ازاي تختاري شريك حياتك من٥ حاجات

فكرة اختيار شريك الحياة دي فكرة صعبة شويتين، أصلا كدة بصي علي الاسم  بيقولك بنختار ” شريك حياة”

تحتها الف خط، يعني مش اي حد و خلاص، مش زوج و خلاص، مش صاحب و خلاص ، لأ ، الموضوع فعلا أكبر من كدة ، و عشان تعرفي تختاري شريك الحياة الصح في خمس حاجات لازم تلاقيهم فيه :

١-الشخص المريح،

فكرة الشخص المريح دي مش فكرة سهلة ، مريح بمعني انك علي طبيعتك و انتي معاه ، مش متكلفة ، مش مضطرة تمثلي، مش مضطرة تبيني حاجات مش فيكي عشان تقنعيه بنفسك، ببساطة بتكوني نفسك معاه ، و علي طبيعتك

٢-بتعرفوا تتكلموا، و بتعرفوا تتخانقوا،

فكرة الحوار، ان شريك الحياة دة هو الشخص اللي هتشاركيه كل تفاصيل حياتك و هتشاركيه تفاصيل حياته ، فلازم يبقي في حوار طول الوقت بينكم، يعني سهل انكم تتكلموا مع بعض، مش كل ما تتكلموا تقفشوا ، و لما هتلاقي الشخص اللي هتعرفي تعملي معاه حوار هتعرفي لما تختلفوا برده تحلوا المشكلة بالحوار و الكلام ، فكرة ان انتوا الاتنين بتعرفوا تسمعوا بعض ، 

الاختلافات و الخناقات كدة كدة هتحصل، بس لما تحصل مع حد عارفين تتكلموا مع بعض و الأهم عارفين تسمعوا بعض هيسهل جدا  علاقتكم

٣-كل واحد فيكم بيزق التاني لقدام

شريك الحياة الحقيقي ، هو اللي هتلاقيه بيزقك ديما لقدام، بيدعمك انك تطوري نفسك، و بيقف جنبك لما بتقفي او بتعطلي، هتلاقيه مصدق فيكي ، و في امكانياتك و قدراتك، عمره ما هيغير من نجاحك ، وفي المقابل انتي هتكوني شريكة حياة حقيقية لما هتعملي معاه نفس الحاجات، لما هتقفي جنبه و مش هتكوني بتشيليه او بتعطليه في المطلق، انتي كمان لازم تبقي بتدعميه و مصدقة فيه و بتزقيه يكون احسن،

٤-بيطلع النسخة الأفضل منك معاه،

في حد بيطلع أسوأ نسخة منك معاه، و في حد بيطلع احسن نسخة منك معاه ، هو دة الشريك الحقيقي، الشخص اللي بيخليكي ديما عايزة تكوني أحسن ، أحسن لنفسك و ليه و لبيتكم و عيلتكم، الشخص اللي وجوده بيطلع احلي ما فيكي هو دة شريك الحياة اللي تتمسكي بيه و ماتسيبهوش

٥-اللي بيحترمك و يقدرك

الحب مش كل حاجة، جملة سمعناها كتير ، بس الحقيقي انه مهم جدا جنب الحب يبقي في احترام و تقدير ، لما شريكك يبقي بيحترمك و مقدر جدا وجودك في حياته هتلاقي كل اللي فوق دة بيحصل تلقائي ، و طبعا الموضوع متبادل ، فكرة الاحترام و التقدير مع  الحب بشكله الناضح هما أساس أي علاقة ناجحة

فكرة انك تلاقي شريك حياة،  فكرة مش سهلة،

 بس مستاهلة انك تستني، و تدوري، و ماتقبليش باقل من شريك حقيقي لحياتك! لانك تستاهلي اللي يقدرك!