توقعات الفلك للأبراج في ٢٠٢٣

بنستني مع قرب كل سنة جديدة فقرة توقعات الفلك للابراج، و الفلك في حد ذاته علم و اسع و ضخم و من أيام قدماء المصريين و احنا بنهتم بيه جدا ، وتوقعات الفلك لسنة ٢٠٢٣ بدأت تظهر و عشان كدة هنبدأ بيهم برج برج :

أولا ، الحمل : 

كوكب المشتري هيزور برج الحمل ، و دة معناه ان كوكب الحظ هيزور البرج  ، و المشتري بيزور الحمل كل ١٢ سنة مرة ، و هيبدأ المشتري  يزور برج الحمل من يوم ٢٠ ديسمبر ودة معناه ان مواليد الحمل  بيخلصوا سنة ٢٠٢٢  بسعادة وراحة و بيبدأوا السنة الجديدة بسعادة كبيرة ، برج المشتري في الحمل دلالة علي تغييرات مفاجئة و إيجابية للبرج في ٢٠٢٣، و طبعا لازم نخلي بالنا ان مش كل مواليد برج الحمل هيحصل لهم التغييرات في نفس الوقت ، لان كل واحد بميعاد ولادته بيتأثر بزيارة المشتري في برجهم ، و المشتري هيفضل في برج الحمل لمدة ٥ شهور ، يعني اول خمس شهور هما اهم وقت و هو الوقت المناسب للقرارت الكبيرة و المهمة لمواليد برج الحمل ، و من بعد اول خمس شهور هتقفلوا صفحة و تفتحوا صفحة جديدة و مرحلة جديدة،

احواله العاطفية في شهر ابريل هيكون في احداث مهمة في حياتهم العاطفية و ممكن يتعرضوا لاوقات صعبة نظرا لكسوف الشمس،

ظروفهم المالية هتتفتح و هتتحسن كتير جدا .

ثانيا ، برج الثور :

تعبوا كتير الفترة اللي فاتت و اورانوس اللي كان في برج الثور تعبهم كتير جدا بس زحل هيطلع من البرج و يريح أصحاب برج الثور شوية، و الخبر الحلو ان في ١٧ مايو هيوصل المشتري في برج الثور و هيفضل عندهم لاخر السنة ، و دولاب الحظ هيوصل عند برج الثور و اللي بقالهم ١٢ سنة مستنينه، هيرجعوا يقفوا علي رجلهم و هيرجعوا يتحسنوا جدا ، ولان مواليد برج الثور بقالهم ٤ سنين في ظروف صعبة ، فمع ٢٠٢٣ هيبدأ الوضع يتحسن بالنسبة لهم ، 

عاطفيا كان عندهم حالات انفصال و طلاق خلال ال ٤ سنين اللي فاتوا ، و في ٢٠٢٣ هيرجعوا يتصالحوا و هياخدوا قرارات مهمة في الجواز و الرجوع و الصلح، ظروفهم المالية هتبدأ تتحسن  كمان .

ثالثا، برج الجوزاء:

الجوزاء كان برج المريخ عنده بقاله فترة طويلة و عشان كدة كان تعبان بقاله فترة طويلة و هيخرج منه في ٢٥ مارس، الحظ هيكون عند برج الجوزاء علي شكل دعم ، دعم من عيلة ، من شغل، من أصحاب، و خصوصا اول ٥ شهور ، باقي السنة محتاجين يعتمدوا علي نفسهم بشكل كبير عشان يكونوا مرتاحين و مبسوطين،

عاطفيا هيتحسن بشكل كبير لان المريخ كان مخليه عصبي و هجومي و مع خروجه من البرج هيهدأ و يتحسن عاطفيا

رابعا، السرطان :

المشتري هيساعده جدا لانه هيكون بالنقطة الاعلي عند السرطان فلكيا اول خمس شهور ، و بقية السنة هيكون ببيت الدعم و النجاحات ، السرطان عنده تغييرات كبيرة إيجابية و سعيدة جدا جدا خصوصا اول ٥ شهور ، ومهم جدا التفكير في قرارت مهمة خصوصا لان عجلة الحظ معاه ، مواليد برج السرطان عندهم شهرة، جواز، نجاحات، امورهم كلها بتتحل ، حظ ٢٠٢٣ حظ قوي جدا ، ماديا هيتحسن جدا ، عاطفيا هيكون في قرارت مصيرية يا بالاستقرار يا بالانفصال

خامسا، الأسد :

مواليد برج الأسد عندهم سفر كتير و خصوصا اول خمس شهور و في النص التاني من السنة نجمه بيعلي ، هيحققوا نجاحات و كل الأبواب هتتفتح قدامهم من اول السنة لاخرها ، من اول ٧ مارس زحل بيتحرك من عند برج الأسد و بيخلي كل امورهم تبقي احسن و اللي بقالهم سنتين و نص بيعانوا، 

عاطفيا اللي عندهم لسه علاقتهم كويسة هتبقي احسن، و اللي عندهم ضغوط لازم يخلوا بالهم اكتر خصوصا في فترة الربيع ، 

في الماديات مواليد برج الأسد هينوروا و هينجحوا و هيستقروا . 

