دمي كله تريقة علي فساتين الجونة يا شيخ عتمان

من أشهر و أهم الأحداث الفنية اللي بتحصل في مصر مؤخرا هو طبعا مهرجان الجونة بفساتينه و بدله و الريد كاربت و الافتر بارتي بتاعته . 

الجماهير الغفيرة من الشعب المصري بتقعد بالشباشب و البيجامات و الفانلة الحمالة تآزآز لب وانا مهم عادي  و هي بتتفرج علي فعاليات المهرجان، من أول الافتتاح، لحد ما يلموا المهرجان و يخلصوا، و طبعا لأن كتشير مننا ذواقيين بسمالله ما شاء الله فتلاقي كتير بيتفرج  و هاتك يا تريقة علي الفنانين اللي في المهرجان، و هنا هنلاقي انتقادات مختلفة- اووووومال بنحب التنويع – يعني  مثلا هتلاقي :

١- اللي  بيعملوا ريتنج للفساتين و اللوك ، ازاي بقي ؟ من علي السرير.. بالبيجامة،  اه والله زي ما بقولك كدة ، و طبعا جزيل الشكر للتيك توك اللي فتح علينا فاتحة ما يعلم بيها الا ربنا، من حيث عدد التريقة و الفيديوهات اللي طوووول الوقت من غير أي وعي بكمية التجريح اللي ممكن توجع ناس كتير. 

٢- اللي بقي بيكفر و بيقيم حدود الله ، و يعلي صوته و يزرفلك في العالي ” حراااااااام ، اتقوا الله، يا كفرة هتروحوا الناااار ” و طبعا لما حصلت الحريقة قالك ” شوف انتقام ربنا من الكفرة اهو ” 

 ببساطة يا مؤمن و يا مؤمنة مادام دة من وجهة نظركم – واللي و ليها كامل الاحترام – كفٌر ،  بتتفرجوا عليه ليه؟ و متابعينه آوي كدة؟  سهل جدا متتابعوش أي حاجة تخص المهرجان  ؟

٣-الفئة التالتة بقي دول فلة و لا أي حاجة في دماغهم ، بيتفرجوا من باب التسلية و تضييع الوقت، بس مابيعلقوش اون بابلك نوووو بيعلقوا مع اصحابهم و اللي حواليهم ، و دول الأقل ضررا. 

الحقيقة بقي اللي ناس كتير قبل ما تطلع تقطّع في مهرجانات و فنانين مابياخدوش بالهم منه هو إن الفنانين دول بيقعدوا بالشهور يستعدوا و يحضروا هيلبسوا إيه، و في ناااااس كتير جدا ورا الشكل و اللوك اللي حضراتكم ممكن تطلعوا تهينوا و تتريقوا علي صاحبه و صاحبته بمنتهي البروود ، في مجهود و في قلق مبرح بيعاني منه الفنانين وكل اللي شغالين معاهم عشان يقللوا من تريقة حضراتكم عليهم .

تخيلوا كدة معايا إن كل حد فينا أد إيه بيتوتر و بيخاف من انتقادات اللي حواليه ليه لو رايح مناسبة ولا لابس حاجة جديدة، ودة في الدواير الضيقة لأمثالنا من البني آدمين الطبيعين، و اللي بتكون مش كبيرة آوي ، فمابالك بقي بفنان أو فنانة بيتوتروا اد إيه من نقد ملايين ليهم في حدث مهم زي دة؟ 

رفقا يا جماعة ببعض عموما و بالفنانين خصوصا ، إحنا الواحد فينا عنده فرصة إنه يكتئب أو يعبر عن غضبه و حزنه بشكل متوسط و مش مرتاحين ، فمابالك بالفنانين اللي تحت الأضواء، و كل كلمة و حركة محسوبين عليهم ، فكرتوا قبل كدة أد إيه في ناس منهم بتعاني من اكتئاب و قلق و خوف بسبب طبيعة حياتهم العادية زينا كلنا ، و صعب إنهم يعبروا عن دة  بسبب طبيعة شغلهم ؟

التريقة المبالغ فيها و التجريح عمره ما كان دم خفيف، دة آذي كبير ، و مش عشان نركب التريند نقلل من الناس و نهينهم ، فكروا قبل ما تنتقدوا عشان كلمتك ممكن تخلي حد يومه احلي و ممكن تخلي حد يكتئب و ينهار .

مني أنا شخصيا و من فريق  أنطلقي لكل اللي في الجونة دلوقتي ، كلكم شكلكم حلو واللي اشتغوا علي اللوك بتاعكم عاملين مجهود كبير ، اتبسطوا و المعوا، و ماتسمعوش كلام محبط، واتفرجوا علي أفلام كتيييير ، و احنا من هنا  بنشجعكم و بنتفرج عليكم و بناكل فشار باشيك يجاماتنا .