٥ أماكن مختلفة ممكن تروحيهم في إجازة العيد

لو نفسك تخرجي خروجه حلوه وتاكلي أكل حلو على فيو أحلى يبقى إنتي في المكان الصح. الفترة الجايه فيها اجازات رسميه كتير، يعنى السفر أي مكان هيكون  قرار صعب وعشان كده بنقدملك هنا مجموعة أماكن جيبالك أحسن ما في العالمين، أكل لذيذ وقعده ملهاش مثيل.

1- 

9 Pyramids Lounge

 

في قلب منبع الحضارة الفرعونيه هتلاقي بيراميدز لاونج التابعه لنجيب ساويرس جوه منطقة أهرامات الجيزة، يعني مكان هيقدملك كرسي الصف الأول مباشرة على التلات أهرامات!

 من أول ما بتدخلي منطقة الأهرامات لحد ما توصلي للاونج، إنتي هتاخدي جوله حصرية للأهرامات وإنتي في عربيتك ومشغله التكييف.

 اللونج نفسها متقسمه منطقة داخليه فيها تكييف ومنطقه خارجيه والإتنين نفس الفيو الساحر. غير الأجواء اللي هتأسرك حقيقي، الأكل هناك حاجه تانية. مع منيو للفطار ومنيو للغدا، مفيش طبق مش هيعجبك أو مش هيشبعك. ولو لسه عندك مكان للحلويات والقهوة، في قاعده عربي على الرمل بفيو أقرب للأهرامات عشان تاخدي التجربة كامله بدون أي نواقص.

Andrea New Giza

 

داخل كمباوند نيو جيزه هتلاقي مطعم أندريا الشهير، من أعلى هضبه في المكان، مطعم أندريا بيقدملك فيو بانورامي ملوش مثيل. على عكس التوقعات، الجو هناك في عز الحر بيكون تحفه.

 لو ليكي في الفراخ المشويه والسمان، تأكدي إنك هتاكلي صوابعك وراهم. وكفاية تاخدي قهوتك أو كوباية الشاي في الخمسينة في مكان له ستايل وطابع ريفي من أول ما تدخلي وهتلاقي فرن العيش البلدي القديم والستات بتخبز والخيول المختلفه إللى ممكن تاخديها في جوله حولين المكان. والحلو هناك إن في مكان مخصص للأطفال يلعبوا فيه ويدوكي فرصة تستمتعي بوقت مميز ومختلف.

Mamsha Ahl Misr

3- ممشى اهل مصر-

عمري ما كنت أتخيل إن منطقة الكورنيش ديه ممكن تتحول بالشكل ده وتكون بالجمال المبهر ده.

 في ممشى أهل مصر إنتي حرفيًا ماشية على النيل، ممشي طويل عريض مليان مطاعم ومحلات أكل تناسب كل فئات المجتمع، هناك عاملين قعدات عبارة عن سلم تدريجي تلاقي الناس قاعده عليه وبتتصور والأطفال بيلعبوا ويتفرجوا على عرض النافورة الراقصة.

 في عز الحر، نسيم الهوا المنعش وإنتي ماشيه على النيل بالدنيا وما فيها. وكفاية تصميم المكان إللى متصمم على الطراز المعماري الحديث والعصري إللي يخليكي تحسي إنك في بلد تاني غير مصر.

Seekh mashwy – 4- سيخ مشوي

مهما لفيت ودورت بردو هيفضل سيخ مشوي هو من أحسن الأماكن اللي بخرج فيها سواء مع عيلتي أو صحابي.

 المكان موجود في العجوزة مباشرة على النيل وهو واحد من ضمن سلسلة مطاعم منها سي جل ولاتينو كافيه واللي هتلاقيهم هما التلاته على صف واحد. أكل شرقى من أحلى ما هتدوقيه وخاصة الكفتة المشوية والملوخيه عندهم حكاية تانيه خالص، ولازم وإنتي هناك تعملي حسابك تسيبي مساحة لأحلى طبق زلابية بميكس شوكولاته البيضاء والبني هتكليه في حياتك كلها.

Walk of Cairo

 

على أول طريق مصر إسكندرية هتلاقي ووك أوف كايرو.

 مكان فعلا فخم من حيث الديكورات والمطاعم والكافيهات إللى هناك، في كتير ممكن يعتبروا إن المكان مش مثير زي باقي الأماكن إللى في القايمة، وهنا أحب أقولك إنتي غلطانة لأن ووك أوف كايرو هو أول مكان في مصر موجود فيه Museum of Illusionsوهو عباره عن متحف كبير مليان بالخدع البصرية اللي هتسرق عقلك وهتاخدك في رحلة إلى عالم موازي بس مختلف من حيث الحجم! مكان للعيله كلها هيتبسطوا فيه من أصغرهم لأكبرهم.

الأماكن ديه مش الأماكن الوحيده المميزة  بس أكيد هي أماكن هتغيرلك الموود تمامًا وهتقضي فيها ويك إند أو أجازة عيد مختلفة من نوعها، كل سنه وإنتي طيبة!.