خمس نصايح للوقاية من سرطان الثدي

في شهر أكتوبر ، شهر التوعية بسرطان الثدي خلينا نقولك شوية معلومات عن سرطان الثدي و ازاي ممكن نحاول نحمي نفسنا منه :

١-سرطان الثدي نسبته كبيرة جدا بين السيدان يعني واحدة من كل ٨ ستات مصابة بسرطان الثدي

٢-فرص الإصابة بسرطان الثدي بتزيد مع وجود تاريخ عائلي للمرض 

٣-سرطان الثدي ممكن يجي من عوامل مكتسبة في حياتنا 

٤-سرطان الثدي ممكن يجي نتيجة لطفرة وراثية

طيب المعروف عن السرطان عموما انه مرض متعدد العوامل ، يعني ممكن يحصل لاكتر من سبب و من هنا بتيجي خطورته، الا انه في النهاية زيه زي أي مرض تاني لو تم الكشف عنه بدري بتقدر توصل نسب الشفاء لاكتر من ٩٩٪، عشان كدة هنكتب لكم في المقالة دي اهم ٥ حاجات ممكن تعملي لهم عشان تحمي نفسك من المرض دة:

أولا: الفحص الذاتي الشهري 

مهم اوي كل شهر تعملي فحص ذاتي لجسمك و لو حسيتي باي حاجة غريبة تروحي تكشفي علطول لانه زي ما قلنا الكشف المبكر مهم جدا جدا للعلاج

ثانيا:الفحص الدوري المتخصص 

لو متاح كل ٣ شهور تعملي full check up.  يبقي هايل و دة بيطمنك علي نفسك عموما و علي أي بوادر سرطان لا قدر الله، و طبعا زيارة عيادات الكشف المبكر لسرطان الثدي مهمة جدا جدا بشكل دوري

ثالثا: الاكل الصحي و فيتامين د 

طبعا الاكل الصحي مهم جدا لصحتنا عموما و للوقاية من السرطان خصوصا ، يعني زودي في اكل الفاكهة و الخضار و المكسرات و البقوليات ،دة غير طبعا الاهتمام بفيتامين “د” اللي ممكن تاخديه من التعرض للشمس قبل الساعة ١٠ الصبح و بعد ٤ العصر، و الاكلات الغنية بفيتامين “د” و ممكن تاخديه كمكملات غذائية بعد ما ترجعي للدكتور بتاعك،  كل دي حاجات بتساعد جسمك يبقي اقوي و لو تعبتي في أي وقت جسمك يقاوم احسن

رابعا: حافظي علي وزنك و العبي رياضة

من اهم الحاجات ان وزنك مايبقاش زايد لان دي حاجة بتأثر علي فرص اصابتك بالمرض ، و كمان مواظبتك علي لعب الرياضة هيساعد جسمك يبقي صحي اكتر و يحميكي من المرض

خامسا: تجنب التبغ و الكحوليات

التبغ من اكتر الحاجات اللي بتسبب السرطان بأنواعه المختلفة، فتجنب التبغ و التدخين مهم جدا ، و كمان الكحول تقليله مهم جدا للوقاية من سرطان الثدي 

و طبعا لو هتجيبي أطفال يبقي طبعا الرضاعة الطبيعية من اهم الحاجات الطبيعية اللي بتحمي من سرطان الثدي ،

في النهاية نتمني لكل ست الصحة و السلامة و تفضلوا بتخلوا بالكم من صحتكم ، دمتم سالمين !