هو احنا محتاجين مثل اعلي؟

 في وسط كلام يومي مع صحابي وبفكر ممكن اكتب مقال الشهر ده عن ايه، فحد منهم قالي اكتبي عن ال role model، في الاول حسيت ان ممكن يكون موضوع cliché او تقليدي شوية بس مع شوية تفكيرلاقيت ان كلنا فعلا محتاجين مثل أعلى او “role model” بس هو ازاي اصلا  نختار مثل أعلى وهو ايه ده اصلاً. 

 اول حاجة خلينا نعرف هو يعني ايه role model؟

 لوبصينا على التعريف الحرفي فهو “شخص بيعجب بأفعاله الناس وبيحاولوا تقليده و بيعرفوا من خلاله ايه هي التصرفات المناسبة”، فعموماً الشخص اللي بيتحط في خانة ال role model او الناس بتصنفوا انه مثل أعلى بيكون شخص ناجح، حقق حاجة كبيرة فالناس بيبتدوا يعجبوا بيه ويبقوا عايزين يعملوا زيه. بس هو كلها حاجات مادية بس مثلاً؟ الحقيقة لا،  الشخص اللي ينفع يبقي قدوة ممكن يبقي عشان صفات فيه او تصرفات انسانية مثلا بيعملها او اسلوب في تعامل. 

طب هو نختار ازاي بقي ال role model بتاعنا؟ 

 اول حاجة في الحتة دي محتاجين نبقي موضوعين و منبقاش متأثرين بمشاعر او اي حاجة شخصية، لان في معايير وصفات لازم تكون موجودة في الشخص قبل ما نختاره يبقى قدوة لينا، فا مش شرط خالص يبقي من دايرتك القريبة لكن المهم انه يكون بيديكي مثل كويس يمشي مع خطتك لحياتك. فالمهم ان قدوتك يكون حد بيساعدك على تحقيق أهدافك بشكل مباشر أوغير مباشر و انه يكون بيضيفلك حاجة هتضيفلك في خبرتك الحياتية سواء في شغل، دراسة، علاقات، أسلوب حياة. لكن في العموم في صفات عامة كده لاوم تبقي في الشخص ال  role model ده هقولك عليهم:

• انه يكون حقيقي وشخص فعال في محيطه مش اناني او قافل علي نفسه 
• –        مثابر، طموح وعنده شغف باللي بيعمله اياً كان ايه هو
• منفتح وبيتقبل الاخر وبيشجع اللي حواليه
• عنده قيم و مبادئ واضحة 

  وعامة ممكن جداً يبقي عندك اكتر من قدوة، ممكن تلاقي حد ناجح مثلاً في مجال شغلك ويبقى ده مثلك الأعلى وبيساعدك تطوري -و ده مهم جداً في الشغل ان يبقي في مثل قدامك بيحفزك- كمان ممكن شخصية عامة مثلاً ناجحة في تقديم حاجة للمجتمع وعندها افكارمميزة عشان تنميه، ممكن يبقي حد قصة حياته بتلهمك ازاي تصممي علي اهدافك وتكملي. 

 بس هو كل  role modelتأثيره بيبقي ايجابي بس؟ الحقيقة لا، احياناً ممكن يبقي ليه تأثير سلبي وده بيحصل لما تتعلقي بالشخص ده زيادة عن اللزوم، ولأنه في الأول والأخر انسان وارد جداً يغلط وطبيعي يبقي عنده  شوية عيوب فا لو احنا ـاثيرنا بيه مش صحي و مش موضوعي وارد جدا نتأثر سلبياً بأفعاله او على الاقل نتصدم من الجانب ده مع انه طبيعي ومنطقي..فا خالي بالك!

واخيراً، في وسط زحمة حياتنا وضغط كل يوم مهم جداً يبقي عندنا مثل قدمنا بيحفزنا وبيخلينا نعرف الطريق اللي عايزين نمشي فيه. اختاروا  role modelsيفتحوا نفسكم على الدنيا!