سادسا، برج العذراء:

في سنة ٢٠٢٢ ماكانش في معاكسات كتير و كانت امورهم مستقرة بنسبة كبيرة، بالنسبة ل ٢٠٢٣ مواليد برج العذراء كل قضية ضدهم هيحلوها خصوصا اول ٥ شهور، باقي السنة اللي مقدمين علي شغل بيجيلهم ، اللي عايزين يسافروا هجرة او لشغل السفر بتاعهم هيحصل، و اللي مسافرش خالص و عايز يسافر سياحة هيسافر ، في ٢٠٢٣ كل حاجة جديدة عليه واي مغامرة عايز ياخدها هيعملها و هينجح فيها ، كل الحاجات الغير تقليدية هيبقي عندهم فرص ليها و هيعملها مواليد برج العذراء بشكل ناجح،

زحل بيخرج من الحمل للحوت في ٧ مارس و دة بيآثر علي مواليد شهر أغسطس و دة هيخليهم يحسوا ان الدنيا بتضيق حواليهم و بيبقي في بعض الضغوط و المشتري هيقلل شوية من الضغوط عليهم.

سابعا، الميزان:

هتكون سنة ٢٠٢٣ مميزة جدا لان المشتري هيكون عند الميزان بالبيت السابع و دة هيساعده جدا في الشغل ، و اللي عايز يغير شغله هيلاقي شغل احسن ، و اللي عايز يتجوز هيلاقي شريك حياة كويس، و اللي بيحسن علاقته هتتحسن، و كل دة في اول ٥ شهور، كل المشاكل القضائية و غيرها هتتحل ، بس هيكون في كسوف للشمس عند مواليد برج الميزان في ١٤ أكتوبر  بعدها في حظوظ عالية جدا و ممتازة جدا علي مدار السنة،

ماديا ، الديون الموجودة هتخلص 

و عاطفيا السنة دي تعتبر سنة الجواز عند مواليد برج الميزان 

ثامنا، العقرب:

٢٠٢٣ سنة كويسة لمواليد برج العقرب ، حياتهم المهنية هتبقي كويسة جدا جدا ، عندهم بعض المعاكسات من اورانوس  و لكن السبع شهور الأخيرة الدنيا هتفتح في وشهم في الشغل و هتتظبط للاحسن ، 

ماديا سنة مستقرة بالنسبة لهم وبتتقدم للاحسن

عاطفيا هيكون عند كتير منهم جواز ، و في منهم هيكون عندهم اضطرابات كبيرة في حياتهم العائلية فلازم يخلوا بالهم . المشتري بيخفف من تأثير اورانوس علي مواليد برج العقرب و لكن لازم يخلوا بالهم في قرارتهم.

تاسعا، القوس:

هيبقي المشتري في البيت الخامس و دة بيخلي حظه قوي جدا جدا في ٢٠٢٣ ، كل حاجة فيها حقوق فكرية عند مواليد برج القوس هتبقي مزدهرة و هيلاقي فيها نجاح قوي جدا، السنة دي لمواليد برج القوس هتديه حياة رائعة علي جميع الأصعدة ، سواء للمتجوزين او اللي مش متجوزين ، كل الفرص مفتوحة عند مواليد برج القوس و خصوصا اول ٥ شهور و باقي السنة ظروفه الصحية و ظروف الشغل هتكون كويسة جدا جدا .

عاشرا، برج الجدي :

بلوتو هيطلع من برج الجدي و دة خبر سعيد لان الكوكب دة بقاله ١٣ سنة في برج الجدي و تعبه جدا جدا، في فترة نقاهة من اول فصل الربيع و في ٢٠٢٤ هيخرج تماما من الجدي و يريحه تماما ، كمان المشتري هيساعد مواليد الجدي  علي المستوي الشخصي و العائلي و الشغل  ، مواليد برج الجدي هيكون في احسن احواله في ٢٠٢٣ و هتبدأ الدنيا تتحسن معاهم بنسبة كبيرة، هيكونوا من اكتر الأشخاص الأقوياء و اللي حظهم كويس في ٢٠٢٣.

الاحد عشر ، الدلو :

بقالهم سنتين و نص عندهم كوكب زحل و اللي خلي  كل حاجة في حياتهم اتلغبطت و كانت حياتهم تعيسة، في فترة الربيع هيعدي بلوتو علي مواليد الدلو و هيوترهم كمان شوية ، بس الحلو ان المشتري هيقلل من التوترات و هيساعد الكل، احتمال يكون في شغل جديد واحتمالات السفر للشغل و هيبدأ الحظ يتحسن من بعد الربيع لمواليد الدلو 

الثاني عشر ، الحوت :

مواليد الحوت هيوصل عندهم كوكب زحل في ٧ مارس و هيأثر عليهم لاخر السنة ، و لحسن الحظ في ٢٠٢٣ ان المشتري كوكب الحظ بيساعد كل الأبراج خلال السنة و بيحاول يخفف عنهم و يديهم حظ في مجالات مختلفة،

 لكل مواليد الحوت لازم يخلوا بالهم من صحتهم الجسدية و النفسية ، لازم ياخدوا بالهم من قرارتهم و من علاقاتهم بشكل كبير و يحاولوا يتجنبوا المشاكل علي جميع الأصعدة ، و كل ما تكونوا مرنين اكتر هيساعدكم تاخدوا احسن حظوظ السنة دي .

المعلومات المهمة دي طبعا مانقدرش نكتب فيها من غير ما ندور كويس و نرجع لكلام علماء الفلك، عشان كدة المعلومات القيمة دي بترجع لعالمة الفلك نادين شماس .

نتمني لكم سنة مليانة حظ و سعادة و اخبار حلوة علينا كلنا ، و كل سنة و انتم طيبين