انا متجوزة من سنتين ونص وحياتي كانت حلوة اوي بعد ما خلفت حياتي مبقتش حلوة

Question

انا متجوزة من سنتين ونص وحياتي كانت حلوة اوي بعد ما خلفت حياتي مبقتش حلوة مبقتش مبسوطه مع اني بحب البيبي جدا وبموت فيه، بس مفتقده حياتي انا وروقاني والوقت اللي بقضيه مع جوزي بقيت كئيبه ونكديه وعندي احساس انه مش عايز يقعد معايا بتخانق كل لحظه. الحياة بقت وحشه اوي ومش عارفه اتغير ومضايقه اوي انه معدش عنده اي شغف ليا ولما بساله بيقول لا انا لسه بحبك بس ان حاسه لا هو كويس انا اللي بقيت حساسه وحزينه طول الوقت ابني عنده سنة ونص نفسي ارجع مبسوطه ونفسي ابسطه انا زعلانه اوي ان حياتي بايظه كده وانا معنديش مشكله كبيرة مبعرفش افصل بتقمص وافضل مبوزة علي اقل سبب بقيت بحس انه بيحب يبعد عني ينام في اوضه تانيه، يتاخر بعد الشغل يقعد يلعب بالموبايل طول الوقت المهم منتكلمش اعمل ايه

FEMALE, AGE 29, MARRIED

عارفه اعلان الأمومه مش ساهله بس مستاهله الجمله دى صح جدا ومعبره جدا…الامومه شئ هديه وفضل ونعمه من الخالق ويا رب يحفظ ابنك. بس قصاد كده انت مطالبه انك تعيشى لنقسك بردوا عشان تقدرى تسعدى اللى حواليكى وده طبعا بيبقى احيانا صعب وبييجى على اعصابك خصوصا ان ابنك لسه معتمد عليكى اعتماد كلى. الحل اولا انك ما تقارنيش بين شكل حياتك دلوقتى وقبل كده لان بكل بساطه الظروف مختلفه والأولويات مختلفه والأهم ان انت كمان مختلفه يعنى بكل بساطه لو جبنالك حياتك القديمه دلوقتى بردوا مش هترتاحى صدقينى

ارسمى شكل حياة تالته لمرحله جديده لشكلك و نفسك الجدىده ما تتكسفيش انك تطلبى مساعده من الناس اللى بتثقى فيهم مع ابنك. و تستغلى الوقت ده تعملى حاجه لنفسك بتحبيها هيفرق معاكى جدا و هيديكى طاقه مع ابنك و جوزك
بردوا فى ملحوظه كل جملك كاتبه فيها انا حاسه. الاحساس بيكون نتيجة فكره اسئلى نفسك ايه اللى بيولد الاحاسيس دى عندك وابتدى اشتغلى عليها. انت مرهقه جسديا ونفسيا عشان كده مش قادره تدى اللى حواليكى. شاركى جوزك وقوليلوا انا عايزاك تدلعنى شويه وتبقى جنبى أكتر وتحسسنى انك بتحبنى أكتر
بصى دايما على نعم االى فى حياتك ده هيساعدك جدا فى تغيير المود بتاعك وفى نظرتك لحياتك عمتا

Do you want to ask an expert?

Create your own user feedback survey