in , , , ,

دليل المدارس الجزء الاول

المعضلة الكونية للأمهات الجداد هي مرحلة التقديم لأولادهم في المدارس ، و لان دي خطوة مهمة جدا جدا، و كتير مابيبقوش عارفيين يبدأوا منين فهنحاول في المقالة دي نساعدكم ازاي تختاروا المدارس لأولادكم في كام خطوة:

أولا:  حددي اتجاهاتك 

عايزة تدخلي ولادك مدرسة حكومة و لا تجريبية و لا ناشيونال و لا انترناشيونال، 

كمان في المرحلة دي بتحددي هل عندك اتجاهات لمدرسة إسلامية أو مدرسة راهبات

ثانيا : الميزانية 

الميزانية مش بس معناها مصاريف المدرسة، لأ ،

مصاريف المدرسة فيها بنود كتير زي:

-مصاريف المدرسة

-مصاريف اليونيفورم

-مصاريف الكتب 

-ومصاريف السوشيال لايف اللي بتختاريها لاولادك،

يعني ايه؟

يعني انتي بتدخلي ولادك في community  معين و بالتالي لازم تعرفي ت  cope  مع ال  community  دة ، مش هتدخليه انترناشيونال و تحرميه بعدها من خروجات أصحابه مثلا ، و دة في النطاق المعقول مش المبالغ فيه ، يعني لازم يكون في تكافؤ، 

يعني ماينفعش احط كل اللي قدامي و اللي ورايا في مصاريف المدرسة لان في حياة اجتماعية خاصة بالمدرسة و المستوي اللي اختارتيه هتدخلي ابنك او بنتك فيه و لازم تبقي عاملة حسابه.

-حاجة كمان بنحسبها في الميزانية، و هي ان لو عندك طفل تاني ، او الطفل اللي بتقدمي له دة الأول فلازم تعملي حسابك ان كلها كام سنة و المصاريف دي هتضرب في اتنين او تلاتة ، علي حسب عدد اولادك ، وبالتالي فمينفعش ادخل اول طفل في مستوي و مقدرش بعدها ادخل اخواته معاه ، ودي حاجة مهمة جدا ، ناخد بالنا منها من الأول و انتي أصلا بتختاري المدرسة و بتحطي الميزانية.

-فلوس الابليكيشين، و دي كمان مهم اوي نحسبها في الميزانية ، مدارس كتير بتدفعي فلوس ابليكيشن عشان تقدمي و مابتبقاش بارقام بسيطة، فلازم تسالي في المدارس اللي بتفككري تقدمي فيها علي فلوس الابليكيشن و هل هي  refundable  و لا لأ، لان في مدارس مش بترجع لك الفلوس دي لو ابنك ماتقبلش ! و مهم تحسبي لو هتقدمي في اكتر من مدرسة فلوس الابليكيشنز كلها هيبقي كام و تحطيه في الميزانية

-فلوس ال  deposit  ، 

عادة بنقدم في تلت اربع مدارس عشان مابنبقاش متاكدين هنقبل فين، وطبعا دول بيبقوا احسن مدارس استقرينا عليهم ، ولان معظم المدارس مواعيد الانترفيوهات بتاعتها مش واحدة ، فممكن جدا تخلصي انترفيو في مدرسة و ابنك/بنتك يتقبل ، و هيبقي مطلوب منك تدفعي  deposit  ، و بعدها وارد جدا تجي لك مدرسة تانية و يتقبل برده فيها، و دي انتي بتفضليها اكتر لاسباب كتير هنتكلم عنها بعدين، في الوقت دة هتحتاجي تعملي  refund  و بيتخصم فلوس من اللي دفعتيه، فمهم وانتي بتسالي عن مصاريف المدرسة و الابليكيشن تسالي عن لو حصل  refund  هل الفلوس كلها هتتخصم و لا جزء منها بس ؟ و تحطيه كمان بند في الميزانية.

كدة يبقي دي اول خطوات و انتي بتدوري علي مدرسة ” اتجاهاتك و الميزانية” ، الميزانية اللي قسمناها ل : 

-مصاريف مدرسة

-مصاريف كتب و يونيفورم

-سوشيال لايف

-ابليكيشين

-deposit  و refund

في المقالة اللي جاية هنقول ازاي تنزلي تشوفي المدارس و تفاضلي بينهم عشان تختاري الاحسن و الأنسب و تاخدي بالك من ايه و انتي بتختاري !

بقلم نسمة مدحت

Nesma Medhat ُEntaleqi Chief Editor/Writer/Marketer/ Vlogger /Storyteller and Author for published books “إاللي إسمه إيه”& “أصل المثل

What do you think?

Written by Editor

Comments

Leave a Reply

Your email address will not be published. Required fields are marked *

Loading…

0

Comments

0 comments

ليه العلاقة اختلت بين الراجل و الست ؟

دليل المدارس الجزء التاني