لو اول سنة جامعة ، هتبقي مين في دول ؟

مع موسم المدارس و الجامعات، بنلاقي ان الكلية او الجامعة لروادها للسنة الاولي ديما ليه زهوة ، تلاقيهم ديما متحمسين ، و بيبقي في أحلام كدة من و هما صغيرين ان الجامعة دي بقي مرحلة الكبار و مرحلة الحرية من الهوم ورك ووجع القلب ، في كتير منهم حبايبي بيبقوا فاهمين ان دي مرحلة الانطلاقة ، و هي حقيقي انطلاقة لبداية طريقك في التخصص او الحاجة اللي حابب تكمل فيها، بس بيبقي في صدمة من نوع اخر ، صدمة اننا خلصنا من الهوم ورك ووصلنا لمرحلة ال projects  و ال  assignments  ، 

وما بين اللي جاي يتحرر و اللي جاي يقرر مستقبله بنلاقي types  مختلفة للطلبة، ممكن نقسمهم للأشهر  :

أولا ، الدحيحة:

ودول اللي تلاقيهم من اول ما يدخلوا الكلية هوووب بيدوروا علي المكتبة مكانها فين ؟ الجدول ايه؟ المدرج فين ؟ هيقعدوا فين ؟ ويبدأوا يعملوا سيرش عن الدكاترة اللي هيدوهم ، 

ناس داخلين مركزين ، انا مستقبلي معيد أو معيدة ، 

احنا مابنهزرش!

ثانيا، الاكيلة، اللي علطول  في الفود كورت:

ودول بقي اللي مصدر سعادتهم و انبساطهم الاكل، ديما تلاقيهم في الفود كورت ، و بيبقوا هما خبراء الاكل في الكلية ، يعني تلاقيهم بيقولوا لك تاكل ايه حلو منين ! يعني الشاورما من عند الراجل دة و اما تطلبها اطلبها لحمة مش فراخ، البيتزا من هنا ، و هكذا 

ثالثا، الفنانين  

دول اللي الجامعة بالنسبة لهم يعني تمثيل ، غناء ، مواهب، تلاقيهم اول حاجة بيدوروا عليها فريق المسرح، فريق الغناء ، قاعدين علي سلم الكلية بالجيتار و بيغنوا و الجامعة تتلم حواليهم ،اللي بيرسموا ،  يعني باختصار بيمثلوا :

 – عيسوي الفنان البوهيمي

– سينسور اوف جينيريشن

 -هاملت 

 اتجاهاتهم فنية و طاغية علي شخصيتهم . 

رابعا : البارتي جيرل و البارتي بوي !

دول اللي تلاقيهم جايين يدوروا علي الانطلاق في الجامعة، علطول بيسالوا هنخرج فين ؟ هنسهر فين؟ 

وتلاقيهم بيتعرفوا علي بعض بسرعة و بيعملوا جروبات بسرعة ، دول جايين يتبسطوا و مالهمش دعوة غير بانبساطهم !  

خامسا : السياسين أو رؤساء جمهورية

ودول اللي بتلاقيهم من اول ما يدخلوا في هدف قدام عينهم،

 اتحاد الطلبة،

 فتلاقيهم بيعملوا خطط سياسية،اجتماعيين جدا ، بيتكلموا مع كل أنماط الطلبة، بيسألوهم عن اهتمامتهم ، احتياجتهم ، و يبدأوا يجهزوا البرنامج الانتخابي، و اهم حاجة بتبقي لم الأصوات و تقديم الخدمات 

و أخيرا الميكس :

ودول اللي بيقوا عندهم من كل حاجة حتة ، يعني تلاقيهم شاطرين اوي بس بيخرجوا عادي، و عندهم ميول فنية مش معطلاهم عن مذاكرتهم و مستقبلهم ،و نفس الوقت اجتماعييين جدا و بيتعاملوا مع كل الناس، و كمان هتلاقيهم عندهم ذوق في الاكل و بيقعدوا في الفود كورت 

الحقيقة ان أي كان نمطك ايه من اللي فوق، مهم اوي اوي و انت/انتي داخلين الجامعة تعرفوا انها مرحلة زي أي مرحلة في حياتك، زي ما المدرسة كانت مرحلة و الشغل هيبقي مرحلة،

 الجامعة مش عالم مختلف و لا حاجة، الجامعة زيها زي الحياة، أوسع بس شوية من المدرسة، 

هتشوفوا فيها كل حاجة ، فيها الحلو والوحش زي أي مكان في الدنيا ،

 اهم حاجة انكم تبقوا فيها نفسكم، 

يعني هتقابلوا ناس مختلفين جدا عنكم ، مهم اوي تحترموا الاختلاف دة، و مهم اوي تبقوا حقيقين، يعني ماتحاولوش تبقوا حد غير نفسكم عشان ترضوا اللي حواليكم في المرحلة الجديدة دي من حياتكم ،

وأخيرا أين كان انت/انتي مين من الأنماط اللي فوق، بتمني لكم سنة اولي كلية سعيدة تكونوا فيها و تفضلوا ديما نفسكم الحقيقة، و تفضلوا ديما علي طبيعتكم!