١٥ حاجة متجيبهاش في الجواز

موسم الجوازات علي الأبواب ،و كل العرايس بيجروا يشتروا الحاجات اللي ناقصة، و مع زيادة الأسعار اللي بقت خوزعبلاية قلنا نجيب لكم المفيد من اللي سبقوكم و اتجوزوا ، وايه اكتر حاجات جه اجماع عليها ان مالهاش لازمة و بتبقي فلوس علي الفاضي…

سمعاكي يالا ورا بتقولي الي مالوش لازمة في الجواز “العريس” !

بس دة طبعا هزار ، اوماااال هتدخلي قفص الزوجية ازاي من غيره؟

نيجي بقي للمهم ، متجبيش ايه و انتي بتجهزي ؟

١-النيش

في اجماع علي ان النيش مالوش لازمة و بيزحم البيت و فلوس علي الأرض 

٢-ال kitchen machine 

لو مالكيش اوي في الطبخ، أو طبخك مش شقلباظات في المطبخ ، فحصل اجماع من المتزوجات علي ان كل اللي بتستخدميه في هذه المجموعة هو الخلاط و الكبة فقط و الباقي بيتشال خصوصا المفرمة

٣-مفرش السرير 

وخصوصا لو متطرز مالوش لازمة بشهادة الأغلبية و مش بيستخدم و تخزينه كمان مش الطف حاجة

٤-طقم الصيني اللي بعشروميت الف جنية

ماتجبيش غير طقم شيك و حلو للاستخدام اليومي و طقم شيك للضيوف و شكرا، الحاجات دي مابيبقاش ليها استخدام و كل شوية بتطلع موضة جديدة و اشكال جديدة

٥-اللانجري و اللبس الكتير 

هاتي حاجات اه، بس مش كتير ، أولا الموضة بتتغير ، ثانيا المقاسات بتتغير ، و معظم الحاجات مابتستخدميهاش بعد كدة

٦-طقم الشاي اللي بالبراد

الأغلبية العظمي اكدوا ان الطقم دة مالوش أي لازمة و عمرهم ما استخدموا البراد ، و ديما هذا الطقم متشال في النيش ، اللي اتفقنا مش هنجيبه أصلا 

٧-الفوط الكتير و الملايات الكتير و خصوصا المتطرزة

كل شوية بتطلع موديلات اجدد و شكلها احلي و بتبقي لابسة في كمية كبيرة من حاجات شكلها قدم

٨-الكريمات الكتير 

الكريمات ليها  expiry date  فالاحسن تجيبي علي ادك و لما يخلص تجيبي تاني ، بدل ما ينتهي صلاحيته و يبقي اترموا و فلوس علي الأرض 

٩-اطقم الحلل

بلاش ٦٠٠ طقم حلة ، فالاغلب مش هتستخدمي غير مقاسين مثلا من الحلل، هاتي المريح لاستخدامك و المقاسات اللي تقضيكي انتي و جوزك و اذا في عزومة بس كدة

١٠-طقم الكاسات 

ماتكتريش اوي من اطقم الكاسات لان معظمها بيتكسر، و الاشكال كل شوية بتنزل حاجات جديدة

١١-السجاجيد الكبيرة

بتكون صعبة في تنظيفها و تخزينها، استخدمي سجاجيد صغيرة افضل كتير 

١٢-الستاير المعقدة

في كدة ستاير بتبقي تفاصيلها كتيرة و متعبة جدا في تنضيفها و فكها، مالهاش لازمة خليكي في الحاجات البسيطة و الشيك في نفس الوقت 

١٣-طقم المعالق

الطقم العظيم اللي في الشنطة الكبيرة اللي بيبقي برده في النيش و مابيستخدمش، مالوش لازمة ، هاتي طقم معالق حلو للاستخدام اليومي و العزومات

١٤-التلاجة الصغيرة

من الأول خليكي في التلاجة الكبيرة لان دي اللي هتعيش معاكي و كدة كدة هتحتاجي فريزر

١٥-المفارش الكتير و خصوصا المتطرزة

بيبقي مالهاش لازمة و صعبة في تخزينها، و كل شوية بتطلع اشكال اجدد

في النهاية:

 ماتشتريش كميات كبيرة من أي حاجة

ماتشتريش حاجات عشان تفرجيها للناس و بس و الاستخدام الفعلي صفر

ماتشتريش غير اللي فعلا محتاجاه و حاباه و هتستخدميه، اين كان هو ايه

اسمع بقي إن شاء الله والف الف مبروك و عقبالكم كلكم 