إزاي تطلبي لنفسك فرصة تانية؟

في أوقات ممكن نغلط مع نفسنا أو مع اللي حوالينا وبنبقي محتاجين فرصة تانية نصلح اللي ممكن نكون غلطنا فيه.

لما بنغلط في حق حد بنحبه ونطلب منه فرصة تانية لازم نشوف إحنا نستاهل الفرصة دي ولا لأ، يعني هل إحنا بنطلب الفرصة التانية دي زي العيال الصغيرة اللي لما تغلط وتيجي تتعاقب تقعد تعيط وتحلف انها فهمت ومش هتعمل كدة تاني وترجع تعمل نفس الغلطة تاني ولا لأ؟ 

الأول كدة محتاجين نعرف إنه عادي جدا وطبيعي أننا نغلط لأننا بني آدمين مش ملايكة وكل شوية غلطاتنا بتتغير ما شاء الله وبتأخد أشكال تانية وبتكبر معانا. الفكرة بقي أننا:

: أولا

 لما نغلط نعرف نعترف إننا غلطنا يعني العند والمكابرة إننا غلطنا أصلا مش هيخلي في فرصة إن حد يديك فرصة تانية لأن الأساس  مش موجود وهو الإعتراف بالغلط  

:تاني حاجة

 نفهم الغلط دة كان سببه إيه بالظبط يعني ممكن يكون مثلا كان رد فعل على حاجة حصلت، أو على كلام إتقال، أو ممكن يكون بسبب ضغوط معينة، أو ممكن يكون بسبب جهل بحاجة معينة، كل دي أسباب لغلطاتنا و إللي طبيعي جدا إنها تحصل، فمهم أوي إني افهم إيه اللي خلاني أغلط في الشخص دة و أعمل معاه إللي زعله مني و خلاه يقرر يبعد، الأسباب مهمة جدا عشان ماكررش الغلط

:تالت حاجة

أعرف من جوايا قيمة الشخص دة عندي إيه؟ يعني هل دة شخص ماينفعش أخسره عشان بحبه ولا ماينفعش أخسره عشان عندي مصلحة معاه، لإن الإتجاهين مختلفين في طلب الفرصة التانية. لما بتكون بتحب الشخص بجد وطالب منه فرصة تانية بيبقي كل حاجة ناوي تصلحها وتقدمها طالعة من قلبك لإنك بجد مش عايز تخسره، أما لو الشخص دة ماينفعش تخسره وبتطلب منه فرصة تانية عشان مصلحة فطلب الفرصة أصلا بيبقي جاي من إحتياجك للشخص دة عشان شغل أو فلوس أو غيره ومش من قلبك فالتنازلات أو إللي هتقدمه بيبقي محسوب جدا بعقلك مش قلبك

:رابع حاجة

أنا هطلب فرصة تانية فلازم أقدم حاجة كانت مطلوبة وماكنتش بعملها، يعني مثلا أنا مكنتش بسمع للشخص دة كفاية يبقي لازم لما أطلب منه فرصة تانية أقدم له حاجة هو كان محتاجها مني فاقوله أنا أوعدك أنى هسمعك زيادة. ديما الأفضل لما تطلب فرصة تانية من شخص إنه يحس إنك فعلا صادق في طلبك وإنك هتقلل من الحاجات اللي خلتكم تختلفوا ويزعل منك ويبعد عنك أو يقطع علاقته بيك- دة إن مكنتش هتبطل تعمل الحاجات إللي كانت بتزعله خالص- دي أسمها مرحلة التنازلات ، في علاقاتنا ببعض عموما لازم يكون في حد أدني من التنازلات إللي ممكن تسهل علاقاتنا ببعض ، و لأننا أشخاص مختلفين فطبيعي إللي يسعدني و يرضيني مايرضيش غيري و مش لازم كلنا نشوف الحاجات بنفس العين و نفس المفاهيم، و الإحترام لإختلافاتنا أساسي عشان نفضل بنعرف نتعامل مع بعض فلازم أفكر في علاقاتي كلها، و خصوصا في الشخص إللي بطلب منه فرصة تانية أنا إزاي هقبله زي ما هو؟ وإيه اللي أقدر أتنازل فيه وأعمله عشان أسعده وعشان علاقتنا تفضل كويسة، وطبعا دي حاجة بتمشي في الإتجاهين يعني مني ليه ومنه ليا 

كلنا من حقنا فرصة تانية ولما بنطلب من حد فرصة تانية دة مش ضعف ولا تقليل مننا، بس دة حب وتقدير وفي بعض أوقات إحتياج لأشخاص معينين في حياتنا، وكمان عشان زي ما بيقولوا نبقي باقيين على الناس إللي بنحبهم ونبقي راضيين ضميرنا إنه لو بعدوا بعد ما عملنا كل دة وقرروا يمشوا يبقي إحنا ماقصرناش في حاجة وعملنا إللي نقدر عليه معاهم

ماتتكسفيش تطلبي فرصة تانية مادام عارفة إنتي عايزاها ليه؟ وهتقدري تقدمي فيها ايه؟