أنواع العلاقات السامة Types Of Toxic Relationships

طبعا مؤخرا بقينا نسمع كتير عن علاقات كتير سامة و خصوصا في العلاقات العاطفية، و نسمع جملة اجرررررررري اول ما نلاقي علامات معينة ، بس السؤال بقي هل العلاقات السامة مرتبطة بالعلاقات العاطفية بس ؟ 

الحقيقة ان في كل أنواع العلاقات الإنسانية، هنلاقي علاقات منهم ممكن تبقي سامة زي :

علاقة الاهل بأولادهم :

في علاقات كتير جدا بتبقي علاقة الاهل بولادهم علاقة سامة ، و بتأذيهم اكتر ما بتنفعهم ، و دة بيبان في:

 -تعلقهم الزيادة

 -خوفهم الزيادة

-الابتزاز العاطفي

-التعامل مع ولادهم انهم فرصة لتحقيق احلامهم هما

-المقارنات طول الوقت لصالح أي حد غير ولادهم

-الزعل الكتير و المبالغ فيه

-انعدام التشجيع 

-احساسهم ان هما شخصيا في مقارنة مع أولادهم و ماينفعش ولادهم يكسبوا

-حشر ولادهم في مشاكلهم هما في الوقت اللي ولادهم أصلا عندهم مشاكل كتير ، و الزعل المبالغ فيه اذا ولادهم ماعملوش اللي هما عايزينه

-التحكم االمرهق و المطلق

الحقيقة ان الحاجات دي واكتر منها من علامات العلاقات السامة مع الاهل، و اللي ممكن تبدأ مع ولادهم  من و هما لسه أطفال و تكمل لحد ما ولادهم يبقي عندهم ٥٠ و ٦٠ سنة كمان

بيبقي في استحقاق بالتحكم  و فرض الرأي و التوجهات و الأفعال وردود الأفعال كمان، و الا ما تبقوش ولادنا و لا بتحبونا،  و ندخل بقي مرحلة الابتزاز العاطفي ، و يبقي انت و حياتك و آرائك و حريتك و اتجاهاتك لازم تبقي نسخة من اللي اهلك عايزينه، حتي لو ده هياذيك أو مش هيريحك، عشان هما بس يرتاحوا  أو حتي مش يرتاحوا ،لأ عشان بس يقبلوك و يدوك الحد الادني من الحب و الإحساس بالأمان و الانتماء ليهم.

و في نفس السياق بيبقي العكس صحيح يعني  بتبقي في علاقات مؤذية من الأولاد لاهاليهم.

النوع التاني العلاقات السامة مع الاصحاب  

الاصحاب كمان ليهم دور مهم جدا في حياتنا ، وفي أصحاب ممكن حرفيا يودوك ورا الشمس ، و أصحاب تبقي علاقتك بيهم سامة جدا ليك و لسلامتك  و استقرارك النفسي ،

النوع دة من الاصحاب بيستخدم حاجات زي :

-الابتزاز العاطفي

-الطاقة السلبية طول الوقت، يعني طول الوقت انت مضغوط من مشاكلهم مش مشاكلك ، و لما بيكونوا مبسوطين انت مابتعرفش حاجة عنهم ، من الاخر ” في الحزن مدعية و في الفرح منسية”

-الابتزاز عشان يدوك الإحساس بالانتماء ، يعني لازم تعمل كذا عشان تبقي زينا و الا تبقي انت الشخص الغريب و ال odd    في وسطنا 

-التعلق المرضي 

-الغيرة المرضية يعني بيغير عليك و بيغير منك و من أي حاجة معاك أو عندك و مش عنده

-اللي بيعلّي عليك طول الوقت ، يعني تقوله انا متضايق ، يقولك انا متضايق اكتر ، انا تعبان ، لا انا تعبان اكتر 

-اللي ديما بيفرق له انه يبان الذ و اظرف قدام الناس و لو علي حسابك و يتريق عليك ، و ممكن يصغرك قدام الناس عشان يبان cool

-اللي ممكن يقول اسرارك في ساعة زعل أو غضب ، و يرجع يبتزك عاطفيا عشان تسامحه أو تقبل اعذاره و مبرراته

-اللي بيسمّعك اللي انت عايز تسمعه حتي لو كان غلط و هيحطك في مشكلة، و مابيقولكش الحقيقة و لا بيحذرك و همه مابيبقاش علي مصلحتك 

النوع التالت و الأكثر شهرة ، هو العلاقات السامة في الجانب العاطفي 

دة بقي اتكلمنا كتييير اوي عليهم قبل كدة ، تبقي داخل علاقة عشان تلاقي شريك حياة ، حد تكمل معاه حياتك و تقفوا جنب بعض في الحلو و الوحش ، حد يديك و تديله الأمان ، و هووووووب تلاقي خازوق !

طبعا علاماته كتيرة ، ورقة و قلم و اكتبي ورايا يا ست الكل :

-الابتزاز العاطفي

-الاستغلال بكل انواعه

-انعدام التقدير 

-بيحسسك طول الوقت بالتقصير و انه انت السبب في أي مشكلة

-مابيشوفش غير نفسه و احتياجاته و الطرف التاني في العلاقة دة بيبقي تحصيل حاصل

-بيحسسك طول الوقت انه ممكن يسيبك عادي

-ديما بيقلل منك بشكل أو باخر ، سواء بقي تفكيرك، شكلك، شغلك ، طموحاتك ، أي حاجة، المهم انك قليل في نظره أو علي الأقل بيحسسك بكدة

-صعب ان لم يكن مستحيل يعتذر و مابيشوفش نفسه غلطان

-ديما المجهود في العلاقة بيبقي مطلوب منك مش منه

طبعا كل أنواع العلاقات الإنسانية بتستحمل ان يكون في منها سام، بس مهم اوي لو وقعت في علاقة سامة سواء بقي من أهل ، أصحاب ، حبيب أو شريك حياة ،إنك تدرك مدي أذي العلاقة دي ليك، و ديما ديما تختار نفسك و صحتك النفسية علي أي علاقة سامة!

في علاقات ممكن نخرج منها زي الاصحاب أو العلاقات العاطفية  ، اه الخروج منها بيحتاج ادراك و مجهود كبير ، بس في الاخر ممكن جدا الخروج منها !

اما العلاقات المؤذية من الأهالي ، فعلي الأقل ممكن نحجم العلاقة و نحط لها حدود وقت ما يبقي عندنا الأدراك و القدرة الكافية علي دة ، مش هنقول نقاطعهم بس لازم نحمي نفسنا و صحتنا النفسية علي الأقل بوضع حدود تقلل من الأذى اللي ممكن يسببوه ليك !

صلة الرحم جميلة و ضرورية ،و الاصحاب احلي سند في الدنيا ، و شريك الحياة هو رفيق الدرب ، بس كل دة مش هيبقي ليه وجود و لا معني و انت بتتأذي من الأشخاص اللي المفروض يبقوا اقرب الناس ليك !

حب اللي حواليك و اديهم  امان و حنان و قدرهم  جدا جدا ، بس و انت محافظ علي نفسك و علي صحتك و سلامتك النفسية و من غير ما تستنفذ نفسك في علاقات مؤذية!