللي تعرف تحترم دماغها و شخصيتها و عرفت تحبها،
ماتتجوزش لو مش فاهم إن الجواز دفا و حب و أحترام و مودة ورحمة !
ماتتجوزش لو عايز تكمل حياتك تعيشها و تموت فيها لوحدك، من غير شريكة حياة حقيقة، تشاركها فرحك و حزنك، وعايز تبقي كل يوم مع واحدة شكل!
لكن لو عرفت نفسك كويس و فهمت أنت مين؟ و عايز ايه بجد؟ وقتها بس هتعرف إنك عايز شريكة لحياتك و إنك عايز تتجوز !
بقلم نسمة مدحت
Nesma Medhat ُEntaleqi Chief Editor/Writer/Marketer/ Vlogger /Storyteller and Author for published book “إاللي إسمه إيه”
Comments
0 comments