#single and Happy

في مجتماعتنا العربية في شوية مفاهيم كدة مرتبطة بالبنات منذ الصغر و بتكبر معاهم ، المفاهيم دي بتتمثل في :

البنت كائن ناقص و محتاجة راجل يكملها

البنت اللي بيتقدم لها عريس بيعمل لها سعر 

البنت اللي بتوصل لسن معين و ماتتجوزش يبقي اكيد عندها مشكلة

البنت اللي بتحاول تحاول تحققق نفسها يبقي بتطفش منها العرسان 

البنت اللي مابتوافقش علي العرسان اللي بيتقدمولها تبقي بتتبطر علي النعمة حتي لو مش مناسبين

البنت اللي شخصيتها قوية محتاجة راجل يشكمها 

البنت مالهاش غير المقشة و المساحة ، يعني مهما عملتي آخرك تنضفي في بيت جوزك

طبعا المفروض انه مع تقدم الزمن و تطوره ، المفاهيم دي يا تقل يا تتغير ، بس المفاجأة ان المفاهيم دي لسه موجودة زي ما هي ، اينعم في محاولات لنشر الثقافة و تغيير المفاهيم الضيقة عن البنات و حياتهم و عن مصيرهم الحتمي للجواز ، بس الواضح ان المشوار لسه طويل .

لما طلعنا الهاشتاج دة لقينا كمية من البنات زي الفل ، ناجحين، و زي القمر ، و شخصياتهم قوية، و طموحين ، و فيهم الحقيقية كل المزايا اللي ممكن نقولها عن بنت، البنات دول حاربوا مفاهيم و معتقدات المجتمع اللي حصرتهم في كام جملة عشان لسه ماتجوزوش  زي :

مش هنفرح بيكي بقي

ما تشدي حيلك شوية

هي الرجالة اتعمت

مافيش اخبار حلوة هنسمعها قريب

مابتقابليش حد و لا مابتديش فرصة؟

و غيرها من الكلمات و الجمل اللي حقيقي بتعصب و بتحسس البنت مهما كانت ناجحة ان ناقصها حاجة ، او انها مقصرة في حاجة .

البنات دول و غيرهم كتير اتصالحوا مع فكرة انهم كيان قائم بذاته، شخص كامل مش مستنين شخص يكملهم، مشيوا في حياتهم و حققوا احلامهم و بعدوا عن الفكرة اللي بيحاول المجتمع يصدرها ليهم و هي فكرة “كيف تصطادين عريسا” عشان ماتبقيش كائن ناقص.

لما البنات دول بعدوا عن الشكل النمطي اللي المجتمع بيزقهم ليه و بيحسرهم فيه ، قدروا يوصلوا لقدر كبير من التصالح النفسي و السعادة الحقيقية، و بالمناسبة في كتير منهم بعد ما كتبوا الهاشتاج قابلوا شريك حياتهم و اتجوزوا ، يعني الموضوع مش اننا بنشجع مقاطعة الجواز و لا اننا بنشجع ان البنت مالهاش دور و لا قيمة لو مش متجوزة.

أي بنت هي المسئولة الاولي و الأخيرة عن سعادتها ، سواء كانت لوحدها أو لو لقت شريك حياتها ، 

انك سينجل مش عيب ، و لا انك مرتبطة ميزة! المهم تكوني مرتاحة و سعيدة و مبسوطة بوقتك و بقرارتك و اختيارتك، ودة لان سعادتك قرارك!