ليه العلاقة اختلت بين الراجل و الست ؟

في لغبطة كدة حاصلة في العلاقات بين الرجالة و الستات ، يعني الست بقت تتصرف زي الرجالة و الرجالة تتصرف زي الستات ،

و افتكر دي حاجة حاصلة لأسباب كتيرة اوي :

– لما الرجالة اتنازلوا عن دورهم كرجالة  بالتالي الستات بدأت تداري او تفقد انوثتها عشان تقدرتكمل، فاختل توازن العلاقات، و بقي ولا الرجالة مبسوطين و لا الستات مبسوطين ،

-الظروف الاقتصادية الصعبة اللي خلت ستات كتير تعتمد علي نفسها بشكل أساسي عشان تقدر تصرف علي نفسها و في أحيان تانية علي ولادها

-التخلي اللي حصل من الراجل لمسئوليته عن بيته وولاده ، و اعتماده مبدأ مش الست بتشتغل تصرف هي 

-حالات الطلاق اللي بتنتهي باهمال الاب لمسئولياته المادية و المعنوية لاولاده ، خلت الست تداري انوثتها و تاخد دور الاب و الام ، الراجل و الست 

-التربية اللي طلعت أجيال معتمدة علي نفسها بزيادة من البنات، و أجيال اتكالية و مستنية مساعدة في كل حاجة من الولاد 

اللي حصل ان  بقي في شكوي جماعية من الطرفين ، الستات بتشتكي انها بقت شايلة حمل و مسئولية كبيرة اوووي عليها لان مافيش عندها راجل يشيل ، و بقت الرجالة تشتكي ان الستات استرجلت و بقت تقف قدام الراجل و تعديه كمان !

والنتيجة الاسوأ ان رجالة كتير بقوا و هما بيدوروا علي ست  تبقي انثي بحق و حقيقي، يعني يحس انها علطول ضعيفة قدامه و محسساه برجولته، بقوا يوقعوا في ستات مش حقيقين ، ستات بتعرف تخبي و تمثل الضعف و قلة الحيلة لحد ما تتمكن، و في معظم الأوقات بتبقي مستغلة و متلاعبة! 

و في نفس الوقت الستات الحقيقية و الصادقة اللي بتعتمد علي نفسها و مالهاش في اللف و الدوران، الست اللي اضطرت تداري انوثتها عشان تعرف تعيش و تكمل بتقع في رجالة متلاعبة و مستغلة !

الحقيقي اننا محتاجين نفهم ان  الفكرة في الأساس ان الاتنين ست و راجل بني ادمين ، الاتنين لهم طبيعة مختلفة ربنا خلقهم بيها ، ودة مش معناه ان الست مكانها البيت تطبخ و تربي الأولاد و خلاص-مع احترامنا الشديد للي بيعملوا كدة- و لا معناه برده ان في طرف يقدر يستغني عن التاني ، بالعكس ربنا خلقنا بطبيعة مختلفة عشان نكمل بعض مش عشان نتحدي بعض !

الست هي مصدر الأمان و السكينة و الحنان للراجل ، الست هي السكن ،

 و الراجل هو مصدر الاحتواء و القوة و المسئولية و هو امان الست و ضهرها و سندها !

طيب الحل ايه؟ 

الحل اننا كستات و رجالة نقبل طبيعتنا و نقبل  اختلافتنا ، 

نفهم و نقبل  ان الست هي الحنية و الامان و الانوثة وفي نفس الوقت الست وقت الجد تعرف تشيل المسئولية مع الرجل عشان تساعده ،مش تبقي هي الأساس في تحمل المسئولية!

و نقبل ان الراجل هو المسئول الأول ، هو القوة و الأمان بكل معانيه للست ، هو اللي بيشيل عنها و بيسندها في ضعفها ، هو ضهرها و قوتها!

محتاجين الراجل يرجع راجل بصحيح و حق و حقيقي، عشان الست كمان ترجع تبقي ست بحق و حقيقي، و العلاقة بينهم ترجع تتزن تاني، و عشان المزيفيين و المستغلين يبعدوا عن الكويسيين الصادقين، عشان يرجع يبقي الطيبين للطيبات و العكس صحيح!

او الاصح مش عارفين نمشي الطريق الصح لقلب الشخص الصح !