#super_single_mom

مسمي ال single mom  جديد علي مجتمعاتنا ، الا انه في الفترة الأخيرة انتشر بشكل كبير مع انتشار نسب الطلاق و اللي معظمها بيبقي بين الطرفين أطفال، 

فبقينا نشوف ستات كتير جدا مطلقات و معاهم أولادهم ، يعني اينعم هي سينجل بس هي كمان ام في نفس الوقت !

الحقيقة ان المطلقات اللي ينفع بجدارة تقول عليها سينجل مام هي اللي شايلة هم و مسئولية ولادها بنسبة ٨٠٪ مثلا لوحدها ، طبعا في مطلقات بيفضل الاب مشارك في موضوع المصاريف و بيشوف أولاده بشكل منتظم، و ممكن جدا كمان يبقوا بيقضوا عنده الويك اند، و القرارات المتعلقة للولاد الاب و الام بيقرروها مع بعض علي الرغم من طلاقهم،

 الا انه النسبة الأكبر و الأعظم بتكون للمطلقات اللي الاب بيقرر يرفع ايده عن كل المسئوليات الخاصة بالولاد سواء كانت مسئوليات مادية او حتي معنوية ، هنا بقي نقدر نتكلم عن السينجل مام اللي بتكافح فعليا  و بحق و حقيقي في كل الجبهات لوحدها :

 اللي بتشتغل و تصرف علي الولاد 

 و تربي و تعلم و تذاكر

 وتودي تمارين و مدارس

و تعالج نفسيا كمان من الضرر اللي غياب الاب بيسببه  

اللي بتحاول تلاقي نفسها و تقف علي رجلها

اللي بتحاول تبقي اب و ام و صاحبة و أستاذة و دكتورة و مشجعة ، كله في نفس الوقت

دول الستات اللي بجد نرفع لهم شابو!

 يعني اذا كانت الواحدة الطبيعية اللي معندهاش ولاد بتلاقيها بتدرس و بتثقف نفسها و بتشتغل و تحاول تحقق نفسها و تلاقي سعادتها ، تخيلوا بقي كدة معايا واحدة بتعمل كل دة لنفسها و نضيف عليها مسئولية ولادها الكاملة ، تبقي بجد بطلة!

اعتقد دلوقتي بقي حوالينا كلنا نماذج كتير من السينجل مامز، بطلات بجد ، شايلين مسئولية الاب و الام مع بعض ، ستات حقيقية مش مزيفة و لا بتدعي مجهود مابتعملهوش، ستات بتحارب كل يوم عشان تحقق نفسها و تتعافي و كمان تسند ولادها و تجاول تطلع شخصيات مسئولة و سوية و ناجحة للمجتمع.

السينجل مامز اللي من النوع دة بيحتاجوا للدعم النفسي و التشجيع ، بيحتاجوا يسمعوا كلمة حلوة، بيحتاجوا يحسوا ان مجهودهم متقدر خصوصا لو كانوا شايلين المسئولية كاملة لوحدهم ، لو تعرفي حد من البطلات دول حواليكي افتكري ديما تشجعيها، افتكري ديما تقولي لها اد ايه انها شاطرة و مجتهدة، اقفي جنبها وقت ما بتقرب تفقد ايمانها و تنهار ، لانهم فعلا بيحتاجوا التشجيع دة و بيفرق جدا معاهم!

واذا كنتي انتي واحدة من البطلات دول ففكري ديما نفسك انك بطلة، وانك بتعملي دور المفروض يعملوه اتنين لوحدك، قولي ديما لنفسك انك تستحقي الاحسن ، احتفلي مع نفسك بانتصاراتك الصغيرة، خليكي فخورة بكل خطوة بتعمليها عشان انتي تكوني احسن و تخلي ولادك احسن!

لكل سينجل مام شايلة مسئولية ولادها لوحدها : ” انتي بطلة… انتي تستحقي الاحسن…انتي اللي بجد مافيش منك وكل خطوة بتاخديها لقدام مع نفسك ومع ولادك نجاح يستحق انك تشكري نفسك عليه!”