هتعرفي تأخذي القرار الصح؟

مرتبك زاد، هتحوشي للمستقبل ولا هترفعي مستوى معيشتك؟؟

قاعدة في البيت بتحضري تقرير مهم للشغل ولاقيتي بنتك بتقولك تعالي أحكيلك يومي كان عامل إزاي النهاردة في المدرسة. هتختاري عيلتك ولا الشغل علشان العيلة ممكن تستنى؟؟

كنتي مرتبة عزومة مع صاحبتك وفجأة خطيبك قالك تعالي نخرج في نفس الميعاد، هتعملي إيه؟

الحياه بتحطنا في مواقف كتيرة صعبة ومحتاجين قرارات فيها ، في عوامل كتير هتدخل في إختيار القرار، بس في عامل واحد قوي هو إللي دائما بيحس الموضوع…. العامل ده هو القيم إللي إنتي بتتبعيها،  قيمك هي إللي بتوضح شخصيتك وإللي هتعمليه في حياتك.

عمرك فكرتي في الموضوع ده وكنتي فعلا واعية للقيم بتاعتك وإزاي بتختاري قراراتك؟ أمثلة عن القيم إللي بنتبعها

 العيلة، الأمانة، الصحة، التسامح، الإستقلال، القوة، القيادة، الثقة، الحرية، المنافسة، الشجاعة، الإثارة، المادة، البر، المسؤلية، العِزة، الضمير، الإيثار،السكينة، المتعة، الإبتكار، العطاء، المرونة، الإنفتاح، المنافسة، التفاؤل، الكرم، الصدق، الرحمة، الروحانيات، المغامرة، الصداقة، وأمثلة تانية كتير.

القيم دي بنكتسبها من المجتمع، والعيلة، والدين، والمدرسة، وأهم حاجة عقلنا. الجميل بقى في موضوع القيم دة إنه مش ثابت، يعني إحنا ممكن نغير قيمنا فيأي وقت وناخد إللي ينفعنا ،مش لازم نتبع المجتمع أو أهلنا. 

دي حاجة شخصية لإن إحنا اللي عايشين عيشيتنا، يعني إنتي ممكن ترفضي شغلانة مرتبها عالي وتقللي إلتزامات الشغل مقابل إنك تلاقي وقت أكتر لأولادك، بالنسبة لك قيمة العيلة أعلى من الوظيفة، وبعد كذا سنة ممكن تختاري الوظيفة، دة مش هيخليكي غلطانة أو منافقة، بالعكس، ده دليل على مرونتك وصدقك وإنك بتختاري على حسب إحتياجاتك.

في كذا طريقة انك تقدري تعرفي وتحددي قيمك:

١-إفتكري كل القرارات اللي أخدتيها في حياتك، سواء صح أو غلط، -حاولي تفتكري إيه اللي خلاكي تخدي القرار ده؟ كان نفسك تجربي حاجة جديدة؟كنتي هتبقي مبسوطة؟ كان مرتبك هيزيد؟ كنتي هتتعلمي حاجة جديدة؟

٢-شوفي مين قدوة بالنسبة ليكي ؟ قدوة في إيه؟ بيعمل إيه بيعجبك؟ بيبتكر حاجة جديدة؟ بتحبي إزاي هي بتعمل خير؟ بتحبي طريقة حياتها؟ بتحبي إيه في حياتها؟

٣-إقرأي لستة طويلة من القيم وشوفي إيه إللي بيسمّع معاكى وحاسة إنه بيمثلك.

كل يوم في حياتنا بيحطنا في إختيارات كتير، كل ما تكوني عارفة وواثقة من قيمك، هتعرفي تختاري أسهل.