أزاي ارد علي بنتي لما تقولي عندها كراش علي زميلها؟

كلمة كراش بقينا بنسمعها كتيير ، زي كلمات كتير اتغيرت و بقي ليها مسميات مختلفة ، زمان كنا بنقول انا معجبة بفلان ، أو فلان معجب بيا، بس دلوقتي بقي اسمها عندي كراش علي كذا ، 

المهم بغض النظر عن المسميات ، لا اخفيكم سرا ، موضوع الكراش بقي حوالينا في ايتها حتة ، يعني الكرتون حتي اللي كنا بنشوفه و احنا صغيريين ببلاهة ، ولادنا بيتفرجوا عليه و يقولك الأمير لما شاف الاميرة بقي عنده كراش عليها، وعشان كدة راح ينقذها…و هكذا!

 نيجي للمهم ، دلوقتي تعملي ايه لما تلاقي بنتك الزئردة ذات ال٦ سنوات فيما فوق جاية تقولك انا عندي كراش يا مامي علي فلان؟

هنا بقي بيبقي في اتجاهين :

الاتجاه الأول ، و اللي مش بنصح بيه خالص ، بتاع :

ايييييه؟!! عيييييب! ازاي تقولي كدة !! أو دة لعب عياااال مش عايزة اسمعه تاااني!

ودة طبعا انا ضده ، لانه ببساطة دي هتبقي اول تجربة ليها انها تحكي لك حاجة بفطرة الأطفال الجميلة،  و علي اعتبارك مساحة امانها ، فلما هتهبي فيها و هتزعقي لها ، انسي في المستقبل انها تحكي لك حاجة أصلا ، و مش هتكوني و لا مساحتها الآمنة و لا صاحبتها ، بالعكس هتخبي عليكي و هتخاف تحكي لك!

الاتجاه التاني، و دة اللي بنصح بيه ،

لازم تسمعيها، و تتعاملي معاها علي انها بتقولك حاجة مهمة ، مش تضحكي و لا تتريقي ، 

لأ! ابسولوتلي

لازم تاخدي كلامها  علي انه حاجة مهمة و انه برااافو انها جت تقولك ، و تفهميها ان دي حاجة طبيعية مش عيب و لا تكسف ،  و ان  الصغيرين بيقبوا عايزين يعملوا زي الكبار فبيدوها اسم اكبر ، بس لازم تسأليها حقيقة المشاعر دي اصلها جاي منين ؟

يعني تساليها ، ايه اللي بيعجبك في الولد دة؟ انه شاطر مثلا ،

انه ذكي،

انه مؤدب،

انه شيك ، 

يعني الخلاصة  تفهميها ان في حاجة في الولد دة عجبتك و عشان كدة قلتي تديها شكل اكبر فقلنا عليه كراااش! 

و دي حاجة طبيعية عندنا كلنا ، لان كل حد فينا ممكن يُعجب بحاجة في الناس اللي حواليه، 

 بس مهم نعرف انه في حدود لعلاقة الولد و البنت ، يعني المشاعر و اللي بنحسه دي حاجة جميلة جدا ، بس  يعني مش معني ان عندكم كراش علي بعض انه مسموح مثلا انكم تبوسوا بعض! 

 و تفهم انه مش معني انه عندها كراش علي حد و هي صغيرة انها هتكبر تتجوزه ، بنشرح علي اد سنهم انه لسه هتقابل ناس كتير و تشوف ناس كتير و انه عشان تتجوز حد دي حاجة لسه بدري اووي عليها و لما تكبر هتعرف ازاي تختار صح ، 

مهم آوي انك تفضلي مصاحباها ، و تخليها ديما تحكي لك و تتكلمي معاها و تسمعيها وتعرفيها انك سرها و انها سرك،

 و يا سلام بقي لو متخانقين مع بعض هي و الكرااش ، لازم تسمعيها و تديها من وقتك، يعني مثلا في سن ال ٩ او ال ١٠ سنين بيقبوا فعلا متوترين من قصة الكراش دي، و بتبقي عايزة تعرف تعمل ايه لو عندها كراش علي حد، أو حتي لو هي و حد قالوا لبعض ان عندهم كراش علي بعض تتصرف ازاي؟

 ماتسيبهاش تاخد افكارها و تشكل بداية تصرفاتها في علاقاتها العاطفية من كرتون و لا مسلسلات أو أفلام ، خليكي ديما مدياها مساحة امان و خليكي ديما المرجعية لمشاعرها و احساسها و اسرارها !