هل السكس قلة أدب؟ و بنمارسه لعدم انقراض البشرية فقط؟

الحقيقة ان السكس أو العلاقة الحميمة موضوع شائك شويتين، في ناس كتير مبدئيا كدة مسمينه “قلة الأدب”، يعني تخيلي معايا كدة لما واحدة جوزها يبقي عايز يمارس معاها العلاقة الحميمة فتقوله انت عايز ايه؟ عايز قلة ادب؟

وهنا يحضرني مدام سهير البابلي و مدام إسعاد يونس في فيلم ” بكيزة و زغلول ” ، عايز ايه ده؟ عايز قلة أدب؟

مفهوم ان العلاقة الحميمة هي قلة أدب، مفهوم أترسخ جوانا من واحنا صغيرين، لإنه كان عيب نتكلم فيه، عيب نسأل عنه، عيب نفهم هو ايه أصلا،

وارتبط عندنا السكس بقلة الأدب، وإنها هي المسبب الرئيسي في اننا نجيب أطفال، فعشان تخلفي لازم هتضطري تعملي قلة أدب بعد ما تتجوزي!

فبقي مفهوم العلاقة الحميمية غير إنه حاجة قلة الادب هو سبب رئيسي في عدم انقراض البشرية، ونقطة ومن أول السطر.

طبعا المفاهيم دي بوظت جوازات، و دخلت جوازات تانية كتير في نطاق الروتين و الملل و الواجب، و بقت العلاقة الحميمة دي هَم مالوش لازمة و لا عازة مادام خلفنا و الحمدلله شاركنا في عدم انقراض البشرية!

بس الحقيقة إن السكس ده أو قلة الأدب زي ما ربونا إسمها العلاقة  الحميمية، يعني أعلي درجات التواصل الروحي و الفكري و الجسدي بين الزوجين ، نعمة كدة من ربنا بتحسس الطرفين بالراحة و الأمان و الحب لأقصي الدرجات إذا اتفهمت صح و اتعملت مظبوط،

مهم جدا إننا نعلّم و نثقف نفسنا أكتر عن جسمنا و احتياجاته و عن العلاقة الحميمية، و ازاي نستمتع بيها ، يعني اذا كنا اتربينا علي أفكار غلط ف it’s never too late  اننا نتعلم و نفهم صح بدل ما تضيع حياتنا علي مفاهيم غلط ممكن تبقي سبب في هدم البيت أو في انفصال روحي و جسدي بينك و بين جوزك،

الحمدلله دلوقتي العالم كله مفتوح، يعني سهل إنك تسألي وتبحثي عشان تعرفي معلومات صح عن العلاقة الحميمية، و انها مش قلة أدب و لا سببها الوحيد هو عدم أنقراض البشرية،

ماتقفليش علي نفسك، و لا تعملي زي النعامة و تخبي رأسك في الرملة، الاحتياج الجنسي مش عيب، ده غريزة طبيعية ربنا خلقها فينا عشان نستمتع بيها ، و عشان نستمتع مع شريك حياتنا و من مزاياها و مش الوحيدة هي أننا نجيب أطفال، فاعرفي عشان تقدري تستمتعي أنتي و جوزك بنعمة ربنا عليكوا،

مهم أوي كمان إنك تعلمي ولادك من بدري المعلومات الصح عن العلاقة الحميمية، ما تتكسفيش و تكرري غلطة اهالينا فينا،  خليكي أنتي مصدر المعلومات الصح، لان في عالم مفتوح زي اللي أحنا فيه هيعرفوا هيعرفوا، فخليهم يعرفوا منك، مش ياخدوا معلومات ممكن ماتبقاش صح من أي حد تاني، و يتعقدوا أو يتضروا باي شكل من الاشكال،

 عشان تعرفي تفهميهم صح، لازم أنتي تفهميها صح!

و عشان تقدري تستمعي بنعمة ربنا صح لازم تفهميها صح!