هي السوشيال ميديا بجد ممكن تخرب بيوت؟

من فترة مش بعيدة، كان الواحد لما بيبقى عنده مشكلة في أي حاجة في حياته بيلجأ لأهل الخبرة والتخصص، او كان بيحكي و بياخد رأي دايرته المقربةمن الأهل أو الصحاب.

 وقتها ماكناش بنسمع عن حوادث ولا جرايم ولا مشاكل وخيانات زوجية بالشكل اللي بنسمع عنه دلوقتي عشان كل واحد كان قافل على نفسه.

دلوقتي بعد ما السوشيال ميديا بقت متحكمة و داخلة في كل حاجة في حياتنا، بقينا نُعتبرعايشين كلنا في أوضة و صالة .. ويمكن كمان على نفس السرير!للأسف أي حد بقى سهل اوي يعرف أي حاجة عن حياة أي حد و مش بس يعرف، ده من حقه كمان يقول رأيه في حياة أي حد، وده طبعاً من غير أيمراعاة لخصوصية او مشاعر الاشخاص.

للأسف السوشيال ميديا ممكن تأثر على الحياة الزوجية بطرق كتير جداً مباشرة وغير مباشرة، فمثلاً ممكن نكون عايزين نثبت لنفسنا و للناس اننامبسوطين و ده اللي يخلينا نستمد السعادة و الثناء من اننا نظهر الحاجات الحلوة قدام الناس كلها عشان نسمع منهم كلام حلو، بس الواقع ان ماحدشبيصور ولا بيتكلم عن خيبته على السوشيال ميديا و ان كل ده عالم افتراضي.

وفي بقى التأثير المرعب .. من خلال قراية الافكار و سماعها من خلال ال smart phones  و ترجمت  ده في كمية البوستات عن المواضيع الليبنبقى لسة  بنفكر فيها او بنتكلم عنها و نلاقيها في وشنا،  فمن غير ما نحس نفتكر ان دي كلها رسايل لينا أو signs أو redflags! 

رغم اقتناعي قبل كدة انه عادي كل الناس تحط صورها و تقول رأيها و ت share اللي مقتنعة بيه او بيعبر عنها.. الا ان التجارب اثبتت النتائج السلبية لكل ده ألا وهي:

• احنا بنسيب نفسنا نتأثر بكلام ناس لا نعرفهم ولا يعرفونا ولا هم أهل خبرة أو تخصص تأهلهم  يدوا نصيحة مفيدة بجد. 
• احنا بنعلى و بنوطى بسقف توقعاتنا و طموحنا بناءً على كلام ناس ماتعرفش حاجة عن حياتنا ولا عن ظروفنا ولا احتياجاتنا.
• احنا بنتأثر بالسوشيال ميديا لدرجة ان بوست ممكن يقلبلنا يومنا ويغيرلنا تفكيرنا ومشاعرنا، وكومنت نقراه ممكن يقومنا على جوازاتنا! :D
• احنا متخيلين ان بروفايلاتنا safe zone وبنتكلم براحتنا كلام عام من ورا سكرين، بس الحقيقة ان الناس بتتكهن حاجات عن حياتنا و عنعلاقتنا الزوجية من status أو كومنت كاتبينه أو صورة لينا.

بعد مشاكل كتير حصلتلي في حياتي  شخصيا و بعد وقفة مع نفسي .. بدأت أستوعب قوة وتأثير الكلمة اللي بتتقال على نفسية وحياة اللي بيسمع. بدأتأفهم انا ليه كنت بفرح و بتعشم و بكتئب و بتشحن وبنهار فجأة! 

لو أخدتي لحظة تتفرجي أزاي ممكن واحدة أو واحد يعرض مشكلة حميمية أو خاصة جداً على جروب أو ياخدوا رأي الناس في حاجة خطيرة و مصيرية، و بصيتي على ردود الناس هتلاقي بلاوي وكم مشاكل نفسية رهيبة تتلخص في الآتي..

 – في اللي بيُحكم على الناس فبيجرح بالكلام و بيهاجم.

– في اللي بينصح من واقع تجربته هو، من غير ما يحط نفسه مكانك. 

– في اللي بيقوّم و بيحرض بمنتهى الصراحة عشان جواه غضب أو غيرة فياللا كلنا نعيش تعساء مع بعضينا.

– في اللي بياخد الموضوع بسخرية و كأن كلنا تافهين جنب مشاكله هو.

عشان كدة لازم نبعد عن الآراء ال extremes و ال solid، لأن كل واحد حياته مختلفة عن التاني بكل تفاصيلها.

والأهم اني بدأت أفهم يعني ايه “البيوت أسرار” و أسرار البيوت ليها حرمتها”، و أن للأسف المقارنات العلنية خلت النفوس مش صافية و مش كلنا بنتمنى الخير لبعض و بننصح بما يرضي الله.

أعتقد الحل الأول للمشاكل دي  هو :

-اننا نتعلم نعملmental & emotional block  لما نشوف أو نقرا أو نسمع افكار أو أحداث أو مشاكل أو صور أو آراء ممكن تضايقنا أو تأثرعلينا بالسلب. 

–نحاول نفصل بين ال real life و بين ال social media fantasy life، وندرك ان ماحدش هايعيش بدالنا! 

احنا ادرى بالحلو والوحش اللي في شريك حياتنا .. 

احنا ادرى نقدر نقبل ايه ومانقبلش ايه ..وايه أولاوياتنا.

 احنا ادرى امكانيتنا ايه و نقدر نعيش ازاي من غير مانبقى مضغوطين. 

الحل التاني أن يبقى في مجال اننا نعرف نفضفض مع ناس trusted & professional زي أيام ما قبل السوشيال ميديا، و كمان أن يبقىفيrestrictions  على الردود و النصايح اللي بتتقدم على الجروبات المخصصة بالذات للعلاقات الزوجية.

والأهم اننا ندرك اننا لما نسمع كلام الناس و ناخد أي قرار يخص حياتنا الزوجية، ماحدش هايتحمل عواقبه غيرنا في النهاية .. عشان في الآخر انتوااللي هاتعيشوا حياتكوا بكل تفاصيلها مش أي حد تاني.