دليل المدارس الجزء التاني

في المقالة اللي فاتت اتكلمنا علي ازاي نبدأ نرتب افكارنا عشان نعرف نختار المدارس لاولادنا ، و في المقالة دي هنكمل باقي الخطوات اللي ممكن تساعدك :

بما ان المقالة اللي فاتت كان فيها أولا و ثانيا فهنا هنبدأ من ثالثا،

ثالثا : قرب او بعد المدرسة من بيتك او شغلك 

وهنا في اكتر من سيناريو :

١- لو مش بتشتغلي يبقي هندور في نطاق بيتك علي المدارس المناسبة خصوصا لو مش هتشتركي في باص و انتي اللي هتودي و تجيبي،

 ٢-و لو بتشتغلي في اتنين اوبشن :

-لو انتي هتخرجيه من المدرسة علي نيرسيري لحد ما تخلصي شغلك و تعدي تاخده و انتي مروحة يبقي هندور علي مدرسة قريبة من شغلك 

-لو  بتخلصي شغلك  في نفس وقت المدرسة يبقي برده هندور علي مدرسة كويسة جنبك عشان تعدي تاخديه لما يخلص

-لو هتشتركي في باص و في حد هيستقبله في البيت ، يبقي مافيش مشكلة في المكان و هيبقي عامل جانبي و انتيب تختاري و مش أساسي

مهم اوي هنا كمان نبقي متاكدين ان المدرسة فيها باص، لان في مدارس راهبات مثلا مافيهاش باص ، وقتها هنشوف العربيات اللي أولياء أمور المدرسة بيتعاقدوا معاهم من بدري 

رابعا: إدارة المدرسة

مهم اوي في مرحلة البحث عن المدرسة نسأل عن إدارة المدرسة ، وهل المدرسة دي قديمة و لا جديدة، واذا كانت الإدارة جديدة فكانت في مدارس ايه قبل كدة و مستواها ايه؟

المدارس القديمة ليها ميزة ان بيبقي ليها  سيستم محدد و نظام معروف و بيبقي ليها سمعتها المعروفة و بتبقي متاكدة من الطريقة اللي بيتعاملوا بيها و نظامهم و مستواهم ، بس بيبقي معظم الوقت دخولها صعب شوية، 

المدارس الجديدة ناس كتير بتفضلها كمان ، خصوصا انهم بيبقوا عاملين عروض و خصومات قوية، بس مهم اوي اوي تتاكدي من إدارة المرسة خصوصا لو كانت جديدة ، لان أوقات بيتقال حاجات في البداية زي وجود مدرسين أجانب و غيرها ، و في اول سنة تلاقي الحاجات اللي قالوها معظمه ماتعملش، بس لو الإدارة قوية حتي لمدرسة جديدة و كانت قبل كانت الإدارة دي ماسكة مدارس معروفة بيبقي في امان اكتر ، و الإدارة يعني مدير او مديرة المدرسة و طقم الإدارة اللي معاهم ، و في جروبات كتير بتساعد جدا تديكي المعلومات دي ممكن تدوري فيهم 

خامسا: التصاريح

التصاريح بمعني ان في مدارس كتيرة جدا و سمعتها كويسة في مراحل مختلفة تيجي تقدمي فيها يقولك ان فيها نيرسيري، و بعدين تكتشفي ان تصاريح النيرسيري بتاعتهم مش موجودة، و دة حصل في مدارس انهم مش معاهم تصاريح و لما جالهم تفتيش من الوزارة سمعنا انهم ودوا الولاد خبوهم في اودة الموسيقي او غيره، دي برده من الحاجات اللي هتعرفيها و تسالي عليها علي جروبات المدارس عشان تتاكدي من موضوع التصاريح، و تاني هقول لو مدرسة كبيرة و قديمة بتبقي متاكدة ان النوع دة من المشاكل مش هيحصل ، عشان كدة لو مدرسة جديدة لازم تتاكدي من موضوع التصاريح دةالمقالة اللي جاية فيها لما تنزلي المدارس تسالي علي ايه بالظبط و تقييمها ازاي !