الدراما بين الواقع و الخيال فرق الطلاق بين فاتن امل حربي و البحث عن علا

الفترة اللي فاتت اتعرض مسلسل البحث عن علا ، و اللي اتكلمنا عنه و عن تناوله لموضوع الطلاق بشكل خفيف جدا و هادي ، المسلسل عرض الطلاق بشكل بسيط و لايت و إمكانية و ضرورة انك تبدأي من الأول ، بس الفكرة إنه خلي كل حاجة سهلة ، أو اتقدمت بشكل سهل،

 يعني طلاق متحضر ، 

طليق متفهم، 

نفقة مش مشكلة،

بداية من الأول سهلة،

ولاد بيزعلوا شوية و بعدين بيتعاملوا ببساطة،

كل حاجة بتعدي بسلاسة و بساطة ، المسلسل طبعا كان معتمد انه يقدم حالة خفيفة ، مافيهاش دراما و نكد  في ست حلقات،يعني:

 أماكن حلوة،

 لبس حلو ،

 مود لذيذ،

يعني زي ما اتقال وقتها ، الجزء التاني من عايزة اتجوز ، بقي عايزة اتطلق من كتر ما كل حاجة كانت سلسة،

 طبعا في قطاع من مجتمعنا الطلاق عنده بياخد الصورة دي و الشكل دة، و ان كان قطاع مش كبير خالص بالنسبة للأغلبية العظمي ، واللي مثّلهم حتي وقتنا هذا مسلسل “فاتن أمل حربي” بشكل قوي جدا و حقيقي جدا. 

فاتن أمل حربي جه ضرب علي الوتر الحساس عند معظم المطلقات ،ونزّلنا علي ارض الواقع اللي بيوجع لستات كتير ، مافيش ست مطلقة من الأغلبية العظمي معدتش بحاجة أو أكتر من اللي فاتن بتعدي بيه في المسلسل ،

من اول الزوج المهمل ، الخاين، ابن امه، البخيل، مدّعي الدين ، الاناني ، الهمجي و العنيف،

لحد مرمطة الطلاق و القوانين الظالمة للستات و اللي بتشرد الأولاد في حالة الطلاق، يعني الست عادي إنه طليقها يتحايل علي القانون في أوقات، و يطبق القانون في أوقات تانية لهدمها و تشرديها و عقابها من وجهة نظره و تعليمها الأدب.

كام ست مطلقة جوزها تحايل علي القانون و قدر يعمل تمكين من الشقة علي الرغم من إنها حاضنة؟

كام ست مطلقة ولادها اتبهدلوا واتقلبت حياتهم و اتسحب ورقهم من مدرستهم لمدرسة تانية عشان العند بس؟

كام ست مطلقة سفّت التراب عشان تقدر تصرف علي نفسها و علي ولادها بعد ما ابوهم رفع ايده من مصاريفهم؟

كام طفل شاف مرمطة امه في المحاكم ، و نفسيته اتدمرت بسبب نقله من مدرسته، أو فضايح قدام كل اللي حواليه من تصرفات الأب الغير مهتم بنفسية ولاده؟

كام طفل أتذي نفسيا عشان ابوه بطل يسال عنه أو يشوفه بعد الطلاق ، ومع ذلك ممكن يروح يرفع علي الأم قضية رؤية لمجرد إنه يمرمطها و يذلها. مع إنها مش حارماه من ولاده، وهو اللي مابيطلبش يشوفهم ؟

كام ست حياتها وقفت و معرفتش تبدأها مع شخص جديد لمجرد قانون ظالم بإن الأولاد يتاخدوا منها في حالة جوازها مرة تانية ، فتبقي بين نارين إما انها تتخلي عن ولادها أو تتشرد أو تنسي إنها ست و ليها حياة و متطلبات تتمني تبقي فيهم مع شريك حياة محترم؟

كام وكام وكام؟

وكل دة كوم و إن الأطفال مايقدروش يسافروا مع امهم من غير موافقة ابوهم ، اللي غالبا أصلا مش بيشوفهم و لا يعرف عنهم حاجة و لا بيصرف عليهم،، بيتمنعوا من السفر مع امهم من ابوهم لذلها و كسر عينها بس ؟

