ازاي أستفيد من الفرصة التانية؟

فرصة تانية يعني حاولتي اول مرة… 

يعني مريتي بالتجربة قبل كدة والموضوع مش جديد عليكي….

يعني الموضوع مانفعش أول مرة وعندك فرصة تجربي تاني…

يعني عندك فرصة للإبداع…

يعني عندك فرصة تغييري أي موقف أخدتيه وتراجعي نفسك…

يعني ربنا بيقولك إنتي تقدري تعملي أحسن من كدة وفرجينا بقى…

يعني أنتي أقوى بالمعلومات والمهارات إللي أكتسبتيها من التجربة الاولى…

يعني فهمتي نفسك شوية أكتر…

لما تجيلك فرصة تانية خوضيها بنية إنك تنجحي وبشجاعة لإن ببساطة إنت في الوقت دة أنسانة أقوى بخبراتك السابقة. ممكن تخافي من الفشل ودة طبيعي لإن كلنا بنغلط ومش بنعملها صح من أول مرة ولإننا بني أدميين. الطرق دي هتساعدك إنك تستخدمي الفرص التانية بشكل أفضل وهتعلمك إزاي تتحكمي في ردود الأفعال التلقائية للمخ إللي ممكن تعطلك أو توقفك:

1. ماتتكلميش كتير في الأخطاء:

بعد إي تجربة بتحسي إنك فشلتي في حاجات كتير وبتركزي على الأخطاء وتتكلمي عليها كتير،ماتعمليش كدة! هتقوليلي طيب إزاي أتعلم من أخطائي من غير ما أتكلم عنهم؟ 

هقولك إنت لازم تتكلمي عنهم وتستفيدي منهم كمان بس غيري طريقة كلامك لنفسك عن الأخطاء دي.

القلق والتركيز على الفشل وتفسيره على أنه فشل شخصي من المصادر الأساسية لضعف الأداء. إنت لما بتشككي في ذاتك وتحطي ضغط على نفسك فالشبكات العصبية في دماغك بتنشط وتقوى ويصبح الدماغ أقل نجاحًا في حل المشكلات والتحكم في المشاعر وهتبقي شايفة نفسك فاشلة.

 ازاي تغيري ده: 

• تخيلي الاخطاء بشكل تاني. حاولي تشوفيها على إنها أخطاء صغيرة كتير بدال خطأ واحد كبير. الأخطاء الصغيرة هتقدري تحلليها وتصلحيها. 
• أربطيها بذكريات مضحكة علشان ماتزعليش كل ما تفتكريها. 
• قاومي الخوض في التفكير في فشلك وحاولي تشوفي الدروس اللازمة والمستفادة. 
• اختاري تكوني متفألة: لما تشتغلي بعقلية إيجابية ، أداءك هيتحسن في كل جانب تقريبًا. الطاقة إللي هتحطيها والتركيز على فشل واحد ممكن  تستخدميها في إنك تحطيها في الفرص الجديدة إللي فتحت. 

• خططي للأخطاء وإحتمالات الفشل

مينفعش تبدأي تجربة أو مشروع جديد من غير ما تكوني مخططة ومتنبئة للنجاح واحتمالات الخطأ والتعامل معاها.

أزاي تعملي ده:

• حطي أهداف محددة وبعيدة المدى
• تخيلي كل خطوة بالتفاصيل حتى تحديد معلومات زي “فين؟” و “أمتى؟”
• حاولي تتخيلي ممكن تبوظ معاكي فين وإيه الطرق إللي ممكن تصلحيها أو تتجنبي الخطأ ده
• ماتمسحيش الأخطاء السابقة
• حطي خط تحت أخطاءك وأفصلي إيه اللى في دائرة سيطرتك وتقدري تعالجيه وإيه اللي خارج دائرة سيطرتك أتعلمي تعديه

• متهدديش نفسك بعد تجربة الفشل

مفيش حد فينا عايز يفشل وخصوصا في الفرصة التانية والتالتة. بس حاولي ماتهدديش نفسك أو تخوفيها بأنك لازم تعمليها صح المرة الجاية لان دة بيحط ضغط وخوف من النتائج السلبية المحتملة وجلد للذات وده بيضعف الأداء ومش في مصلحتك.

 أزاي تعملي ده:

• لما تحطي هدف خليه إيجابي وبنية إيجابية ومحدد علشان تعرفي تحطي تفاصيله، مثلا ، “أنا عايزة أكتب كتاب يشجع أجيال الألفية ويديهم إحساس جديد بالقوة في حياتهم المهنية” أحسن ما تكتبي “انا عايزة أعمل إسم وسمعة لنفسي.” ده هيخليكي تستمتعي بإنجازاتك لإنك بتفيدي غيرك، وهيزيد من الدافع للاستمرار، وكل نجاح صغير هيحمسك وهيشجعك.
• أحتفظي بمذكرة دوني فيها يوميا كل مشاعرك وإللي أتعلمتيه وأنجازاتك أو أي حاجة تيجي في بالك. 
• حطي نجمة جنب نجاحاتك وأتعلمي تحتفلي بيها وبنفسك مهما كانت صغيرة
• خليكي طيبة وحنينة على نفسك وشجعيها دائما
• قارني نفسك بنفسك مش بالاخرين لان ببساطة كل واحد عندة تجربة ومهارات مختلفة

إي تجربة بندخل فيها سواء مشروع أو دراسة أو حتى جواز إعتبري إن فيها بذور لفرصة ثانية، وإحتمال كبير فرصة ثالثة ورابعة وخامسة. “من غير ماء أو تربة ممكن تفضل البذور كامنة إلى الأبد! البذور دي معمرة يمكن أن تزدهر بعد سنوات لو أتحطت في البيئة الصح وأتعرضت للمواقف والضغوط المظبوطة” المهم تستغليها في مصلحتك