ازاي تحمي نفسك من الغدر؟

الأيام اللي احنا فيها دي من اصعب الفترات اللي ممكن تكون بتعدي علي كتير مننا ، و فكرة الغدر بقيت منتشرة بشكل يخوف،

يعني ايه تحسي بالغدر ؟

يعني تبقي مأمنة لشخص و يخون امانتك دي بدم بارد و لا مبالاة و دي بتحصل باشكال كتير  زي :

١-تبقي مأمنة لزوج أو شريك حياة ، مأمناه علي نفسك ، علي مشاعرك و اخلاصك ليه، علي سرك ، علي بيتكم ، أو علي مستقبلكم ، و يخونك ،

يخونك بقي بعلاقة تانية،

يخونك بانه يعايرك باسرارك اللي يعرفها وقت غضب،

يخونك بانه يتصرف و ياخد قرارات تخص مستقبلكم لوحده و القرارات دي ممكن تضر حياتكم اكتر منها تفيدها

٢-شخص من عيلتك يغدر بيكي، و دي بقينا بنسمع عنها كتير اليومين دول ، 

تبقوا عايشين في بيت واحد و تحت سقف بيت واحد و يغدر بيكي، سواء ماديا أو معنويا ، 

يعني سر يكشفه، 

ملك يتصرف فيه،

يتفق مع ناس اغراب عليكي لورث او فلوس او غيره

٣-غدر في الشغل ، و دة بقي حدث و لا حرج، تلاقي ناس في وشك مبتسمين و يحاولوا يجروك لكلام عشان ينقلوه و يغدروا بيك ، 

أو تلاقيهم فجأة بيستغنوا عن خدماتك في الشغل من غير أي حقوق و لا حتي فترة انذار أو مهلة

٤-أصحاب بيغدروا بيك ، شوية يستغنوا عنك فجأة، و شوية يطلعوا اسرارك ، و شوية يستكتروا عليك اللي انت فيه فيقللوا منك و يكسروا فيك أو يحسسوك ان اللي بتوصله دة بيحصلك بالصدفة و انك ماتستاهلوش،  و يبقوا مستنين أي فرصة عشان ياخدوا اللي في ايدك ليهم 

طبعا كلنا وارد اننا نغلط، بس الصعب ان غلطنا يأذي ناس تانية قريبين مننا، 

فكرة الغدر انها بتيجي من ناس بيبقوا اكتر ناس بتستبعد انهم يكونوا غدارين ، بتبقي واثق فيهم بشكل كبيير جدا و مش متخيل انهم ممكن يأذوك بقصد أو من غير قصد، و دة اللي بيخلي الوجع و الصدمة اكبر!

و الأصعب  أو اللي بيبقي صادم اكتر هو احساسهم بانه اللي عملوه عادي، و يتعاملوا معاه بلامبالاة ، أو يتقال انك مكبر الموضوع، أو حتي يبقي في إحساس بالذنب بس مافيش أي نية لاي مجهود لتصليح اللي حصل من ناحيتهم !

و عشان الغدر بقي منتشر كالنار في الهشيم الفترة دي ، فلازم نحاول نحافظ و نحمي نفسنا من الغدر علي ما نقدر ، 

ازاي ؟

-مافيش حاجة اسمها ثقة عامية ، لاي شخص في حياتك ، الكلام دة مش معناه انك متحبيش ، أو انك تبقي شكاكة ، بس معناه انه ديما يبقي حزام امان حاطاه لنفسك من الغدر و مساحة بتحمي بيها نفسك 

-اللي غدر بيكي مرة ماينفعش ترجعي تثقي فيه تاني ، حتي لو اعتذر ، لازم تدي وقت كبير و مواقف كتير عشان تتاكدي من انه اللي عمل فيكي كدة مرة ندم حقيقي و مش ممكن يكررها ، و انه حقيقي حس بغلطته و بيبذل مجهود كبير عشان يحاول يرجع ثقتك فيه

و أخيرا بقي ، التسليم  بحسن نيتك وبان كله سلف و دين  هيريحك الي حد ما في قصة الغدر دي، يعني اللي هيتعمل فيكي من شخص انهاردة، هيترد له بشكل أو بآخر بعد كدة ، سواء عرفتي أو معرفتيش، فخلي نيتك ديما صافية و خليكي مأمنة انه اللي هيغدر بيكي هيدفع التمن و هيتغدر بيه !

مش بقول نقاطع الناس و لا نشك في كل اللي حوالينا ، بس بقول نحمي نفسنا و نحافظ عليها ، يعني عامل الناس بحدود تعيش راضي و مبسوط، اللي يقدرك اوعي تفرط فيه ، و اللي يبيعك اعتبره مش موجود !