فاتن امل حربي علي الرغم إنه بيعرض كل الواقع المؤذي و السخيف دة للمطلقات، الا إنه في نفس الوقت بيحاول يدي طاقة نور و لو صغيرة للمطلقات، و بيحاول مايبقاش سودوي وموجع، علي الرغم من صعوبة تحقيق دة مع قضية حساسة زي دي و معالجة واقعها الأسود بالشكل دة،

يعني هتلاقي -نيللي كريم- و اللي بتنضج فنيا يوم عن يوم و عمل عن عمل- بتضحك مع بناتها و بترمي افيهات ، وعلي اد ما بتقدر بتحاول ماتكرّهش ولادها في ابوهم اللي رميهم في الشارع انتقاما منها،

 بتدي طاقة حب وحنان للي حواليها و قدرتها علي استيعاب و التكفل باللي محتاج ، زي القطة و العصفور ، بيدي شوية نور في الضلمة.

الحقيقة إن مسلسل فاتن أمل حربي بيعرض قضية المطلقات  من كذا زواية مهمة :

-الجانب القانوني : و المتمثل في  قانون الاسرة الغير منصف للام و المرأة بشكل واضح جدا ، و اللي ظهر في تضارب القضايا و فصلها عن بعض و طول مدة النظر فيها وحقوق المطلقة و أولادها اللي بيضيعوا في المحاكم

-الجانب الديني : واللي ظهر في حاجتين ، أول حاجة جوزها أو طليقها و امه مدّعين الدين ، و اللي ظهر في مشاهد محاولته فرض الحجاب عليها هي و بناتها و تناقضه مع خيانته ليها و اكله لحقوقها ، مساندة امه ليه في الظلم و الكلام باسم الدين مع انها مش بتطبقه،

وثانيا المتمثل في دور الشيوخ و الائمة و اللغط في حكم الدين في مواضيع معينة زي سحب الحضانة من الام عند الجواز التاني 

-الجانب المجتمعي : واللي لأول مرة كتير من المطلقات يعرفوا بوجود مركز للأم و المرأة المعنفة و ان في مكان أو ملجأ آمن ليهم وداعم ليهم في انهم يتخلصوا من العنف اللي بيتعرضوا له

ودي مراكز الاستضافة مجمعة في مقالة سابقة لينا https://entaleqi.com/uncategorized/مراكز-استضافة-وتوجيه-للمرأة-المعنفة/

-الجانب النفسي : التاثير النفسي علي الأطفال والام لما بتتعرض لعنف أو تهديد و تشريد من طليقها ، و اللي ظهر في مشهد بنتها الصغيرة لما قررت تغير اسمها و تضيف اسم أمها مش ابوها لاسمها، كشهادة منها لامها ورفض لتصرفات ابوها و انتمائها ليه 

-الجانب الاجتماعي: و اللي اظهر أهمية وجود أصحاب و داعمين ان ماكنش في عيلة، و أهمية ان الست تتحامي في اللي عارفة و متاكدة انهم هيساعدوها و يقفوا معاها، كمان الجانب الاجتماعي ظهر في فكرة وجود عريس للمطلقة لمجرد احترامه و تقديره ليها اللي انعكس علي حبه انه ينقذها من الشارع و يتكفل بيها هي و بناتها و يراعيهم و يعرض عليها الجواز، ففتح طاقة امل بإمكانية وجود رجالة سوية و محترمة و بداية جديدة للست المطلقة .

فاتن امل حربي ،

 تاليف : إبراهيم عيسي

إخراج : محمد جمال العدل

بطولة: نيللي كريم، شريف سلامة ،محمد الشرنوبي، هالة صدقي،خالد سرحان و محمد ثروت

طبعا في الدراما لكل فنان الحق إن يتناول الموضوع بالشكل المناسب ليه و لفكره و هدفه من العمل الدرامي، وفي حالة موضوع الطلاق فمن خلال عملين في اقل من كام شهر شوفنا فرق واضح في تناول موضوع الطلاق بين فاتن أمل حربي و البحث عن علا ، كل عمل فيهم مهم و مؤثر في اطار الهدف منه.

احنا شوفنا البحث عن علا ، بس لسه متابعين فاتن أمل حربي في رحلتها و نتمني إن المسلسل دة يكون جرس إنذار و خطوة في تغيير قوانين و افتاءات ظالمة لكل الستات و الأمهات المطلقات، و نتمني المسلسل مايخذلناش في اخره، و متشوقين جدا نعرف النهاية في المسلسل و في الواقع بعد عرض المسلسل.

دمتم فاتنات و عندكم أمل و محاربات!

ا