٥ حاجات مهم تعمليها قبل ال ٣٠

بيقولوا احلى مرحلة للستات هي التلاتينات عشان بنبقي انضج، اذكى، اهدى، مرينا بحاجات كتير و عندنا خبرة،  بس قبل ما ندخل التلاتينات في حاجات في  العشرينات محتاجين نعملها عشان لما نوصل التلاتينات نتبسط .. 

بعد قراية و مناقشات رايحة و جاية وصلت لأهم ٥ حاجات المفروض نكون عملناهم في العشرينات عشان نبقى استفدنا منها !

اول حاجة: اكتشفي نفسك 

بتتقال الكلمة دي كتير و مبنبقاش عارفين نعمل ايه بالضبط، بس رحلة اكتشاف ومعرفة وفهم وحب نفسك دي حاجة طويلة شوية وبتيجي من تجارب متكررة، بتيجي من انك تقضي وقت لوحدك وتعتمدي على نفسك.

 فعشان تعرفي نفسك كويس محتاجة اصلا تعرفي اهتماماتك وميولك وتحطي قواعد علي اساسها ، وده هيجي من انك تجربي تعملي حاجات كتير ومختلفة من خلالها هتمري بمواقف هتعرفي منها انتي عايزة ايه او على الاقل مش عايزة ايه.

تاني حاجة: سافري  لوحدك 

 حاجة مش دايما متاحة انك تعمليها بس لو عندك الفرصة وظروفك مناسبة ..لازم تعمليها! استكمالا للي قلناه قبل كده، جزء من رحلة اكتشاف نفسك انك تقضي وقت مع نفسك بس، و السفر لوحدك احسن فرصة عشان تعملي ده،

 فكرة انك معتمدة على نفسك تماما في مكان جديد مع ناس غريبة عنك وبرة اطار مجتمعك اللي متعودة عليه بتخليكي تعرفي حاجات كتير عن نفسك وبتزود ثقتك فيها. 

تالت حاجة:  حوشي فلوس 

بصي عارفة انه صعب بس علي قد ما تقدري حوشي، كل ما بنكبر طبيعي بيبقي صعب اننا نتنطط وبتظهر لنا اولويات جديدة فمهم اوي انك تبقي دايما بتشيلي مبلغ على جنب و تستثمريه .. هيفيدك جدا قدام.

رابع حاجة: اشتغلي 

 عشان نجيب فلوس اكيد لازم نشتغل بس لازم تعرفي ان الشغل مش بس للفلوس، في العشرينات بنبقي لسه بنبتدي حياتنا ولسه بنكتشف عايزين نعمل ايه وحابين مجال ايه، وعشان نعرف نعمل ده محتاجين نجرب كذا شغلانه في المجالات اللي شايفينها مناسبة، او حاسين اننا عايزين نتشغل فيها، و مع التجربة هتلاقي نفسك اخترتي الحاجة اللي شايفة نفسك فيه،

 غير كده، الشغل الكتير بيعلم وبيديكي خبرة في حاجات هتفيدك جدا في حياتك بشكل عام وفي اي شغلانة هتبقي عايزة تكملي فيها بعد كده عموما .. مفيش حاجة هتشوفيها، هتسمعيها، هتقريها او هتمري بيها هتروح علي الفاضي. 

اخر حاجة و اهم حاجة: اهتمي بنفسيتك وبصحتك 

اللي هتعمليه في عشريناتك هتلاقي مردوده في التلاتينات فاهتمي اوي باللي بتديه لجسمك، لازم تخلي نمط صحي لحياتك من اول اكلك، نومك، رياضة، روتين لبشرتك وشعرك، متابعتك مع دكاترة لحد الكلام اللي بتقوليه لنفسك، الدايرة المحيطة بيكي والناس اللي بتختاريهم  يدخلوا في حياتك عشان كل ده بياثر علي صحتك النفسية والجسدية.

 واخيرا الكلام ده مش معناه انك لو وصلتي التلاتينات و في حاجة من دي معملتيهاش ان خلاص كده الوقت عدى .. الاجابة لا طبعا، اي حاجة تقدري تعمليها في اي وقت طول ما انت عندك الإرادة و عايزاها، بس لو في فرصة ان حد لسه موصلش التلاتينات و محتاج يشتغل على نفسه بس مش عارف، احنا بنحاول نساعده.

دمتم مستمتعين بكل مرحلة سنية بتعدوا بيها !  السن مجرد ارقام عمره ما هكون معيار او حاجز.. استمتعي بيه أياً كان الوقت